Read Mising LUNGOR LUNAM 5 Bible Online

LUNGOR LUNAM 5 - Mising bible

LUNGOR LUNAM 5

¹Odokkc ngo Bvk lagbvg alagdo sc:kobv migom tedkodo teddungaji yedla lc:nam potinko ara:do odokkc lamkudo adnamko ka:to, tubjednam kvnvdko tubjednamko;

²odokkc ngo kvnggv:pc lulang gvla:nc taycng among lutad luncko ka:begto bottapakpc bc:dopc lutad luncko, “Sc:kobv yedla lc:nam potindcm yedlenpc arc kadagji yedlentoka odokkc odok tubjetnam kvdv:dcm la:pagla:dang?”

³Odokkc sc:kosin taycngto cdcmanggom mo:pvso cdcmanggom among ara:bo yednam potindcm yedlenna:mang cdcmanggom cdcm pola:mang,

⁴odokkc ngo kvnggv:pc kapto jc sc:komsin arckadopc pa:tomang cdcmanggom cdcm pola:dopc.

⁵Odo abv:nc tani:kvdv:dok akonc ngom luto, “Kapyoka; ka:toka, Juda:kc opvndok Inggodc, Dawidkc Appvrdc, mopvto, odojen Bv yednam potindcm yedge:la:dopc odokkc kvnvd tubjet kvnvddcm.”

⁶Odokkc migom dungko pongkokdo odokkc cdc turnc simvn dorpi:dc odokkc abv:nc tani:kvdv:dok ara:do, ngo me:r soben Awoko dagla du:dopc ka:to, cdc palvgnammcmpc a:rcng pi:nyikokki odokkc amig kvnvdkokki, okokvdv:dc Ru:ncpvnckc yalo kvnvddc:ji mo:pv appv:so:pc mclvgamnamkvdv:dc.

⁷Odokkc Bv gvkang odokkc yednam potindcm Bvk lagbvg alagdokkcm la:to sc:kobv migom tedkodo tedla dungaji.

⁸Odokkc cdvlo Bv yednam potindcm la:toji, turnc simvn dorpi:dc odokkc cdc yv:nyikolang appi: abv:nc tani:kvdv:dc me:r soben Awodok kcra:do owangamkang, appv:dc be:lang asong asongko sola: sola, odokkc avn soriangkokki namponc dunganc bi:danna, okodc:bulu aipc kumnc tani:kvdv:dok kumnamcji;

⁹odokkc bulu scmpc lula: lula, anu ni:tomko moto: “No yednam potindcm bompc arc kannc odokkc odok tubjetnam kvdv:dcm mopenpc, Kapcnc nom palvgto odokkc nok i:dokki Ru:ncpvnckc lcgangc tani:kvdv:dcm mogvt momatnamlokkcm rcpvtnato appvng rcngamlokkc odokkc agom lunclokkc odokkc tani:kvdv:lokkc odokkc opvnnokkc.

¹⁰“Odokkc bulum migom doko amongkopc badmodag odokkc ngoluk Ru:ncpvnckcpc kumnam ager gernamlok bottarya:ncpc imodag, odokkc bulu mo:pvso migomdoyc.”

¹¹Odokkc ngo ka:to, odokkc migom dungkodok dunggong appv:do tadto odokkc turla du:nc simvnkvdv:dc odokkc abv:nc tani:kvdv:dc bojcrung taycng among lutad lunclok gomugcm, kvla kvngapla:ma:namkopc lv:lvng lv:lvngkopc odokkc lv:yinglok lv:yingkopc,

¹²scmpc bottapakpc lula: lula: “Me:r soben Awodc arc kadag okodcm palvgtoji, ilang-gvlangcm odokkc kanamsv:namcm odokkc kinnamcm odokkc torpc ila:nammcm odokkc mcnggcnammc odokkc amin gvnamclang akirba:d pa:pcnammc!”

¹³Odokkc ngo tadto appvng turnamc taycng amongto odokkc mo:pvso odokkc mo:pvkcvgbo odokkc siycng ara:lo, odokkc odok du:nc appvngdo, scmpc lula: lula: “Bvkkcpc sc:kobv migomtedkodo du:dagnc odokkc Me:r soben Awodokkc akirba:dc odokkc mcnggcnammc odokkc amin gvnamc odokkc ilang gvlangc lo:dv longkvpc dungka:langka!”

¹⁴Odokkc turnc simvn dorpi:dc:bulu luto, “Amen!” Odokkc abv:nc tani:kvdv:dc owangla kumto.