Read Mising HIBRIUKVDVNG 3 Bible Online

HIBRIUKVDVNG 3 - Mising bible

HIBRIUKVDVNG 3

¹Cdcmpidag, angunnc bvrrangkvdvnga, sc:kobulu taycng gognamcm tadmvndonc, Jisumc mc:toka, ngoluk lude:sunamlok ager gernamdc odokkc kumnam agerlok bottcnc.

²Bv mc:jvg jvrvgnckkai Bvm sc:kobv agercm bikaji, kappar Mose:bv:sin Ru:ncpvnckc okum ara:do mc:jvgdagaji.

³Ckvdaggom kapc okum moncdcm okumdcmpcyam mcnggcya:dagji Mose:mcyam Jisumc bojcru:ya:pc arc kadopc kvto.

⁴(Kapcnc appvng okumcm akonkokki modag, cmpige:la appvng attarlok moncdc Ru:ncpvncbv.)

⁵Su:pak Mose:bv Ru:ncpvnckc okumdo ager gerya:nckoncmpc mc:jvgdagai, lcdupc lupcnam attarkvdv:dcm,

⁶cmpige:la Kristobv awo akoncmpc Ru:ncpvnckc okumdo mc:jvgjvrvgdagai. Odokkc ngolu Bvk okumc ngolu jodi mc:tinsutvla du:mvlo odokkc ngoluk mc:tinno bottcpc mc:sutvmvlo.

⁷Cdcmpidag, Angunnc Yalodc kapc ludagji, “Silo, cdvlo nolu Bvk gomugcm taddonc,

⁸mimag moncdokkcmpc birudi:pc noluk asin kvdv:dcm tormoyoka, yumrangdo ankang ka:nam longcdokkcmpc,

⁹Okolo noluk abukvdv:dc ngom ankang kangkolo kangkvto odokkc ngok agerdcm dv:tak yv:pikopc ka:to.

¹⁰Cdcmpidag ngom cdc opvndokki aglvngcm sa:moto, odokkc luto, ‘Bulu lo:dcm asin kvdv:dokki mc:yotla mc:dag; bulu ngok lambc kvdv:dcm kintomang.’

¹¹Kapc ngo ngok aglv:la pesutoji, ‘Bulu cdvlosin ngok du:rasukolo gva:la:ma:yc.’ ”

¹²Ka:sv:mosv:toka, bvrrang kvdvnga, ckvdma:mvlo nolukkolok akonc jodi aima:nc ager gerckvdv:dokkcpc iyc, mc:jvgma:nc asinpc ila, turnc Ru:ncpv:ncdokkcpc gerdopc gvboycpc.

¹³Cmpige:la akoncm akonc longgcm longgcm luyirmvnsulang, cddvlo:pc “silo” cmna luycji, jc nolukkolok sc:kosin pa:pdok yadnamdokki asin torma:ycpc.

¹⁴Kapcnc ngolu Kristokolo orsudo, jodi ngolu mc:tinar — po:namdcm du:tcrdo:pc mcnggabtvla du:mvlo,

¹⁵Cdcm cdvlo lutagji cdcm lukamdcmpc. “Silo, cdvlo no Bvk gomugcm taddoji, noluk asin kvdv:dcm cdc mimag mododokkcmpc tormoyoka.”

¹⁶Cdc sc:kobulun jc tatto odokkc ckvdaggom mimagcm mokanc? Cdcbulu Igiptdcm Mose:kc gvgcbonamdo gvmvnna mcnckvdv:dc:mangalang?

¹⁷Odokkc sckkokki Bv dv:tak yv:pi:kopc Bv aglvngsangkan? Cdc pa:b inc kvdv:dokkimangalang, sc:k amvrkvdv:dc yumra:do kcdamka:nc.

¹⁸Odokkc sc:kom Bv pesuton jc cdcbulu Bvk du:rasukodo gvangkuma:ycnc, cmpige:la cdc agom lukam tadma:nc kvdv:dc:ma:lang?

¹⁹Cdcmpidag ngolu ka:dag jc bulu gva:la:mangai jc buluk mc:jvgma:nam lcgangki.