Read Mising LUNGOR LUNAM 20 Bible Online

LUNGOR LUNAM 20 - Mising bible

LUNGOR LUNAM 20

¹Odokkc ngo taycng among lutad luncko taycngtokkc gvidopc ka:to, bvk alagdo oledla otcrkama:nc jiko:dok sabi:kolang bottapaknc ikoli:ko bomncko.

²Odokkc bv alap kanc tabvdcm ycnggabto, cdc leketo:dvkc tabvdcm, okodc Uidc:ji odokkc Satandc, odokkc bvm lv:ying dv:takkopc ycnggabla lc:to, odokkc bvm jiko:do cryi:lvgto,

³odokkc cdcm mokaplvgto odokkc cdcm bvk tayc:do tubjetlvgto, jc lv:ying dv:takdc gvngapma:sisscm, bv cdvlosin opvnkvdv:dcm yadpcnammang. Odok lcdupc bvm ayir adjio:ko mclenru:lvgpa:yc.

⁴Odokkc ngo migom dungkokvdvngcm ka:to, odokkc odokbuluk tayc:do tednc kvdv:dc cdcbulu sc:kobulum kcbangcm ba:dopc tolvgtoji. Ngo cdc yalokvdv:dcmsin ka:to sc:kobulu Jisumc buluk lukanbinam kvdv:dok lcgang mittukkvdv:dcm papvrtoji odokkc Ru:ncpvnckc gomug lcgangc, odokkc sc:kobulu simvndcm kumtoji cdcmanggom odok monam moima:dcm odokkc odok mogoddcm bulu tuptakvdv:do cdcmanggom buluk alakkv:dv:do torvgsutoma:ji. Bulu turkangku, odokkc Kristokc lcdulo lv:ying dv:takkopc migomdomvnto.

⁵Sinckvdv:dok akedc cdc lv:ying dv:takdc gvngapma:sisscm turtokumang. Cdcna turpongar pongkunamdc.

⁶Sc:kobv turpongar kunamdcm turmvnyckunc bv akirba:d pa:nc! Odokbulukkcmpinc tayc:do sitenkunam sinamdokkc ilang gvlangc kama:bong, cmpige:la bulu Ru:ncpvnckc odokkc Kristokc kumnam agerlok igur gvgurncpc ingapycku, odokkc bulu Bvk lcdulo lv:ying dv:takkopc migom domvnyc.

⁷Odokkc cdvlo cdc lv:ying dv:takdc gvngapka:ji,

⁸Satandcm bvk makana:dokkc mclennvgyc odokkc opvnkvdv:dcm yadkapc gvlenyc okodc:bulu mo:pvsok sungken appi:lo du:ji, cdcyam, Gogdc:lang Magogdc, mimag lcgangc bulum gogkumsuto; buluk kvnamdc bulu siycnglok sulli:kvddvko idagai.

⁹Odokkc bulu pontapaknc mo:pvso:pc yadlenamkang odokkc aipc kumnc tani:kvdv:dok yadkumsula dungkodcm yadrito odokkc cdc aipc mc:bomsunam nogordcm: cmpige:la taycngtokkc vmmc dc:yingkang odokkc bulum ugpakto,

¹⁰odokkc cdc uidc okodc bulum yattoji vmmclang gondog siycng pa:ta:do:pc cryi:lvgto okolo cdc simvndc:lang lume: lungor luncdc, odokkc bulum longgcm odokkc yummcm lo:dv longkvpc mogvtmomatto.

¹¹Odo ngo bottapaknc kamponc migom dungkoko odokkc odo sc:ko teddagji Bvm ka:to; Bvk kangkodokkc mo:pvsc odokkc do:mvrtc dc:pakkang, odokkc buluk lcgangc oko dungkomsin pa:tomang.

¹²Odokkc ngo adji:nclang bottcncm, sinckvdv:dcm ka:begto, migom tedko kcra:do, odokkc potinkvdv:dcm tamge:dopc. Potin borkonkoda tamge:to, okodc turnckvdv:dok potindc:ji. Odokkc cdc sinckvdv:dcm kcbangcm ba:to okodcm potindo attagji, okodcm bulu gerkaji.

¹³Odokkc siycngdc sinckvdv:dcm odok ara:do topakletto, Sinamclang Uiamongc buluk ara:do sinckvdv:dcm topakletto, odokkc okodcm bulu itoji appv:dcm kcbangcm ba:to.

¹⁴Odokkc Sinamclang Uiamongcm siycngcmpinc vmv pa:ta:lo crpaklvgto. Cdcna lckon sikunamdc cdc siycngcmpinc vmv pa:ta:dc;

¹⁵odokkc jodi akonkc amincm turnckvdv:dok potindo pa:tomang, bvm siycngcmpinc vmv pa:ta:do cryi:lvgto.