Read Mising 2 KORINTIANGKVDVNG 8 Bible Online

2 KORINTIANGKVDVNG 8 - Mising bible

2 KORINTIANGKVDVNG 8

¹Ngo nolum kintoka cmna mc:dag jc, bvrokvdvnga, Ru:ncpvnckc aya:dcm okodcm Makedonia mondoli:do lcngkankaji.

²Kapila:nc kvnggv:pc ipusire:pa:namlok ankang ka:namki, buluk pv:namko kvnggv:pc mc:namclang okokosin kama:sv:ma:namdc bulukkcpc kanamsvnamlo bojcyangkang.

³Kapila:nc bulu buluk pa:namdcmpci bito, kapc lukansula:dagji, odokkc buluk kanamdcmyam bojcya:ngcm bito, buluk avkc mcngkampc mc:namdokki,

⁴aipc kumnc tani:kvdv:dok cpv:pc ornam ordodcm ormvndopc ngolum aipakpc kumna:sola lula — odokkc sc,

⁵ngolu kapc mc:daganc, cmpige:la bulu bipo:danna bulu avkvdv:dcm Ru:tummc bito odokkc ngolukkolo:pc Ru:ncpvnckc mc:namkokki.

⁶Cdcmv:pc ila ngolu lusv:lvgto jc bv gerrobcibomtobong gerrobbomnamko, bv sc aya:nam agerscm gerappa:do.

⁷Su:pak nolu kapc appvng agerlok ammemyam aiya:dagnc — mc:jvglo, bottapc lubinamlo, kinnamlo, appvng asin kvnggv:namlo, odokkc noluk ngolum aipc mc:namlo — ka:langka nolu sc aya:nam agerso:sin ammem aiya: dopc.

⁸Ngo scm lulvgla lunampc lumang, cmpige:la amikc asinc kvnggv:nammcm la:lenna lcngkanpc jc noluk aipc mc:namkvdv:dc:sin arorung.

⁹Kapcnc nolu ngoluk Ru:tum Jisu Kristokc ayangcm kindag, jc Bv jodi mircmdagagom, ckvdaggom noluk lcgangc Bv opanncmpc ikang, odomvlo jen Bvk opandokki nolu jen mircmncpc iycpc.

¹⁰Odokkc odo agomdo ngok luyircm lubiung: cdc nolukkcpc aiyar ya:ycpc su:pak dv:tak ako po:pc okodcm nolu gerrobbommanggongai cmpila mc:la mc:to,

¹¹odomvlo jen noluk mc:pc mosvsula du:namdc cdcm nolu gerapnamdo dorvgmvnsuycpc nolukkc okko du:ji odokki.

¹²Kapila:nc jodi mosv:sunamdc du:yc, cdcm torvgsula:nampc ido tani:akolokkc okko duji cdcmpc okko bvkkc kama:ji cdcmpcmang.

¹³Ngo cdcm lumang jc akkem scgrio:pc du:mopc odokkc nolu jo:namcm jo:pa:do,

¹⁴cmpige:la jc rclcgpc du:nam agompc noluk pv:sepv:yenamdc silomclokc ayirso buluk manamcm bika:langka, odomvlojen rclcgpc du:namc odo lenycpc.

¹⁵Cdcm adla lc:namdcmpc, “Sc:kobv gingkumsukanc bojcrungko okkomsin bojcko du:tomang odokkc sc:kobv adjioko gingkumsutonc kama:pc itomang.”

¹⁶Cmpige:la Ru:ncpvncmc aipai binampc ika:langka sc:kobv noluk lcgangc c:mo:pinc ka:sv:mosv:nammcm idagnc Titu:kc asin ara:do.

¹⁷Kapila:nc bv ngoluk lunamongcm torvgsumangai, cmpige:la bv avdc:rung airu:pc asinc mcngangge:la bv nolukkolo:pc bvk gvlv:dcmpc gvdag.

¹⁸Bvk lcdulo bvrodcm mclvgdung ngolu sc:kobv tadponc lutaddcm appvng mondoli:lo lutadbiddom amin gvnncji;

¹⁹Odokkc cddo:mang, cmpige:la bvm mondoli:kvdv:dc bitag ngoluk lcdulo gvmvndopc sc ayangkanc agerscm okodcm ngolu gerra gvgcbomdu:ji, Ru:tumkc amin gvnam lcgangc odokkc ngoluk ainc asin mc:namcm lcngkanpc.

²⁰Ngoluk asinc mc:dag jc sc:kobv:sin ngolum aimang cmna luyoka sc asin mcngkep-mc:repma:pc aman binamscm okodcm ngolu ka:sv:mosv:du:ji.

²¹Kapila:nc ngolu ka:mila okodc mcnggcnammcji cdcm ka:la gvdo Ru:tumkc ka:po:mang cmpige:la tani:kvdv:dok kangkolo:sin.

²²Odokkc buluk lcdulo ngoluk bvrodcm mclvgdung sc:kom ngolu lckko: lckko:lo anka:la ka:toji odokkc bojcrung agerlo asinc mcnga:dopc pa:to, cmpige:la sc:kobv su:pak bojcya:pc asin mc:dapdagji po:pckcmyam bvk nolum asin mc:tinnamdokki.

²³Titu:kcpc, bv ngok ajonc odokkc noluk agerlo ager gerjonc; odokkc ngoluk bvrrangkvdv:dokkcpc bulu lutad lubinc mondoli: kvdv:dokkcpc Kristokcpc amin gvnnc.

²⁴Cdcmpidag sc tani:kvdv:scm noluk agomcm lukanbila lubilang, mondoli: kvdv:dok kangko-tadkolo noluk aipc mc:nam agomcmnang nolum ngoluk lubonsula lunamdc.