Read Mising 2 TIMOTI 2 Bible Online

2 TIMOTI 2 - Mising bible

2 TIMOTI 2

¹No cmpcmvlo, ngok aowa, aya:do kvnggv:toka cdc Kristo Jisukolo du:ncdcm,

²odokkc no okodcm ngokkolokkcm tadtoji bojcrung lukanbinclokkcm mc:jvgnc tani:ycm togc:lvgnam sc:kobulu ammemsin poyirbila:dopc.

³Irisinyo pa:namlo Jisu Kristokc ainc mimagmonc koncmpc ilang-gvlangka.

⁴Oko mimag monncsin agerro du:dom okum agerdo gergo:la du:mang, bvk ka:la gernamdc bvm gerdopc mca:lvgncdcm mc:lvgsumopc cmna mc:nampc ila:yam.

⁵Oko yc:mvnsunc tani:ycsin bv lujvg-lurodokkcmpc mopvma:mvlo v:rnc dumlubcm pa:mang.

⁶Cdc kvnggv:pc torpc ager gernckvdv:dc sc:ko pa:pongarnam arvg kvdv:dcm pa:pa:do.

⁷Ngo okkom ludoji mcngkvla ka:toka, kapcnc Ru:tumbv nolum appvng mcngkinnamcm biycpc.

⁸Mc:pa:toka Jisu Kristomc, sikolokkc turkuncdcm, Dawidkolokkc lennc, ngok tadponc lutaddo kapc lutoji,

⁹cdc tadponc lutaddcm okodok lcgangc ngo irvsinyom pa:doji tani:mokencmpc ikoli:ycm koggabkosula dung.

¹⁰Cdcmpidag ngo appvngcm balenna la:namkvdv:dok lcgangc mentumsula du:do jen bulusin Kristo Jisukolo turnamcm pa:ycpc odok lo:dv-longkvpc du:nc amin gvnamdokki:.

¹¹Cdc lunamdc arorungc: “Ngolu jodi Bvk lcdulo simvnto, Bvk lcdulo ngolu turmvnycsin;

¹²jodi ngolu oijoto, ngolusin Bvk lcdulo migomcm domvnyc; jodi ngolu Bvm lupaksuyc, Bv:sin ngolum lupaksuyc;

¹³jodi ngolu mc:jvgkama:ncpc iycnc, bv mc:jvgkancpc ila du:dag kapcnc Bv avdc avdcm lupaksula:mang.”

¹⁴Scmbulum bulum mc:pa:motokuka, odokkc Ru:tumkc kcra:lo sanggabla lutoka gomug luker-luyermvnsunammcm mcdopc, okodc atv aincmsin ima:ji, cmpige:la tadncdcm momvgdag.

¹⁵Noluk aiyanggerncm gertoka nolu avyc avycm Ru:ncpvnckolo tolvgnam akoncmpc, ager gerncko sc:kobv anyi:supcnammc kama:dopc, aropc aro agomdcm gagdopc.

¹⁶Cdcmpinc sel-belainc agom luke:nc tani:kvdv:dcm mcpaklangka, kapila:nc cdc tani:kvdv:dcm bojc bojcya:pc dormo kama:lo:pc gvbodag,

¹⁷odokkc buluk agom lunamkvdv:dc odok lambcdcm ya:bomnammcmpc dodag. Buluk ara:dok Himenaeubv odokkc Piletu:bv,

¹⁸sc:kobulu gvkesula sikolo:pc arolokkc gvka:ji cdcmpc lulajc turkunamdc turkangcikubong. Bulu akelok mc:jvgcm mc:mur mc:yarsumotobong.

¹⁹Cmpige:la Ru:ncpvnckc kvnggv:nc dunggabkodc du:dag, sc muhorscm bomna: “Ru:tumdc kindag cdc sc:kobulu Bvkkcji,” odokkc, “Kajc appvngc sc:ko Ru:tumkc amindcm mindagji aima:nc agerlokkc germa:pc du:la:jc.”

²⁰Okum bottcnc crangkolo avnclang murkong arcmbati:ong du:mang cmpige:la vsvngclang among attarcsin du:dag, odokkc akedcm mcnggcnam ager gernapc, akedcm mcnggcma:nc ager gernapc.

²¹Jodi akonc avyc okodc menggcma:nc narc:mosuycji, odo bv ainc ager gernanc attarpc iyc, angunmola odokkc okumdok ru:tumdokkcpc inasa:napc aidag, atv ainc ager gernancpc mosv:sudag.

²²Cdcmpidag ya:me: sv:sang aima:pc mc:namcm mcpaktoka odokkc dormokama:ncm ka:mi:toka, mc:jvgcm, aipc mc:namcm, odokkc mcngancm, cdc sc:kobulu Ru:tummc gogdagji narcngo:nc asinki.

²³Okkomsin kinma:nc kvdv:dokki okkomsin ipcnammc kamang, arvsu:ma:nc luka:mvnsunamkvdv:dcm; no kindag jc cdcbulu pamvnsunam kvdv:dcm lenmodag.

²⁴Odokkc Ru:tumkc ager gerya:nc kvdv:dc pamvnsugo:ncpc ipcma:namc cmpige:la appvngcm aipc mc:ncpc ipcnammc,

²⁵airu:nc poyirncpc, mc:yinsuncpc, ainc agomki bvk biruddi:ncm lugabdopc lulangka. Ru:ncpvncbv kapcjila cdcm tolvgciycsong jc bulu asinc mc:dvrra mc:latsuyckupc odokkc arodcm kinkapc gva:ycpc,

²⁶odokkc bulu uidok ketelepdokkc duggcla:ycpc, bvk mcngkamcm idopc lcdudo sogabdag.