Read Mising LUNGOR LUNAM 22 Bible Online

LUNGOR LUNAM 22 - Mising bible

LUNGOR LUNAM 22

¹Odokkc Bv ngom turnamdok a:ncdok asidcm lcngkanto, arscmpc tong cmna lolatdag,

²Ru:ncpvnckc migom tedkodokkc odokkc cdc Awome:r sobendok dungkodokkc nogordok ali: lambcdok pongkokdokkc binncko; odokkcsin, a:nc kekon-kesagdo, cdc turnamdok vsv:dc odok vyvngkolang anyikopc angu angupc e:nc a:yckvdv:dc, odok a:yckvdv:dc po:lo po:lolo; odokkc vsv:dok a:yckvdv:dc opvnkvdv:dok csa:mokunam lcgangc.

³Odo oko pelvgnammcsin kama:ycbong, cmpige:la Ru:ncpvnckc migom dungkodc odokkc cdc Awome:r sobendc odo du:yc, odokkc Bvk ager gerya:nc kvdv:dc Bvm kumyc;

⁴bulu Bvk dumsimigmom ka:begycku, odokkc Bvk amindc buluk tuptakvdv:do du:ycku.

⁵Odokkc yummc cdvlosin kakuma:ycbong; bulu atv saki:lok pvangko cdcmanggom do:nyiko lagima:ycbong kapcnc Ru:tum Ru:ncpvncbv buluk pva:pc iycku, odokkc bulu lo:dv longkvpc migom doycku.

⁶Odokkc Bv ngom luto, “Sc agom kvdv:sc mc:jvgpcnamc odokkc arro. Odokkc Ru:tumbv, yalokvdv:dok odokkc lungor lunckvdv:dok Ru:ncpvncbv, Bvk ager gernckvdv:dcm okodc lomdanna lenpcru:nammcji lcngkanpc Bvk taycng among lutad lunckvdv:dcm mclvgtag.”

⁷Odokkc ka:toka, ngo lomdanna gvdokubong. “Sc:kobv sc potinsok lungor agom kvdv:dcm gagla du:ycnc bv akirba:d pa:nc!”

⁸Ngo Jo:nbv sc:kobv appv:scm tattoji odokkc ka:toji. Odokkc cdvlo ngo cdcmbulum tattoji odokkc ka:toji, ngo kumpc cmna taycng among lutad luncdok alcdo tunga:to sc:kobv ngom lcngkantoji;

⁹cmpige:la bv ngom luto, “No cdcmpc iyorungka! Ngo nok lcdulo ager gerjon akomvn odokkc nok lungor lunc bvrrang kvdv:dokki, odokkc cdc sc:kobulu sc potinsok agom kvdv:dcm gagla du:dagji. Ru:ncpvncmc kumtoka!”

¹⁰Odokkc bv ngom luto, “Sc potinsok lungor lunam agomkvdv:scm tubbjet tubkabla lc:yoka, kapcnc ayirdc anindanka:bong.

¹¹Aima:pc ager gernckvdv:dcm aima:nc agercm su:paksin gertvla du:po:motoka, odokkc narc:ma:ncdcm su:paksin narc:ma:po:motoka, odokkc dormokancdcm su:paksin dormo kanamcm ipo:motoka, odokkc angunncdcm su:paksin angun mopo:toka.”

¹²“Ka:toka, ngok palvgcm lvgkakupc, gvdokubong, okodcmci ikaji appvngcm bikakupc.

¹³Ngo Alpa:dc:lang cdc Omega:dc, cdc dungangarncdc odokkc du:tcrdc, cdc du:lenpo:ncdc odokkc du:tcrdc.”

¹⁴Cdc sc:kobulu migom gcnam attar kvdv:dcm nvpu:sula du:dagji bulu akirba:d pa:nc ja:te bulukkc turnam vsv:dokkcm pa:la:nam ilang gvlang pa:ycpc odokkc bulu nogordo:pc yabgokvdv:dok gva:laycpc.

¹⁵Mo:rongkc kvdv:dc iki: kvdv:dc odokkc morunc kvdv:dc odokkc ami nc:ng lango:nckvdv:dc odokkc monam moimang kumgo:nc kvdv:dc, odokkc appv:dc sc:kobulu lume:lunamc ludagji odokkc aipc mc:dagji cdcbulu.

¹⁶“Ngo Jisubv ngok taycng among lutad lunckvdv:dcm sc lukan lubinam kvdv:sokki nokkolo:pc Kristan mondoli:kvdv:dok lcgangc mclvgtung. Ngo appvrdc odokkc Dawidkolokkc sa:lennc oiyinnc, cdc ro: rokomlok unjernc takardc.”

¹⁷Cdc Yalodc:lang Magbodc luda, “Kajc Gvtoka.” Odokkc bvm sc:kobv taddagji “Kajc!” Lumotoka. Odokkc bvm sc:ko tv:lv:dagji gva:motoka, arc la:ma:pc sc:kobv mc:dagnc turnamdok asidcm tv:motoka.

¹⁸Ngo appvngcm sc:koi taddagnc lulomla lutaddung cdc sc Potinsokkcm lungor lunam agomkvdv:dcm: jodi akonc odobulu adtcmlvgyc, Ru:ncpvncbv bvm sc potinsok cdc joar kinam ramnam lukurla lungabbinam moke-momar kvdv:dcm — bitcmlvgyc,

¹⁹odokkc jodi akonc sc potinsok lungor lunamkvdv:dcm la:pakyc, Ru:ncpvncbv turnam vsv:dokkcm cdc angunnc nogordokkcm bvk pa:pcnamdcm la:pakyc, okodc:bulum sc potinso lukur lule:la adlenbitagji.

²⁰Sc:kobv sc agomkvdv:scm lukanna lubidagji ludag, “Aroru:pc ngo lomdanna gvdokubong” Amen. Gvtokuka, Ru:tum Jisua!

²¹Ru:tum Jisukc appvng aya:dc aipc kumnc tani:kvdv:do dungka:langka. Amen.