Read Mising LUNGOR LUNAM 15 Bible Online

LUNGOR LUNAM 15 - Mising bible

LUNGOR LUNAM 15

¹Odokkc ngo taycngto aima:nc ipusire: akoda ka:begto, bottcru:ncko odokkc mc:la mcngapla:ma:namko, taycng among lutad lunc kvnvdko kanggu: kanga:ma:nc kvnvdkopc, okodc:bulu du:tcra:ji, kapcnc bulukkol Ru:ncpvnckc aglv:dcm lv:tcryc.

²Odokkc ngo ka:to okodc siycng arscmpc ka:dagji vmvkokki lckola, odokkc cdc sc:kobulu simvndcm mopvttoji odokkc odok monam moima:dcm odokkc odok amindok kvnam kvdv:dcm, siycng arsidok ru:yido dagla du:dopc buluk alagkvdv:do Ru:ncpvnckc be:langcm bomla.

³Odokkc Mose:kc ni:tomdcm modag, cdc Ru:ncpvnckc ager gerya:ncdcm, odokkc scmpc Me:r Awodok ni:tomdcm lula:lula: “Bottcru:nc odokkc mc:la mcngapla:ma:namdc nok agerkvdv:dc, O Ru:tum Ru:ncpvnc Appvngcm ilang-gvla:ncdc! Aropc kcbang ba:namc odokkc nok lambc kvdv:dc arodag, O: dv:takloksin dv:tak kvdv:dok Migom!

⁴Sc:kobv pcsoma:nc odokkc nok amincm gvmoma:ycn, O: Ru:tum? kapcnc nok atcrongc angundag. Appvng ope:yc gva:yc odokkc nom kumyc, kapcnc nok kcbang ba:namdcm lcngkanto.”

⁵Odok lcdupc ngo nge:la ka:sa:to, odokkc taycng amo:to lukanbinamdok tombu kumko okumdc moge:kang,

⁶odokkc kumkodokkc cdc kvnvd taycng among lutad lunc gvlenkang cdc kvnvd Joar kinamramnamdokki, unjernc angunnc ria onnoki yedsula, odokkc buluk ankcng kvdv:dcm avn tongali: yc:sutagai.

⁷Odokkc turnc simvn dorpi:dok adorkonc kvnvd taycng lutaddcm kvnvd avn soriangcmpc bi:nckopc Ru:ncpvnckc aglv:dok bito sc:kobv lo:dv longkvpc odokkc lo:dv amingvkodokkc odo kc longkvpc turra du:dagji;

⁸odokkc kumko okumdc mikkc bingkang Ru:ncpvnckc Bvk ilanggvlangdokkc, odokkc sc:kosin kumko okumdo:pc gva:la:tomang cdc kvnvd Joar Kinam ramnam kvnvd taycng among lutad luncdokkc gvpakma:sisscm.