Read Mising LUNGOR LUNAM 19 Bible Online

LUNGOR LUNAM 19 - Mising bible

LUNGOR LUNAM 19

¹Odok lcdupc ngo taycngtok bojcrungko yadkumsunc tani:lok jc:taksula jc:lakabnc gomugcmpincko tadbegto, “Hallelujah! Mopvnamdc odokkc amin gvnamdc odokkc ilang gvla:dc ngoluk Ru:ncpvnckc,

²kapcnc Bvk kcba:-ba:namdc arodag odokkc arro; Bv bottcru:nc ami-miyc:pc igo:ncdcm kcbangcm ba:to sc:kobv mo:pvscm aima:nc agercm bvk ami-miyc:pc inamki germotoji, odokkc bv bvk ager gernam kvdv:dok i:dokkcm bvk palvgcm lvgto.”

³Lckoda bulu jc:sangkang, “Hallelujah! Mikkidc bvkkolokkc lo:dv longkcm yv:sa:la gvsa:dag.”

⁴Odokkc yvnyikolang-appi: abv:nc tani:dc odokkc turnc simvn dorpi:dc otapkang odokkc Ru:ncpvncmc sc:kobv migom tedkodo tedka:ji scmpc lula kumto, “Amen. Hallelujah!”

⁵Odokkc migom dungkodokkc scmpc lula, gombugko buglenkang, “Ngoluk Ru:ncpvncmc nolu appvngc Bvk ager gerya:nc kvdvnga, aipai bitoka, nolu sc:kobulu Bvm, adji:nclang bottcnc pcsodagnc.”

⁶Odokkc ngo gomugko tadbegto okodc kvnggv:pc yadkumsunc tani:lok jc:namcmpc, bojcrungko asilok bc:namcmpc odokkc scmpc jc:la kvnggv:pc bottapc mvrnc do:mvrcmpc, “Hallelujah! Kapcnc Ru:tumdc ngoluk Ru:ncpvncbv cdc Appvngcm ilang gvla:ncdc migomdodag.

⁷Kajc ngolu mc:pobatsulai odokkc kvnggv:pc mc:polai odokkc Bvm amincm gvmolai, kapcnc Awome:r sobendok midangc pvngangka:bong, odokkc Bv Yamncdc avdc mosv:sutakbong;

⁸cdc Bvm kangkannc ria attarki moru:sudopc moru:sumoto, unjvgdopc odokkc angundopc.” Kapcnc cdc kangkannc riadc aipc kumnc kvdv:dok dormokanam agerkvdv:dc.

⁹Odokkc taycng among lutad luncdc ngom luto, “Scm adtok: cdcbulu akirba:d pa:nc sc:kobulum Awome:rsobendc mida:dok donamtv:namdo:pc gogtagji.” Odokkc bv ngom luto, “Sc:bulu Ru:ncpvnckc aropaknc agomc.”

¹⁰Odo ngo Bvk alcdo owa:la Bvm kumpc cmna ito, cmpige:la bv ngom luto, “No cdcm ipcru:ma:namc! Ngo nok lcdulo ager gerjonko odokkc nok bvrrang kvdv:dokkc sc:kobulu Jisukc lukan lubinammcm lutvla du:ji. Ru:ncpvncmc kumtoka.” Kapcnc Jisukc lukan lubinamdc lungor lunamdok yalodc.

¹¹Odo ngo taycng amo:tcm moge:dopc ka:to, odokkc ka:toka, kamponc gure: adorkonc! Sc:kobv odok tayc:do teddagji ludag Mc:jvgjvrvgdag odokkc Arro, odokkc dormokanamlo bv kcbangcm ba:dag odokkc mimagcm modag.

¹²Bvk amikvdv:dc vmvlok dorncmpc idag, odokkc bvk mittukdc:bulu bojcrung dumlubc; odokkc bvkkc aminko arrvgnamko dung okodcm bv:ma:mvlo sc:kosin kinma:ji.

¹³Bvm i:lo jv:budnam rvbvkokki moru:tag, odokkc oko amindokki bvm gogdagji cdc Ru:ncpvnckc Agomc.

¹⁴Odokkc taycng amo:tok mimagmonc tani:kvdv:dc, kangkannc riakokki moru:lvgnam kvdv:dc, kamponc odokkc angunnc, Bvk gvkolo kamponc gure:kolo sangge:la gvmvnkang.

¹⁵Bvk nappa:dokkc kvnggv:pc radnc madsvgko lendag okodokki opvnkvdv:dcm papagamycji, odokkc bv bulum yogvr danggi: asongkokki ka:sv:la migom doyc; bv apo:mokodcm dungkinma:pc aglv:la sa:penyc cdc Appvngcm bottcya:nc Ru:ncpvnckc aglv:dokki.

¹⁶Bvk migom gcnam rvbvdo odokkc bvk ki:ru:do bvkkc arrvgnammc aminc dung, Migomkvdv:lok migomc odokkc Ru:tum kvdv:lok ru:tumc.

¹⁷Odo ngo taycng among lutad luncko do:nyito dagncko ka:to, odokkc bottapaknc gomugko appvng pcttangkvdv:dcm gogto cdc do:mvr pongkok pongkokdok dc:nckvdv:dcm, “Kajc Ru:ncpvnckc bottcru:nc donam tv:namdok lcgangc langkumsutoka,

¹⁸cdc migomkvdv:dok adinkvdv:dcm dopagampc, gvgurbonc kvdv:dok adin kvdv:dcm, kvnggv:pc ilang gvla:nc tani:kvdv:dok adincm dopc, gure:kvdv:dok adincm odokkc bulum sa:la dugnckvdv:dcm, odokkc appvng tani:lok adinc, mcngkampc odokkc pagbopc du:nc anyipagcm, adji:nc odokkc bottanc anyipagcm!”

¹⁹Odokkc ngo simvndcm odokkc mo:pvsok migomkvdv:dcm ka:to buluk mimag monckvdv:dcm Bvk birudi:pc mimag mopc dagkumsunamcm sc:kobv gure:tayc:do Bvk mimag monckvdv:dok birudi:pc.

²⁰Odokkc cdc simvndcm ycnggapto, odokkc odok lcdulo cdc lume: lungor luncdcm sc:kobv odok kangkolo kanggod agercm gerkaji okodokki bv yattoji sc:kobulu simvndok tubjetdcm torvgsutoji odokkc cdc sc:kobulu odok monam moimangdcm kumdagji. Cdc anyidcm turpc turpc siycngcmpinc vmv-pa:ta:do cdc gondokki parnam vmvdo cryi:lvgto.

²¹Odokkc cdc akedc Bvk madsvgdokki sc:kobv gure:do teddagaji papakto, cdc bvk nappa:dokkc lennc madsvgdokki; odokkc appvng pcttang kvdv:dc buluk adinkvdv:dokki aki:yc bingkang.