Read Mising 1 KORINTIANG KVDVNG 5 Bible Online

1 KORINTIANG KVDVNG 5 - Mising bible

1 KORINTIANG KVDVNG 5

¹Aropakpc cdcmpc lubidung jc noluk ara:lo aisi:ma:pc imvngvmvnsutung, odokkc cdcmpc inamc ui-inc kvdv:dok ara:lo:sinci ka:begmang; Kapila:nc tani:akonc bvk abudok nc:lok lcdulo du:mvndung.

²Odokkc nolu ngolluong cmna mc:sunc tani:yc! Nolu cdcmyam mc:dvrra kappc-ripcnammangalang? Sc:kobv cdcm itoji noluk ara:lokkcm la:pakmotok.

³Kapila:nc amvr-amosc kamanggom ngo yalokokki dung, odokkc du:narcmpc

⁴ngo kcbang ba:namcm Ru:tum Kristokolo ba:toibong sc:kobv cdcmpc agerko gertoji cdc tani:dcm. Nolu cdvlo yadkumsudonc, odokkc yalodc du:mvndagnc, Ru:tum Jisukc ilang-gvlangkokki,

⁵nolu cdc tani:dcm uilo:pc topaklvgpa:yc — adinamvrdcm dopakdopc, odomvlo Ru:tum Jisukc longcdc bvk yalodcm turmodopc.

⁶Noluk bottapc lusu lusunamdc aimang. Nolu kinma:nci jc komirang adjio:dc alumpakdcm go:sa:modag cmna?

⁷Cdc aku kormira:dcm mopu:toka nolujen anu alumpc iycpc, nolu aropakpc komirang go:sa:ma:ncpc ila:yam. Kapila:nc Kristobv ngoluk gvpvtsula gvkunamdok me:r awodcm, palvgto.

⁸Kajc ngolu, cdcmpidag cdc donam-tv:namdcm ilai, cdc aku komira:dokkimang, cdc aima:pc ncka:mvnsunclang aisi:ma:nc komirangdokkimang, cmpige:la komirang ilvgma:nam pitangdokki ainc asin gcnamclang arodokki.

⁹Nolukkolo:pc ngo do:jvgdo nolum aisi:ma:nc tani:kvdv:dokki jonsuyok cmna adka;

¹⁰cmpcsinci sc mo:pvsok aisi:ma:nc agerkvdv:dokki cdcmanggom dorvdonyonc odokkc rodkutnc kvdv:dokki, cdcmanggom moimang kumnc kvdv:dokki, odokkc cmpcmvlo nolu mo:pvsokkc gvlenpa:yc.

¹¹Cmpige:la ngo cdcmyam nolum sc:komsin jonsuma:dopc adto sc:kobv bvro aminko ka:ycji bv aisi:ma:nc ager germurkoba: dorv-dongyoko domurmvlo, cdcmanggom, moimang kumnckomvlo, cdcmanggom rotkudnckomvlo — cdcmpinckokki dobotv:boisuyoka.

¹²Kapila:nc mo:rongolok du:ncdcm ngo kcba:ba:la okkom inaycn? Cdc mondoli:dok du:nc kvdv:dc:ma:lang sc:kobulum nolu kcba: ba:pcnammcnc?

¹³Ru:ncpvncbv cdc mo:rongkc du:nckvdv:dcm kcbangcm ba:dag. “Aima:nc ager gernc tani:dcm noluk ara:lokkcm mcnnennvgtok.”