Read Mising LUNGOR LUNAM 13 Bible Online

LUNGOR LUNAM 13 - Mising bible

LUNGOR LUNAM 13

¹Odokkc ngo simvn adorko siycngdokkc daropdopc ka:to, a:rcng so:nyiko kancko odokkc mittuk kvnvdko kancko, dumlubc pvyingko odok a:rcng so:yv:do odokkc odok mittukkvdv:do aisi:mang cmna lunamko.

²Odokkc cdc simvndc ngok ka:namdc Nangorputuki: takar adorkoncmpc idagai, odok alckvdv:dc situm adorkonclokkcmpc idagai, odokkc odok nappa:dc inggolok nappangcmpc idagai. Odokkc cdcm cdc alapkanc tabvdc bvk ilang gvla:dcm bito odokkc bvk migom dungkodcm odokkc bottcru:pc migom ilang-gvlangcm.

³Odok mittuk akoncm sigcdopc pajognammcmpc ka:to, cmpige:la odok sikandopc pajognamdcm aimotoku, odokkc mo:pv appv:dc cdc simvndok lcdulo mc:la mcngapla:ma:pc tadmvnto.

⁴Tani:kvdv:dc alap kanc tabvdcm kumto, kapcnc bvk lulvgla:nam ilang gvlangcm cdc simvndo bito, odokkc bulu scmpc lula simvndcm kumto, “Sc:kobv sc simvnscmpcidang, odokkc sc:kobv sok birudi:pc pamvnsudang?”

⁵Odokkc cdc simvndc bottcpc mansula Ru:ncpvncmc lugc gvcnam agomkvdv:dcm lula:lula odokkc cdcm lulvg lulang-gvlangcm ludopc nappangko bitungai yv:pi:kolang tagnyi dv:takko mclvgtungai.

⁶Cdc nappa:dc Ru:ncpvnckc birudi:pc agom lupc kokato, Bvk amindcm odokkc Bvk du:namdcm aimang cmna lupc, cdcyam sc:kobulu cdc taycngamo:to du:doji.

⁷Aipc kumnc tani:kvdv:dcmsin mimag modopc odokkc bulum momvnsumoto. Odokkc appvng opvncm odokkc tani:kvdv:dcm odokkc agom lunckvdv:dcm odokkc ope:kvdv:dcm lulvg lulang ilang gvlangcm bitungai,

⁸odokkc sc:kobulu mo:pvso du:nc dagnc appv:dc cdcm kumyc cd palvgnam Awome:rdok turnc potindo rcngamscm mosa:ma:dapc sckkc sckkc amincm adtonc.

⁹Sc:kaikc yerungc du:mvlo, bvm tadmotoka:

¹⁰Akonc jodi yc:bomkupcnammc, bv yc:bomkunamlo:pc gvdag, jodi sc:kaiyc madsvgdokki papakdo, madsvgru:dokki bvm papakpcnamc.

¹¹Odo ngo simvn adorkoda ka:begto okodc mo:pvsokkc lenka:ji; odokkc a:rcng so:nyiko me:r sobenkoncmpc dungai odokkc cdc alap kanc tabvkoncmpc agom ludagai.

¹²Cdc lenpongarnc simvndok appvng lulvg ilang gvlangcm ludagai odok dungkodo, odokkc mo:pvdc odokkc odok du:nc dagnckvdv:dcm lenpongarnc simvndcm kummoto, okodok sikandopc pajognamdcm ge:pvtmotokuji.

¹³Cdc bottcru:nc kanggodkvdv:dcm lcngkandag, cdcmv:pci tani:kvdv:dok kangkolo mo:pvso:pc vmmcm dc:yi:moto;

¹⁴odokkc kanggod kvdv:dokki okodc cdcm ager gerdopc mclvgdagji simvndok dungkolo, cdc yaddag sc:kobulu mo:pvso du:dagji, bulum simvndokkcpc monam moimangko modopc lulvgko lula: lula okodcm madsvgdokki pakedaggom turra du:toji;

¹⁵odokkc cdcm simvndok monam moima:do:pc ngaa:lvgdopc ngamoto odomvlojen simvndok monam moima:dc:sinci agom luycpc, odokkc cdc sc:kobulu simvndok monam moima:dcm kumma:ycji papakdopc.

¹⁶Cdcmv:pc cdc appv:dcm imodopc adji:nc odokkc bottcnc, mircmnc odokkc opannc anyipagcm, mcngkampc du:nc odokkc pagbopc du:nc, lagbvg alakdo pajogamdopc cdcmanggom tuptadok,

¹⁷odomvlo sc:kosin rcla:ma:dopc cdcmanggom kopakla:ma:dopc bvkkc pe:jognamko kama:sisscmci, cdcyam, simvndok amindcm cdcmanggom odok mogoddcm.

¹⁸Cdc kinnam agom lcgangc gogdag: sc:kobv tadkindagnc simvndcm kvnamdcm kvmotoka, kapcnc cdc tani: kvnamc, odok kvnamdc lvngko akkcngkolang yvngkcng kolang akkcngko.