Read Mising PILEMON 1 Bible Online

PILEMON 1 - Mising bible

PILEMON 1

¹Poulbv, Kristo Jisukc lcgangc makana:lo tumnamc, odokkc Timoti:bv ngoluk bvrodc.

²Pilemonkolo:pc ngolukmc:bomsunam ager gerjon odokkc Appia:bv ngoluk bvrmcdc Arkipusbv ngoluk mimag mojonc, odokkc nok okumdok mondoli:do:pc:

³Ayangc nolukkolo:pc odokkc Ru:ncpvnckolokkc mcnganc ngoluk Abudokkc odokkc Ru:tum Jisu Kristokolokkc.

⁴Ngok Ru:ncpvncmc lo:dcm kumdodo cdvlo mc:pa:doji ngo nom aipai bido,

⁵Kapila:nc ngok aipc mc:namclang mc:jvgcm taddag okodc nokkc Ru:tum Jisukcpc du:ji odokkc aipc kumnc tani: appv:dokkcpc,

⁶odokkc ngo kumdojc nok mc:jvgdcm lubinamdc Kristokolo ngoluk ainam appvng kinnamcm aila gvbommoycpc.

⁷Kapila:nc nokkolokkcm ngo bojcrungko mc:pom odokkc du:po dungancm nok aipc mc:namdokkcm pa:to, ngok bvrra, kapila:nc nokkokki aipc kumnc tani:kvdv:dcm mc:pomoto.

⁸Cdcmv:pc, ngo nom Kristokolo lulvgpc asinang bottapc mc:daggom okodcm ipcnamcnc cdcm idopc.

⁹Ckvdaggom aipc mc:namdok lcgangc ngo nom lurcl lunamdcm mc:ya:to — ngo, Poulbv, migom lutad luya:binnc odokkc su:pak maka:na:lo du:ncsin Kristo Jisukc —

¹⁰ngo nom kumna ludung ngok awodok, Onesimuskc lcgangc, sc:kokc abupc ngo ika:ji ngok makana:lo du:dodcm.

¹¹(Po:pc nokkcpc bv ager kaboma:nckai, cmpige:la su:pak bv aropakpci agerlo aincko nokkcpcla: ngokkcpc.)

¹²Ngo bvm nokkolo:pc mclatlvgdungku, ngok asinru:scmci mc:lvgla.

¹³Bvm ngokkolo lc:pc mc:poyai, bv ngom ibi-sa:biycpc cmna nok lcgangc ngok makana:lo du:dodcm tadponc lutaddok lcgangc;

¹⁴cmpige:la nok agom pa:ma:pc ngo okkomsin ige:mang cmna mc:to odomvlojen lukamdcmmarpc ima:ycpc cmpige:la nok avkc mc:lv:pc mc:namdcmpc idopc.

¹⁵Kapcjila cdcmv:pila bv nokkolokkc gvpakkangapc ayir asudkopc, jc no bvm lo:dvlongkvlokkcpc la:latyckupc,

¹⁶cdvlosin pagbokoncmpcmang cmpige:la pagbokoncmyam aiya:ncpc, mc:bomsunam bvrokoncmpc, anguru:pc ngokkcpc cmpige:la nokkcpc kapc bojcrungkopc iycnc, adinno odokkc Ru:tumkolo anyipakdo.

¹⁷Cdcmpila ngom nok ijongvjonkonc cmna mc:mvlo, bvm torvgsulangka kapc no ngom torvgsudoji.

¹⁸Bv nom imurko itorungcimvlo, cdcmanggom nom o:kaiko bikupcnam du:mvlo, cdcm ngokkolok malangka.

¹⁹Ngo, Poulbv, scm ngok avkc alagsokki adtag, ngo cdcm dorycku nokkc ngom okkomsin bikupcnam kamang cmpc nom avdcmsinci.

²⁰C, bvrra ngo nokkc avnamko Ru:tumkolo asudo:ko madung. Kristokolo ngok asincm anupc mc:tinsumotoka.

²¹Nok asin agom lunam tadnamdcm mc:la, ngo nom addung, ngo okkom ludu:nc cdcmsinyam no iya:nc cmnamdcm kinna.

²²Oddung, ngok lcgangc mibo dungkoko mosv:teika, kapcnc ngo nok kumnamkokki nokkcpc pa:lenyckupc cmna mc:tindung.

²³Ipaprasbv Kristo Jisukolo ngok makana:lo du:jondc, nolum kumtadsunamcm kumlvgdag,

²⁴cdcmv:pc Markbv, Aristarku:bv, Dema:bv, odokkc Lu:kbv, ngok ager gerjonkvdv:dc.

²⁵Ru:tum Jisu Kristokc aya:dc noluk yalodo lo:dcm dungka:langka.