Read Mising HIBRIUKVDVNG 8 Bible Online

HIBRIUKVDVNG 8 - Mising bible

HIBRIUKVDVNG 8

¹Su:pak ngolu oko lugoddok ludu:nc cdc scmpc ngolukkc cdcmpc dormo ager gernclok bottcncko du:nc, akonc sc:ko Migomdok taycng amo:tok dungkodo lagbvkpc dungka:nc.

²Migom ager gerncko aipc kumnamcm kumkodo odokkc aro tombudo okodcm tani:ki mogabmang cmpige:la Ru:tum bvkkokki mogabtoji.

³Kapcnc dormo ager gernc bottcnc appvngcm aman kvdvngcm odokkc palvgcm bidopc tolvgtag; cdcmpidag sc dormo ager gerncscmsin o:kaiko bidopc ipc lagidag.

⁴Su:pak Bv mo:pvso du:ya:mvlo, Bv dormo ager gernclok bottcncpc cmpcsin ima:yai, lujvg-lurodokkcmpc bipcnc dormo ager gernc du:la:yam.

⁵Bulu jvgkonsunamko odokkc yaloko agercm gerbido taycngto:pc aipc tani: kumkokvdv:do; kapcnc cdvlo Mose:bv tombudcm mosa:pc cmna idungaji, bvm Ru:ncpvncbv luyirka, scmpc lula, “Ka:tok jc no appvngcm mokamdcmpc motoka okodcm nom adi: tayc:do lcngkantoji.”

⁶Cmpige:la cdc kapc, Kristobv ager gernamko pa:tonc okodc okumdcmyam aipakpc aiya:dagnc kapc Bvkkokki lukonsunam luggoddc aiya:dagnc, cdcm aiya:nc pesunamkvdv:do adtu:ji adla:yam.

⁷Kapcnc jodi cdc lupongarnam lugoddc lumur kamangai, lckoda odo lckonkopc imurkupc lenkuma:yai.

⁸Kapcnc Bv buluk lcdulo imurcm pa:dag cdvlo Bv ludoji: “Longckvdv:dc pvnga:yc, Ru:tumbv ludag cdvlo ngo Israel ope:dokki anu lugodko biycnc odokkc Juda:kc okum cra:dokki;

⁹buluk abukvdv:dokki lugod lunamdcmpcmang odo longcdo cdvlo ngo bulum alagkki sobomna gvbokaji Igipt amo:dokkcm bulum gvlenbokupc; kapcnc bulu ngok lugoddo du:tvtomang, odokkc cdcmpila ngo bulum okkomsin tadka:tomang, Ru:tumbv ludag.

¹⁰Sc:na Israel okum cra:dokki lugoddcm luycnc ngo odo longckvdv:dok lcdulo, Ru:tumbv ludag ngok lujvg lurrom buluk asin ara:do lvgyc, odokkc buluk asin ara:do adyc, odokkc ngo buluk Ru:ncpvncpc iyc, odokkc bulu ngok tani:pc iyc.

¹¹Odokkc bulu appvngc buluk ajonkvdv:dcm cdcmanggom appvngc buluk bvrrom bulukkolok adjiyarnc kvdv:dokkc bulukkolok bottarya:nc kvdv:do:pc, scmpc lula, poyirma:yc, ‘Ru:tummc kintoka,’ kapcnc appvngc ngom kinyc.

¹²Kapcnc ngo buluk imur murnam kvdv:dok lcgangc, odokkc ngo buluk pa:pkvdv:dcm lckoda mc:pangkuma:bong.”

¹³Anu lugod agomko ludodcm Bv lupongarnamdcm agerro aitomang cmna luto. Odokkc okodc aima:pc ika:ji odokkc akubomna gvka:ji yogpcbong cmna ila dung.