Read Mising 2 TISSALONIANG 1 Bible Online

2 TISSALONIANG 1 - Mising bible

2 TISSALONIANG 1

¹Poulbv, Silbanu:bv, odokkc Timoti:bv, Tissaloniangkvdv:dok mondoli:do:pc Ru:tumkolo ngoluk Abu odokkc Ru:tum Jisu Kristokolo:

²Ayangc nolukkolo odokkc mcnganc Ru:ncpvnc Abudokkc odokkc cdc Ru:tum Jisu Kristokolokkc.

³Ngolu Ru:ncpvncmc aipai bipcrung idag noluk lcgangc lo:dcm, bvrokvdvnga, kapc aidagji cdc, kapila:nc noluk mc:jvgdc kvnggv:pc bojcbomna gvbomdung, odokkc nolu appvngkc aipc mc:namkvdv:dc akonc akoncm bojcbomdung.

⁴Cdcmpidag ngolu Ru:ncpvnckc mondoli:do lubonsula av-avyc lusudo mcnggab garabla du:namdokki odokkc mc:jvgdok lcgangc noluk appvng ipusire: kvdv:do odokkc du:g gvnamlo okodcm nolu menbomna du:nc.

⁵Cdc Ru:ncpvnckc dormokanam kcba:ba:namdok lcngkanc, jc nolum Ru:ncpvnckc migom doko amo:dok lcga:pc arckancpc imoycpc, okodok lcgangc nolu du:gcm pa:du:ji —

⁶okodokkc aropakpci Ru:ncpvncbv cdcm mcngka:la ka:dag arodopc du:gkostokokki bilatsudopc cdc sc:kobulu nolum du:g kostom bidagji.

⁷Odokkc ngolukkolo du:rasunamcm bidopc nolum sc:kobulum du:gkostom bitu:ji, cdvlo Ru:tum Jisubv taycngtokkc lcngkansuycnc Bvk kvnggv:pc ilanggvla:nc taycng lutad lunckvdv:dokki dornc vmvlo,

⁸bulum palvgcm lvgla cdcmbulum sc:kobulu Ru:ncpvncmc kinma:ji odokkc cdc sc:kobulu ngoluk Ru:tum Jisukc tadponc lutaddcm lukamdcmpc tadma:ji.

⁹Bulu lo:dvlongkvpc singapkupcnam palvgdcm pakosuycku odokkc Bv ilang-gvla:namdok amin gvnamdokkc,

¹⁰cdvlo Bv gvyckunc odo longcdo Bvk aipc mc:namkvdv:dok ara:lo amin gvycji, odokkc mcngapla:ma:pc appv:lo ikakupc sc:kobulu mc:jvgtonc, lcga:dc ngoluk nolukkolo lukanbinamdcm mc:jvgto.

¹¹Odok lcga:pc ngolu lo:dvscm noluk lcgangc kumdo, jc ngoluk Ru:ncpvncbv Bvk gognamdcmpc arckapc imodopc, odokkc appvng ainc agom lulen luangcm odokkc mc:jvglok agercm Bvk ilang gvlangkokki gerpvtdopc,

¹²odomvlo jen nolukkolo ngoluk Ru:tum Jisukc amindcm gvmoycpc, odokkc nolu Bvkkolo, Ru:ncpvnckc ayangdcmpc odokkc Ru:tum Jisu Kristokc mcngkampc.