Read Mising PILIPIANG KVDVNG 2 Bible Online

PILIPIANG KVDVNG 2 - Mising bible

PILIPIANG KVDVNG 2

¹Cdcmpidag atv asin pvtapc mc:monamko du:mvlo Kristokolo, aipc mc:namlok lubonko lcgangko du:mvlo, Yalodo atv itcngko du:mvlo, atv aisunamkolang aya:pc mc:namko du:mvlo,

²ngok mc:pobadnamdcm cdc asino:dcmpc ila pv:motoka, cdcmv:pinc aipc mc:namc, pv:namkopc lckkongkopc ila odokkc asinc akkongkopc.

³Avkc lcgangc inam okkomsin iyoka cdcmanggom ngo:na cmna bottapc mc:sunammc, cmpige:la asinc ansv:pc mc:sula ammem mcnggcla noluk avkvdv:dcmyam tadya:lang.

⁴Noluk akonc avkc mc:nam sagnamongcm kanggomoyoka, cmpige:la akonkc mc:bonammc ka:motoka.

⁵Sc asinsc nolukkolo gctoka, okodc noluk Kristo Jisukolo du:ji, sc:kobv,

⁶Ru:ncpvnckcmpc Bv idaggomsin, Ru:ncpnckcmpc Bvkkvddvnc cmna kvtc:sutomaji.

⁷Cmpige:la Bv avdc okkomsin kama:pc imoto, ager gerya:nclok amvrpc gcge:la, tani:kvdv:dcmpc okosuge:la.

⁸Odokkc tani:ycmpc idopc pa:la:yam Bv avdc asinc ansv:sukang odokkc sidodo:pc agom lukamdcmpc tadkang, cddo:mang Kurus tayc:do sigcdodo:pci.

⁹Cdcmpidag Ru:ncpvncbv Bvm owudru:pc la:sa:to odokkc Bvm aminko bito okodc appvng amincmsinyam bottcya:nc.

¹⁰Jc Jisukc aminno appvng lcbvngc tuma:pa:do, taycngamo:to:lang mo:pvso odokkc mo:pvkcvgbo:sin,

¹¹odokkc appvng aiyyo lude:supa:do jc Jisu Kristobv Ru:tumdc, Ru:ncpvnc Abudok amin gvnamdok gvdopc.

¹²Cdcmpidag, ngok mc:bomsunamkvdvnga, nolu kapc lo:dvscm agom lukamdcmpc tadtonc, cdcmv:pc su:pakgom, ngok ka:dodo:mang cmpige:la airu:p bojcyangko ngok ka:ma:dodcm, pcsola odokkc jinna noluk avkc motunam agerkvdv:dcm gerrentoka;

¹³Kapila:nc Ru:ncpvncbv noluk ara:lo agercm gerradung, Bvk aipc mc:monam lcgangc mc:namclang odokkc agerpc anyipakdcm.

¹⁴Appvng agercm lukvnlumvnma:pc cdcmanggom agom tauma:pc gerlangka.

¹⁵Jc nolu lugcng kama:pc iycpc odokkc imurkama:pc iycpc, Ru:ncpvnckc ommangkvdv:dc koiyyang kama:pc lukcrcp agomlunc odokkc gvmurra gvnc opvnkvdv:dok ara:lo saki:pc dordo, turnamsok agomdcm kvnggv:pc gagla du:la,

¹⁶Odomvlo jen Kristokc longcdo ngo cmmumpc du:g gvtomang cdcmanggom cmmumpc agercm gertomang.

¹⁷Cddo:mang ngom noluk mc:jvgdo tolvgla palvgnamdo palvgdaggom, ngo noluk appvngkc lcdulo mc:podag.

¹⁸Cdcmv:pc nolusin ngok lcdulo mc:tv:sula mc:pobadsunammc.

¹⁹Ngo mc:dung Ru:tum Jisukolo Timoti:mc nolukkolo:pc lomdanna mclvgpc cmna, odomvlo noluk lutadkvdv:dokki mc:pomoycpc.

²⁰Ngokkc sc:kosin bvkkcmpc incko kamang, sc:kobv aropakpc noluk ainam lcgangc mcngkesula du:ji.

²¹Bulu appvngc avkc av mala aipc mc:namcm kanggo:dag, Jisu Kristokcmang.

²²Cmpige:la Timoti:kc arc kanamdcm nolu kindag, kapc awo akonc abudok lcdulokkcmpc ngok lcdulo tadponc lutaddok agercm germotonc.

²³Ngo cdcmpila bvm lomdanna mclvgpc cmna mc:dung ngo ka:danmvloi kapc cdc ngokkokki gvycji;

²⁴odokkc ngo Ru:tumkolo mc:tindung jc lomdanna ngo avycsin gvyc.

²⁵Ngo mc:to nolukkolo:pc Ipaproditu:mc ngok bvrodcm, odokkc ager gerjondcm odokkc mimagmojondcm, odokkc noluk lutad lubincdc, odokkc ngok manamdcmpc migom agergerncdcm mclvgpc cdc aiycpc cmna.

²⁶Kapcnc noluk appvngkc lcgangc bv asina:ngc ola dungai, odokkc mcdvrra dung kapila:nc cdcm tatto jc bv mola:manggai.

²⁷Aroru:pci bv mola:manggai, sidandagaboi. Cmpige:la Ru:ncpvnckc ayang-abbo bvkkolo dungai, bvggongkolo:mang ngokkolo:sin; ckvma:mvlo ngom mc:dvr tayc:lok mc:dvrong pa:ya:pc.

²⁸Ngo bvm aipc mclvgpc cmna mc:ya:dung, cdcmpidag, nolu jen bvm lckoda ka:beglangkula mc:poyckupc, odokkc jc ngo adji:yangko mc:pcnammc iycpc.

²⁹Cdcmpidag Ru:tumkolo bvm appvng mc:pobatsunamkokki torvgsulang;

³⁰odokkc cdcmpinc tani:kvdv:dcm mcnggclangka, kapcnc Kristokc ager lcgangc bv sidandagabong, ngokkolo:pc bvk turnamcm noluk ager lcgangc togcbito.