Read Mising HIBRIUKVDVNG 13 Bible Online

HIBRIUKVDVNG 13 - Mising bible

HIBRIUKVDVNG 13

¹Bvrra:pc aipc mc:namcm mc:tvtoka.

²Mibo bonamcm bopc mc:yamc:sayoka, kapcnc odokki kinmango:pc taycng among lutad lunckvdv:dcm mibbom boto.

³Mc:pa:langka cdc sc:kobulu makana:lo tumtu:ji, buluk lcdulo makana:lo tumnamvngcmpc; odokkc cdc sc:kobbulum aisi:ma:pc itag-gvtagji, kapc nolusin cdc amvr atcrdo du:la:yam.

⁴Noluk ara:lo yamnc gvnam-la:namc aipc mcnggcsuka:langka, odokkc midang monamdok asubc narc:pc:scng ka:langka; kapcnc Ru:ncpvncbv aima:pc asin gcnckvdv:dcm odokkc ami miycng langgo:nckvdv:dcm kcbangcm ba:ycku.

⁵Noluk turnamdo murkongcm aipc mc:bola mc:yoka, odokkc nolukkc okko du:ji cdcmong mc:tv:sula du:langka; kapcnc Bv luto, “Ngo cdvlosin bila:ma:pc ima:yc cdcmanggom nolum mcma:yc.”

⁶Cdcmpiga:lok ngolu mc:tcksudanla lula:dag, “Ru:tumbv ngoluk idum gvdumsunnc, tani:yc ngom okkom ila:ycn? Ngo pcsomang.”

⁷Noluk gvgurla gvgcbonc kvdv:dcm mc:pa:langka, cdc sc:kobulu nolum Ru:ncpvnckc agomcm lubitoji; Buluk turnamkvdv:dokki kapc ikaji cdcm ka:langka, odokkc buluk mc:jvgkvdv:dcm mc:jvgkaimvnsulang.

⁸Jisu Kristobv c:mongc mclosin odokkc silosin odokkc lo:dvlongkvpc.

⁹Gvyodla gvngubonc odokkc tadkvma:nam luyircm tadla gvyotmvnyoka; kapcnc cdc mc:yinsunamki asin kvnggv:namdc aiya:dag, okodc buluk mcmangke:ke:pc du:namdcm avkamotoma:ji apin donamkokkimang.

¹⁰Ngolukkc kumko mo:di:ko dung okolokbulukkc cdc tombudok agercm ido-sa:dopc sotto kama:ji.

¹¹Kapcnc simvnkvdv:dok amvrkvdv:dc okodokbuluk i:dcm kumko mo:takdo:pc dormo ager gernckvdv:dc pa:p legang palvgnampc boma:tonc du:pumsula tani:kvdv:dc dungko mo:takdok mo:ro:pc rompakto.

¹²Cdcmv:pc Jisubv:gom yabgo mo:rongolo ipusire:ycm pa:to tani:kvdv:dcm avkc i:dokki mopu:pc cmna.

¹³Cdcmpidag kajc ngolu Bvkkolo:pc dungkumsula dungkodokkc moro:pc gvlenkai, odokkc Bvk ipusire:namdcm menrasunamdcm menrasulai.

¹⁴Kapcnc ngolukkc lo:dcm du:tvnc nogorko kamang, cmpige:la ngolu madung oko nogordc lenpcnammcji cdcm.

¹⁵Cmpcmvlo kajc Ru:ncpvnckolo:pc aipai bila Bvkkokki mcma:pc palvgnamko bila:jc, cdcyam, nabbersok appv-a:ycko Bvk amincm lukansuncko.

¹⁶Ainc agercm gerpc mc:yamc:sayok odokkc nolukkc okko du:ji cdcm bisupc, kapcnc cdcmpinc palvgnam kvdv:dc Ru:ncpvncmc mc:lvgsumodag.

¹⁷Noluk igur-gvgurbonc kvdv:dok lukam tadlangka odokkc bulukkolo tolvgsulangka; kapcnc bulu noluk yalokvdv:dcm kanggabya:la dung, isabcm bikupcnc tani:kvdv:dcmpc. Bulum mc:po-mcnganla scm germotoka, odokkc mc:dvrra ima:pc, kapcnc cdc nolukkcpc ipo-siyanncpc ima:yc.

¹⁸Ngoluk lcgangc kumbitei; kapcnc ngolu kinsudag jc ngolukkc aiyo:pc mcngcsaggc dung, mcngc kadopc gerpc mc:namc appvng agerlo dung.

¹⁹Ngo nolum bojcya:pc scm idopc lusv:dung cdcmpinam lcgangc jc ngom nolukkcpc lomdanna la:lenyckupc.

²⁰Su:pak mcngannok Ru:ncpvncbv sc:kobv ngoluk Ru:tum Jisumc sikolokkcm la:sa:tokunc me:r sobennok bottcru:nc kanggabya:ncdc, lo:dv-longkvpc du:nc lugoddok i:dokki,

²¹nolum appvng ainc attarkokki mosv:dag jc nolu Bvk mcngkamcm iyc-gvycpc, noluk ara:lo gerla jc okodc bvkkcpc kapc ka:podagji, Jisu Kristokokki; sckkcpc bv amin gvnamc lo:dv-longkvlokkcpc gvpcnammcji. Amen.

²²Ngo nolum kumna:sola: ludung, bvrrangkvdvnga, ngok lujvgpc luyirra lunam agom kvdv:scm mcnggcmvntoka, kapcnc ngo nolukkolo:pc andcngo:pc attobong.

²³Nolu kinpcnammc jc ngoluk bvro Timoti:bvm mclennvgtoku, sc:kokokki ngo nolum ka:begycku bv jodi lomdanna gvyc.

²⁴Noluk igur-gvgurbonc appv:dcm kumtadsulangka odokkc aipc kumjo:nc appv:dcm. Cdc sc:kobulu Itali:dokkc gvdu:nc nolum kumtadsunamcm mclvgamtag.

²⁵Noluk appvngkolo aya:pc mc:namc dungka:lang. Amen.