Read Mising 1 TIMOTI: 2 Bible Online

1 TIMOTI: 2 - Mising bible

1 TIMOTI: 2

¹Appv:lok adangarpo:pc, cdcmpila, ngo lulvgdung jc kumna lunamkvdv:dcm, kumnamcmbulu, amikc lcgangc kumnamcm, odokkc aipai binamcmbulu appvng tani:ycm bilangka,

²Kapcnc migomkvdv:dc odokkc appv:dc sc:kobulu bottcnnc ager gerkolo du:nc, jc ngolu ansv:nc odokkc mcngannc turnamcm turdopc, dormokanc odokkc mcnggcnammc appvng lambclo.

³Cdc aidag, odokkc cdc Ru:ncpvnc ngoluk Moturnckc kangkolo torvgsula:nammc,

⁴sc:kobv appvng tani:ycm moturpcnamc cmna mc:dagji odokkc arodok kinnamdo:pc gva:pc.

⁵Kapcnc Ru:ncpvncbv ako dung, odokkc Ru:ncpvnckclang tani:kvdv:dok pongkokdo du:yancko ako dung,

⁶cdc Kristo Jisu tani:dc, sc:kobv avdc appvngkc lcgangc dorrennakupc bipaksutonc, lukanbinamdc akodc ayir pv:dardo lubikaji.

⁷Odok lcgangc ngom lutad luyirncpclang mclvgla ager gerncpc mclvgbito kapc ngo arodcm lubitu:ji, ngo lume:ycm lumang, Angu tani:kvdv:dok poyirnc mc:jvglo:lang arolo.

⁸Ngo pa:pc cmna mc:dag odokkc jc appvng dungkolo milbong tani:kvdv:dc kumpcnammc, angunnc alagkvdv:dcm lagsa:la aglvng sa:ma:pc cdcmanggom pamvnsuma:pc;

⁹nc:ngkvdv:dc:sin buluk avkvdv:dc gcnamcm kangkano:pc aiyo:pc gcsv:supcnammc odokkc mc:josagjo:la gcnambomnam attarcm aipc gcpcnammc, dumvdcm ta:pet petsuma:pc cdcmanggom avncm cdcmanggom mukutang doksori:ycm cdcmanggom kvnggv:pc arckanc gcnambomnamcmmang cmpige:la ainc ager gernam kvdv:dokki.

¹⁰Kapc dormo inc nc:ngkvdv:dokkcpc aidagji.

¹¹Nc:ngakoncm ansvngo:pc kinyirsumotoka appvg agom lulvgcm tadnamkokki.

¹²Ngo oko nc:ngcmsin poyirdopc cdcmanggom milbong tani:kvdv:dcm bottcya:ncpc imoyoka; bv aso:pc du:pcnammc.

¹³Kapcnc Adammc runga:danna ru:po:tungai, odokkc Ibmc;

¹⁴odokkc Adammc yadmangai, cmpige:la nc:dcm yatto odokkc lulvgnam agomcm tadma:pc incpc ikang.

¹⁵Ckvdaggom nc:ngcm kowcm pa:namkokki moturyc, jodi bv mc:jvgla du:tvmvlo odokkc aipc mc:namc odokkc angunno, aipc angunna du:namkokki.