Read Mising 2 PITOR 3 Bible Online

2 PITOR 3 - Mising bible

2 PITOR 3

¹Sc su:pak lcdukc borkon do:jvgc nolukkolo:pc ngok adnamc, aipc mc:bomsunam kvdvnga, odokkc ngo noluk mc:jubmcngkabnc asindcmbulum mc:sa:lvgto odo anyido mc:pa:monam kokki;

²jc nolu angunnc lungor-lunckvdv:dok ro:yampokc do:yvng kvdv:dcm mc:pa:pcnamc odokkc Ru:tumclang Moturnckc lulvg agomkvdv:dcm noluk mclvgla ager gernc tani:kvdv:dokkcm.

³Scmmar nolu mcngkinru:pa:yc, jc aima:pc luka:nc tani:kvdvngc aima:pc luka:la du:tcr longcdo lenyc, buluk avkc ka:bomc:bo mc:namkoi odokkc.

⁴“Bv gvkunamdok pesubinamdc okolon? Cmna lula: lula, kapcnc cdvlokkcbong abukvdv:dc singapka:ji, appvng attarkvdv:dc cdcmv:pc itvla dung kapc cdcbulu ru:lendodokkc idagaji.”

⁵Bulu mc:pcrung cmna sc aro agomscm mc:pakmc:yagdag, jc bojcrung longc po:pcbong, Ru:ncpvnckc agomkokki taycngtc rogabla dungkang, odokkc asilokkc mo:pvko lenkang odokkc asikokki,

⁶cdc mo:pvdc okodc dunggabka:ji bottcnc pu:mi asikokki pu:pakbomka:nc odokkc yokpakkaji.

⁷Cmpige:la cdc agom akku:dokki taycngtc:lang mo:pvsc cdc dunggabla du:ncdcm vmvlo rompcmna mckumsula lc:tag, cdc kcba:bangkunanc longcdo:pc lc:la odokkc dormo kama:nc tani:kvdv:dcm mokekunamdok lcga:pc.

⁸Cmpige:la aipcmc:bomsunamkvdvnga, sc aro agom apirscm mc:yamc:sayoka, jc Ru:tumkokki longcdc dv:tak lv:yvngc, odokkc lv:yvng dv:tagdc longc akkongcmpc innc.

⁹Ru:tumbv Bvk pesunamdcm asoaso:mang kapc aso-aso:dagncmpc idagji, cmpige:la nolukkcpc mentumsubila dung, akosinci sipakmangka:langka cmna mc:la, cmpige:la appv:dc asinc mc:dvrra mc:latsutokuka cmna mc:dag.

¹⁰Cmpige:la Ru:tumkc longcdc dopsongkoncmpc pvnga:yc, odokkc odo taycngkvdv:tc bottcru:pc bc:la gvpagamyc, odokkc ncrkvgpc du:nckvdv:dc vmvlo jitpakyc, odokkc mo:pvsc:lang sok gernam agerkvdv:scm rompagamyc.

¹¹Cdcmpinamc sc appvng attarkvdv:sc cdcmpila jitpagamycnc, kapinc tani:pc nolu ipcnammcn angunna turnamlo:bulu odokkc dormokanamlo,

¹²toya:la odokkc mcnka:mvnsula Ru:ncpvnckc angkupcnc longcdcm, kapila:nc okodok lcga:dokki taycng kvdv:tcm monotyc odokkc momvgla jitpakmoyc, odokkc dungabla ncrkvgpc du:nckvdv:dcm vmvki jitpagammoyc!

¹³Cmpige:la Bvk pesunamdcmpc ngolu anu taycng among odokkc anu mo:pvko toya:la dung okodo dormokanamdc dagycji.

¹⁴Cdcmpidag, aipc mc:bomsunamkvdvnga, nolu scmbulum toya:la du:namc, Bvkkokki oko koiyangcmsin kama:pc pa:dokupc cdcmanggom imursiyar kama:dopc, odokkc mcnganna mcngandopc.

¹⁵Odokkc ngoluk Ru:tumkc mentumsula du:tedpo:la du:namdcm mopvnammc cmna kvlangka. Cdcmv:pc ngoluk aipc mc:bomsunam Bvro Poulbv:sin nolukkolo:pc bvm kinnam agom binamdcmpc adka,

¹⁶Sc agomscm adla kapc bvk appvng atvko kinma:nammc dung, okodcm cdc mcngkinma:nam odokkc du:nga:ma:pc (lukcrcp-lumcrcpnamdc) bulukkcpc avyc sikunammc, kapc bulu avkc astrong agomcm ludoji.

¹⁷Nolu cdcmpidag, aipc mc:bomsunamkvdvnga, scm kinpo:suge:la, ansutoka ckvma:mvlo lujvgluro kama:nc tani:kvdv:dok imurki gvyotboyc odokkc noluk avkc du:namdagnamdcm yogmoyc.

¹⁸Cmpige:la ngoluk Ru:tumkc odokkc Mopvtnc Jisu Kristokc ayangki odokkc kinnamki sv:sa:toka. Bvkkcpc su:paksin odokkc lo:dv-longkvpc amin gvka:langka! Amen.