Read Mising JAKOB 5 Bible Online

JAKOB 5 - Mising bible

JAKOB 5

¹C:i mircmkvdvnga, kajc su:pak, kaptoka odokkc nolukkolo:pc pvnga:pcnc opan pannam kvdv:dok lcganc jcngo:sutoka.

²Noluk mircmkvdv:dc ya:pakkang odokkc gcnam gasor-galukkvdv:dcm tabvnc dopaknammc.

³Noluk avnkvdv:dc odokkc silbor murkongkvdv:dc yogvr koiyangc angapka:bong, odokkc odokbuluk yogvr koiyangkvdv:dc noluk birudi:pc agom lukanbincpc iyc odokkc noluk adinkvdv:dcm vmmcmpc dorabbomyc. Noluk du:tcr longcdokkcpc murkongcm lcngkumsutobong.

⁴Ka:toka, ager gernckvdv:dok pa:pcnam kvdv:dcm sc:kobulu noluk arvgkvdv:dcm mopu:la ibitoji, okodcm nolu yadla la:tumsula lc:toji, jc:la kapsa:dag; odokkc arvg inckvdv:dok kabnam kvdv:dc taycng among kcrc:dok Ru:tumdok yeru:do:pc pvngkang.

⁵Nolu mo:pvso sela:-badla dolv:donyyom dola turtobong; noluk asin kvdv:dcm papakdo longckolo jvngapmoto.

⁶Nolu momvgto, nolu dormokanc tani:ycm moketo; bv nolum morasutomang.

⁷Menrasula du:toka, cdcmpidag, bvrokvdvnga, Ru:tumkc gvdoku longcdo:pc. Ka:toka, mo:pvsokkcm airu:pc arckanc a:ycm pa:yc cmna arvg inckvdv:dc, cdc opongarnc odokkc lcddarkc pcdo:dc oma:sisscm menrasula toya:la du:dopc toya:la du:do.

⁸Nolusin mentumsula du:langka. Noluk asinkvdv:dcm mcnggabla, kapila:nc Ru:tumkc gvkunamdc aninka:bong.

⁹Jcngka:mvnsuyoka, bvrrangkvdvnga, akonkc birudi:pc akonc, jen nolum kcbangcm ba:ma:ycpc; ka:toka, kcbang ba:ncdc yabgo kvdv:do dagla dung.

¹⁰Ipusire:ycm pa:nclang menrasunamcm pa:nclok pangodnckoncmpc, bvrokvdvnga, lungor agom lunckvdv:dcm gagtoka sc:kobulu Ru:tumkc aminno agomcm lutoji.

¹¹Ka:toka, ngolu cdcmbulum mc:ponc cmna ludo sc:kobulu lo:dcm lo:dvlongkvpc menrasula dungaji. Nolu Jo:bkc lo:dv longkvpc menrasula du:namcm tadto, odokkc nolu Ru:tumkc mcngkamdcm kinto, kapc Ru:tumbv aya:sitapc mc:nckoji odokkc aya:nckoji.

¹²Cdcmpige:la appv:dcmyam, ngok bvrrang kvdvnga, taycng among aminkokki cdcmanggom mo:pvsokki cdcmanggom angu atv pesunamkokki, pesuyoka, cmpige:la noluk c:v cmnamdc c:v cmka:lang odokkc noluk ma: cmnamdc ma:, jc nolum aima:ncpc lula mokenampc ipcnammang.

¹³Nolukkolok sc:koiyc kidu:ramdu:nci? Bvm kummotoka. Sc:koiyc mc:podu:nci? Bvm R:ncpvnckc aipai ni:tom momotoka.

¹⁴Nolukkolok sc:koiyc ramdu:nci? Bvm mondoli:dok abv:nc tani:kvdv:dcm gogkumsumotoka, odokkc bvk lcgangc bulum tulangcm yonnvgla Ru:tumkc aminno bvm kummotoka;

¹⁵odokkc mc:jvglok kumnamdc ramnc tani:dcm csa:moycku, odokkc Ru:tumbv bvm sosa:ycpc, odokkc bv jodi pa:bcmbulu itomvlogom, bvm mc:yinsubiyc.

¹⁶Cdcmpidag noluk pa:pkvdv:dcm akonc akonkolo lude:sutoka, odomvlo jen nolum csa:moyckupc. Dormokanc tani:dok kumnamdc ager kvnggv:pc ilang gvla:dag.

¹⁷Elija:bv ngolugvngkcmpinc inc-gvnc tani:kai odokkc kvnggv:pc mcnga:la kumto jc pcdongc oyoka cmna, odokkc dv:tak tagum kolang po:lo pvkcngkopc mo:pvso pcdongc otomang.

¹⁸Odok lcdupc bv lckoda kumto odokkc do:mvrtc pcdongcm omoto, odokkc mo:pvsc odok apv-a:ycm e:moto.

¹⁹Ngokkc bvrokvdvnga, nolukkolok akonc arodokkc gvmurra gvgo:ycnc odokkc sc:koiyc bvm gvlatboyckunc,

²⁰bvm kinmotoka jc papi:n ako sc:kobvi gvlatbotokunc bvk lambcdok imur ager kvdv:dcm bvk yalodcm sikolokkcm mopvyc odokkc bojcru:nc pa:bcm motityc