Read Mising HIBRIUKVDVNG 12 Bible Online

HIBRIUKVDVNG 12 - Mising bible

HIBRIUKVDVNG 12

¹Cdcmpidag, ngolum cddvnc bottcnc mukkangcmpinc lukanbinnc du:ribomnam kvdv:dc du:namc, kajc ngolu mcma:ru:pc ngoluk kcra:pc dugpcnamdcm dugnamdcm dugtvla du:lai, ngoluk dugpo:ncdcmlang mc:jvgdcm mc:pvtbonc,

²Jisukolo:pc ka:la ka:la, sc:kobv Bvk kcra:pc lc:nam mc:podok lcga:pc kurusdcm mentumsula mc:tapsuto, any:dcm mcge:la, odokkc Ru:ncpvnckc migom tedkodo lagbvgpc tedkang.

³Mcngkvla ka:toka Bvm sc:kobv papi:lokkc cdcmpinnc mirupc ka:namcm avyc mentumsubito, odomvlo nolu dugdvr-dugso:macycpc cdcmanggom pcssomole:ma:ycpc.

⁴Noluk pa:pkokki moka:mvnsunamdcm noluk i:ycm bidmogcdopc imangcida.

⁵Odokkc nolu luyirla lunam agomkvdv:dcm mitpanamtonci awopc lunamkvdv:dcm? “Ngok awo, Ru:tumkc luyir lugoddcm cmmumpc mc:samcyayok. Cdcmanggom asin pvtapc mc:namcm adji:pc mc:suyok cdvlo Bvkkoki nolum palvgcm lvgycji.

⁶Kapcnc Ru:tumbv sc:kom Bv aipc mc:dagji lujvg luyirki ludag odokkc appvng aowom sc:kom Bv torvgsudagji dcmdo.”

⁷Cdc lujvgla luyirnam lcgangc jc nolu menrasula du:pcnammc. Ru:ncpvncbv nolum awopc idu:sa:dung; kapcnc oko aowo du:n sc:kom bvk abudc lujvg luyircm luma:ji?

⁸Nolum jodi lujvg luyirma:pc mc:yc, okolo appvngc imvngvmvntoji, odomvlo jo:ra:pc onam omanggc awomang.

⁹Scmsinyam, ngolukkc mo:pvsok abukvdvng dung ngolum lujvg luyir lupc odokkc ngolu bulum mcnggcto. Ngolu yalodok odokkc turnamkvdv:dok Abudcm airu:pc aiya:pc kcyvgpc agom tadma:yclang.

¹⁰Kapcnc bulu ngolum mogvtmomatto buluk adjioko mc:po lcgangc, cmpige:la Bv ngolum lujvg luyircm ludag ngoluk ainam lcgangc, odomvlo jen ngolu Bvk angundcm pa:mvnycpc.

¹¹Kapcnc mogvtmomat ludandodo aipc kidagncmpc ka:dag mc:ponamdcmpcyam; lcdupc cdc dormokanamlok mcngan a:ycm e:modag cdc sc:kobulum odokki luyirgvyirdagji.

¹²Cdcmpidag noluk lagtognc alagkvdv:dcm lagsa:toka odokkc noluk tumrasula:ma:nc lcbvng kvdv:dcm kvnggv:motoka,

¹³odokkc noluk alckvdv:dok lcgangc yvg cmnc lambcm motoka, odomvlojen okodc lcbe:dagji opansuma:ycpc cmpige:la cdcmyam aimoyckupc.

¹⁴Appvng tani:kokki mc:nganna du:pc kvnggv:pc ilang sa:langka, odokkc angunnam lcgangc okodc:ma:mvloi sc:kosin Ru:tummc ka:begma:yc.

¹⁵Ka:toka cdcm jc sc:kobv:sin Ru:ncpvnckc aya:pc mc:namdcm pa:ma:pc ipc lagimang; jc oko “Konc appvrcsin” pvrsa:pc odokkc ipu sire:lok lcga:pc imopc lagimang, odokkc odokki bojcrungc napvnarc:ma:pc idag;

¹⁶jc sc:kosin aima:n ager gerncpc cdcmanggom Esaukcmpc dormo kama:pc ipcma:namc, sc:kobv bvk ododokkcbong pa:nam onam sottom apin kosak lcgangc kopaksutonc.

¹⁷Kapcnc nolu kindag jc lcdupc, cdvlo bv akirba:ddcm pangkonsupc matonc, bvm bitomang, kapcnc bvkkc asinc mc:dvrra mc:latsukunam ayirkatomang, bv cdcm miksidvla madagkugom.

¹⁸Kapcnc nolu okodcm gakkvla:dagnc odopc gva:mang, kvnggv:pc dorra du:nc vmvkolo:pc, odokkc kcmolo:pc, odokkc kcmmo jvng cmkolo:pc, odokkc dumuang csarlo:pc,

¹⁹odokkc tu:lu:munnamlok bc:namdc, odokkc gomukko sc:kokc agomkvdv:dc tadnckvdv:dcm kummodag jc oko lutadcmbulumsin bulum lupcnamma:bong.

²⁰Kapcnc bulu cdc lulvgnam lulvgdcm menrasula:tomang, “simvnkonc adi:dcm gakkvdaggomci, cdcm vlvngki gckeyc.”

²¹Aropakpci, cddvkojc pcsopcnam ka:begnamdc idagai jc, Mose:bv luto, “Ngo pcsola jingo:sukang.”

²²Cmpige:la nolu Jion Adi:do:pc gva:to odokkc turnc Ru:ncpvnckc nogordo:pc, taycng dungkodo du:nc nogordo:pc, taycng dungkodo du:nc Jerusalempc, odokkc kvngapla:ma:nam taycng among lutad lunckvdv:dcm mc:popc dcngkonsunamc,

²³odokkc gvkumsunamdcm opongarnamkvdv:dcm taycng dungkoto amincm adgabtak, odokkc kcba: ba:nckolo:pc sc:kobv appvngkc Ru:ncpvnncji, odokkc tani:kvdv:dc monam aiyo:pc imonam yalo kvdv:dcm, odokkc Jisukolo:pc,

²⁴cdc anu lugoddok pongkokdok dunggurncdc, odokkc crkat i:dcm cdc Abelkc i:dcmpcyam aya:ya:pc ludag.

²⁵Ka:toka jc nolu bvm lupaksuma:pc sc:kobv lula du:ji. Kapcnc jodi bulu cdvlo Bvm lupaksutoji mo:pvso sc:kobv bulum lurvdla lutadtoji bulu basila:mang, aipc adji:ya:pc basila:yc jodi ngolu Bvm lupakyc sc:kobv taycngtokkc lurvdla, lutadycji.

²⁶Bvk gomugdc odo mo:pvscm yonku:to; cmpige:la su:pak bv pesuto, “Ckvdaggom lckoda ngo mo:pvscmmong yonku:ma:yc cmpige:la taycngtcmsin.”

²⁷Cdc toscg agomdc, “Ckvdaggom lckoda,” lukandag okodcm yonku:toji odok la:paknamdcm, kapc okodcm motoji, cdcmpcjc okodcm yonku:la:ma:ji du:dopc.

²⁸Cdcmpidag kajc mc:lvgsulai yonku:la:ma:nam migomdungko amo:dcm pa:la:yam, odokkc cdcmpidag kajc Ru:ncpvnckolo:pc tolvglai kvnggv:pc mcnggcru:la;

²⁹kapcnc ngoluk Ru:ncpvncbv ugpagnc vmmc.