Read Mising LUNGOR LUNAM 8 Bible Online

LUNGOR LUNAM 8 - Mising bible

LUNGOR LUNAM 8

¹Cdvlo Me:r Awodc kvnvd tubjetdcm moge:toji, taycngtc gonta ayir kvdvsukokopc ngag cmna dungkang.

²Odo ngo kvnvd taycng among lutad lunckvdv:dcm ka:begto sc:kobulu Ru:ncpvnckc kcra:do dagla du:dagji, odokkc tu:lung kvnvdko bulum bitungai.

³Odokkc taycng lutad akonkonc gva:to odokkc avndunang romnanc ako bomna palvgkodo dagkang; odokkc bvm bojcrungko namponc dunangcm kumdodo molusudopc bitungai appvng aipc kumnc tani:kvdv:dcm avn palvgko tayc:dc migom dungko kcra:do;

⁴odokkc namponc dunangdok mikkidc aipc kumnckvdv:dok kumdodok lcdulo taycng among lutad luncdok alagdokkc Ru:ncpvnckc kcra:do:pc yv:sa:mvnkang.

⁵Odo taycng among lutad luncdc dunang romnamdcm la:to odokkc cdcm palvgkodokkcm vmmcm parrvgto odokkc cdcm mo:pvso:pc crpaglvgto; odokkc bc:bar bc:barla bc:nc gonta bc:bomkang, gomugcmbulum, ruadlok latkancm, odokkc tarcmo:ton tonnamc.

⁶Cdcmpinamc su:pak cdc taycng among lutad lunc kvnvddc sc:kobulukkc tu:lungc kvnvddc du:nc mutpc cmna mosv:sukang.

⁷Taycng among lutad lunc du:pongarncdc bvk tu:lu:dcm mullvgto, odokkc vlv:ta:ngc odokkc vmmc oledkang, i:kokki molusunamc okodc mo:pvso oledkaji, odokkc mo:pvsok atak tagumko ugpakto, odokkc vsvngkvdv:dok kcrcngc awumkopc ugpakto, odokkc appvng genc ncsincm ugpagamto.

⁸Akon taycng among lutad luncdc tu:lu:dcm mullvgto, odokkc kapcji bottcru:nc adi:koncmpc, vmmc ugbomnamko, siycngdo:pc crjv:lvgto;

⁹odokkc siycngdok intak awumkopc i:pc ingapkang sinckvdv:dok turra du:nc simvnkvdv:dok intak awumkopc sipakkang, odokkc siycng ollungkvdv:dok intak awumkopc omvgosvgkang.

¹⁰Taycng among lutad luncdc bvk tu:lu:dcm mullvgto, odokkc bottcru:nc takarko taycngtolokkc kcdledkang, to:rs mcrucmpc to:ledla, odokkc cdc a:nckvdv:dok intak awumko oledkang okkc asikvdv:dok jili:kvdv:do.

¹¹Cdc takardok amincm Tapum vsvng cmtungai. Asikvdv:dok intak awumkopc tapum vsv:pc batkang, odokkc tani:yc bojcrungko asidokki sikang, kapila:nc cdcm komoto.

¹²Appi: taycng among lutad luncdc bvk tu:lu:dcm mullvgto, odokkc do:nyidok intak awumko dcmto, odokkc po:lodok intak awumko, odokkc takarkvdv:do intak awumkopc, odomvlojen buluk pvang kvdv:dok intak awumkopc kcmokang; longcdok intak awumkopc pva:ma:dopc lc:to, odokkc cdcmv:pc yumckvdv:dok intak awumkopc.

¹³Odo ngo, go:nor pcttangkonc bottcru:pc bc:dopc kabnamko ka:to odokkc tadbegto, kapc cdc taycngtok pongkokto dcngo:la dungaji, “Mc:dvrc, mc:dvrc, cdc sc:kobulu mo:pvso du:do dagdoji, cdc ake tu:lung muddagdo okodcmbulum cdc taycng among lutad lunc awumdc mudpc cmna idu:ji!”