Read Mising PILIPIANG KVDVNG 4 Bible Online

PILIPIANG KVDVNG 4 - Mising bible

PILIPIANG KVDVNG 4

¹Cdcmpidag, ngok bvrokvdvnga, sc:kobulum ngo aipc mc:donc odokkc asinang ola du:nc, ngok mc:pobadnamc odokkc migom dumlubc, Ru:tumkolo kvnggv:pc ngok mc:bomsunamkvdvnga dagtoka.

²Ngo kumna:sola: ludung Iudiangmc odokkc kumna:sola ludung Sintikemc Ru:tumkolo togcsudopc.

³Odokkc ngo nolumsin taudung, aropakpc jungoli:ajonc, sc nc:ngkvdv:scm gerdum-gerrumsudung, kapcnc bulu kekonkesakpc agercm gerto tadponc lutaddcm lckopc luddom Klementkokki odokkc ngok ake ager gerjon ajonkvdv:dokki, sc:k aminkvdv:dc turnam potindo du:ji.

⁴Ru:tumkolo lo:dv:scm mc:pobadsutoka; lckoda ngo luyc, mc:pobatsutoka.

⁵Appvng tani:ycm kinmotoka noluk mentumsula du:namdcm.

⁶Ru:tumbv pvnga:du:bong. Atv lcgangc mcngkesula siyoka, cmpige:la appvng lcgangc kumnamkokki aipai bila: bila: noluk turcnamdcm Ru:ncpvnckolopc lutoka.

⁷Odokkc Ru:ncpvnckc mcngandc, okodc appvng mcngkinammcm gvkurra gvdagnc, noluk asincmnang noluk mc:namcm Kristo Jisukolo lc:ycpc.

⁸Lutcr lungapso, bvrokvdvnga, oko okodci arroji, oko okodci mcnggcpcnamcji, oko okodci arro cmna lunamcji, oko okodci narcngtong cmdagji, oko okodci aipakpc aipc mc:namcji, oko okodci ayang-agomcji, atv anguru:pc aincko du:mvlo, atvko, aipai bipcnam arckancko du:mvlo, sidc agomkvdv:scm mcngka:la ka:toka.

⁹Nolu okodcm kinyirsutonc odokkc torvgsutonc odokkc tadtonc odokkc ngokkolo ka:tonc, gertok; odokkc mcngandok Ru:ncpvncbv nolukkolo du:mvnka:langka.

¹⁰Ngo Ru:tumkolo kvnggv:pc mc:pobatsudo jc su:pak siddv longcsok lcduso nolu ngok lcgangc inamsa:namcm lckoda vrga:motoku; nolu aroru:pci ngok lcgangc idosa:do, cmpige:la nolukkc ipc-gvpcnammc kamangai.

¹¹Ngo:jc manam lcgangc lujckko luka cdcmang; kapcnc ngo kinyv:suto, ngo kapinci du:namdagnamlo du:ji, mc:tv:sudopc.

¹²Ngo adji:pc ila du:pc du:yitsuto, odokkc ngo kindag kapc pv:se-pv:yela du:pcnammcji; atvkolo odokkc appvng du:namsa:namloi ngo kvnggv:pc pv:sepv:yela pa:namcm odokkc kcno:la du:namdok lc:sula lc:nam agomdcm kintobong, pv:sepv:yenammcm odokkc ka:ma:nammc.

¹³Bvkkolo ngo appvng agercm gerra:dag sc:kobv ngom kvnggv:modagji.

¹⁴Ckvdaggom cdc nolujc ngom du:g gvddom gvmvntonc nolu ainc agercm gerto.

¹⁵Odokkc nolu Pilipiangkvdvnga avyc kinsudagjc tadponc lutadcm lurobdodo, cdvlo ngo Makedonia:dcm mcla gvtokunc, nolumangamvlo oko mondoli:ycsin binamlo:lang torvgsunamlo lckopc imvntomang;

¹⁶kapcnc cddo:mang Tessalonika:do nolu ngom lckoda bidumsunamcm bilvgka.

¹⁷Ngo:jc amandcm maka cdcmpila:mang; cmpige:la nolukkc bojcbomna gvbomnamdcm ngo mado.

¹⁸Ngo binam appv:dcm pa:to odokkc bojcko; ngo pv:dankang, Ipapraditu:kolok noluk mclvgnam amandcm torvgsula, kvnggv:pc namu:nc palvgnamdcm, Ru:ncpvnckcpc torvgsunam odok mc:lvgsunamko.

¹⁹Odokkc ngok Ru:ncpvncbv noluk manam appvngcm biycpc Kristo Jisukolo mitcmircmkvdv:dcmpc amin gvla.

²⁰Ngoluk Ru:ncpvncbv odokkc Abubv lo:dv longkcm amin gvka:langka. Amen.

²¹Kristo Jisukolo aipc kumnc tani: appvngcm kumtadsunamcm bilangka. Sc:ko bvrokvdv:dc ngok lcdulo du:mvndu:nc nolum kumtadsudag.

²²Aipc kumnc tani: appv:dc nolum kumtadsudag, ncrkvgpc cdc Kaesarkc cra:dc.

²³Ru:tum Jisu Kristokc aya:dc noluk yalokvdv:do du:mvnka:langka.