Read Mising TITUS 2 Bible Online

TITUS 2 - Mising bible

TITUS 2

¹Cmpige:la nolukkcpcdan okodc aiyo:pc lunam astrong agomcji poyirtoka.

²Abv:ya:nc tani:kvdv:dcm mc:jupmcngkapdopc lulvglangka, mcnga:lang, mcngcsagcla, mc:jvglo aiyo:pc mcnga:la, aipc mc:la, odokkc kvnggv:la du:namlo.

³Abv:nc nc:ngkvdv:dcmsin cdcmv:pc lulvgtoka agomasv inam-sa:namlo aiyo:dopc, lume:pc luncpc ima:dopc cdcmanggom tv:nclok pagbopc ima:dopc; okodc aidagji cdcm bulu poyirpa:yc,

⁴odokkc ame:nc nc:ng kvdv:dcm odokkc ommang kvdv:dcm aipc mc:dopc luyir-gvyirpcnamc, mcngc-sagcdopc, angundopc,

⁵odokkc buluk milbongkvdv:dok agomcm tadla du:dopc, jc Ru:ncpvnckc agomdcm aima:pc tadmoma:ycpc.

⁶Cdcmv:pc ya:me:kvdv:dcm bulu avkvdv:dcm montumsula du:jo:dopc.

⁷Avyc lcngkansutoka appvng agerlo ainc ager gernc akoncmpc ila, odokkc nok poyirkolo angu anguma:namcm lcngkanna, kvnggv:namcm,

⁸odokkc aropc ainc agomcm lunamcm cdc okodcm lupakla:ma:dopc, odomvlo jen atv birudi:nckoncm anyi:sumoycpc, ngolum akosin aima:ncko lunam kama:pc ila.

⁹Pagbokvdv:dcm buluk ru:tumkvdv:dcm agom lukam taddopc lulvgtoka odokkc appvng agerlo mc:lvgsudopc; bulu agom lunam tadma:pc ipcnamma:yc, cdcmanggom ame:-are:nc attarcm dopso:ma:dopc,

¹⁰cmpige:la appv:dcm aroru:pc narc:pc lcngkandopc, odomvlojen appv:lo bulu Ru:ncpvnckc ngoluk Moturncdcm aiyo:pc lunam agomdcm gcycpc.

¹¹Kapila:nc Ru:ncpvnckc aya:dc tani:kvdv:dok moturlcgangc lenkang,

¹²ngoluk dormo kama:n appv:dcm odokkc mo:pvsok aima:pc mc:namsagnam mcpakdopc luyirdag, odokkc ansv:n asin gcla turra du:dopc, dormokala, odokkc so mo:pvsok dormokanc turnamko turla, ngoluk akirba:d pa:nam toya:dcm toka:la du:la,

¹³cdc ngoluk bottcnc Ru:ncpvnc odokkc Moturnc Jisu Kristobv lenkunamdc,

¹⁴sc:kobv avdc ngolum rcpvtkupc cmna appvng Bvk avkc lcgangc Bvk avkc tani:ckkc sc:kobulu ainc ager lcgangc anguru:nc tani:yc.

¹⁵Sc appv:scm lutadgo:toka; luyirtoka odokkc ge:yirtoka appvng ilang-gvlangki. Sc:komsin nom lupakluyakkosuyok.