Read Mising HIBRIUKVDVNG 7 Bible Online

HIBRIUKVDVNG 7 - Mising bible

HIBRIUKVDVNG 7

¹Sok lcgangc Melkijedekbv, Salemdok migomdc, Bottcru:nc Ru:ncpvnckc dormo ager gerncdc, Abrahammc rvgsuto migomkvdv:dok palvgla bikodokkc gvlatdokudo odokkc bvm akirba:dcm bito;

²odokkc bvm Abrahambv appv:lok vyvngdok ornamko bito. Bv ipong gvpongarnc, bv amindcm angupc minnampc ila, dormokanclok migompc ila, odokkc odo bv Salemdoksin migompc ikang, cdcyam, mcngannok migomc.

³Bvkkc anc manggom abbo kamang cdcmanggom ope:ncgvngc kamang, odokkc cdvlosin longc lenrobnammc cdcmanggom turnamlok du:tcrc kamangai, cmpige:la Ru:ncpvnckc Awodcm gcsula Bv lo:dv-longkv lcgangc dormo ager gerncpcidung.

⁴Ka:tok kapc bv bottcncji! Abraham ope:lok ru:tum tani:pc ila bvm omvg osvgmonckvdv:dok vyvng ornamdcm bito.

⁵Odokkc cdc Lebi:kc opvn kvdv:dc sc:kobv dormo ager gerncdok ager gerko okumdcm pa:toji lujvglurodo lulvgnamko dung tani: kvdv:dokkcm vyvng ornamko la:dopc, cdcmyam, buluk bvrrang kvdv:dokkcm, cdcbulugom Abraham kolokkc lenncdaggom.

⁶Cmpige:la sc tani:sc sc:kobv buluk opvnlokkc lenma:ji vyvnglok ako binam Abrahamkolok torvgsuto odokkc akirba:d bito bvm sckkc pesubinam kvdv:dc dunggaji.

⁷Cdc luker luyermvnsu luppcinammang jc adji:ya:ncdc bottcya:ncdokki akirba:d binamdcm.

⁸Sido vyvnglok ako lunamdcm sikupcnc tani:yc la:dag; olo, akonckki sc:k agomcm cdc lukanna lubidagjc Bv turdag.

⁹Akonc scmpcsinci luycpc jc Lebi:bv avdc, sc:kobv vyvngdok ako binamdcm torvgsudagnc, Abrahamki vyvng ornamcm bito,

¹⁰kapcnc bv odosinci bvk albiang pongkebv:do dungai cdvlo Melkijedekbv bvm rvgsutoji.

¹¹Cdcmpinamc aiyo:pc ainamc jodi Lebi:kvdv:dok dormo ager gernam kvdv:dokki pa:la:dagmvlo (kapcnc odokki tani:kvdv:dc lujvglurodcm pa:to.) Oko bojcyangko odo lagidagabo:n Melkijedekkc ikamdcmpc lcdudokkc dormo ager gerncko lenpc, Aronkc amin minnamdok lcdudo ako minnamdcmyam?

¹²Kapcnc cdvlo dormo ager gernamlok anguko du:ji, odo lujvg lurodo:sin anguru:pcnamko idag.

¹³Kapcnc sc sc:kokc agomcm scmbulum lutu:nc cdc akon opvnlokkc, sckkolokkc cdvlosin sc:kosin palvgkodo agercm gerkvma:daji.

¹⁴Kapcnc cdcm ka:begnammcjc ngoluk Ru:tumbv Judahkolokkc lenkang, odokkc odo ope:dok lutc:la Mose:bv dormo ager gernclok agomcm okkomsin lutomang.

¹⁵Sidc anki bojcya:pc ka:pangkang jc cdvlo Melkijedekkcmpinc dormo ager gernc akonko lenka:ji, sc:kobv dormo ager gerncpc ika:ji

¹⁶magodla manamdcmpcmang amvrlok lenncpc cmpige:la ya:mvgma:nc turnamlok ilang-gvlangnam kokkipagc.

¹⁷Kapcnc cdcm Bvk agomcm lukanna lubitag. “No lo:dv-longkvlokkcpc dormo ager gernc, Melkijedekkc inamdok lcdudokkc.”

¹⁸Alak asongkolo, po:pckc lulvg lunamdcm mc:yotla mctag odok ilang gvla:ma:namdokki odokkc ina-gvnama:namdokki.

¹⁹(Kapcnc lujvglurodc okkomsin pv:dopc ila:tomang;) akon alagdo, aiya:nc lulennvgto, okodokki ngolu Ru:ncpvnckc kcra:do gva:doji.

²⁰Odokkc cdcm pesunamko pema:pc imangai, sc:kobulu cdc po:pc dormo ager gerko okumkvdv:dcm pesunamko pema:pc langka,

²¹cmpige:la scmdan pesunamkokki luka, “Ru:tumdc pesuto odokkc Bvk asinc anguma:yc, ‘No lo:dv longkvpc du:nc dormo ager gernc.’ ”

²²Sidc Jisumc aiya:nc lugotdok jaminpc modag.

²³Po:pckc dormo ager gernckvdv:dc tani: bojcrungkai, kapila:nc sinamkokki ager gerko okumdo du:tvnamdokkcm bulum motumdungai;

²⁴cmpige:la Bv Bvk dormo agerdcm lo:dv longkcm du:dopc gagdag, kapcnc Bv lo:dvlongkcm du:dopc gertvdag.

²⁵Odokkokki ila Bv lo:dcm cdc sc:kobulu Ru:ncpvnckc kcra:lo:pc gva:dagnc Bvkkokki motula:dag, Bv lo:dvscm buluk lcgangc kumbipc turra du: la:yam.

²⁶Kapcnc cdc kvb-kab cmdagai jc ngolu cdcmpinc dormo ager gernamlok bottcncko pa:pcnammc, angunncko, lugc:ma:nam kancko, koiyang kama:ncko, papi:kvdv:dokkc langgunamko, taycngto la:sa:namko.

²⁷Bvkkc cdc dormo ager gernckvdv:dcmpc, lo:dvscm palvgcm palvgpc manamko lagimang, biya:danna bvk avkc pa:pkvdv:dok lcgangc odokkc cdc tani:kvdv:dok lcgangc; Bv cdcm lcko biroblo avdcm bingapto.

²⁸Aroru:pc, lujvglurodc tani:kvdv:dok ilang gvlangma:namlo dormo ager gernclok bottcncpc bidag, cmpige:la pesunamdc, okodc lujvglurodok lcdupc lenka:ji, Awoko tolvgto sc:kom lo:dv longkvpc du:yarra du:dopc germotoji.