Read Mitla Zapotec Mateo 12 Bible Online

Mateo 12 - Mitla Zapotec bible

Mateo 12

¹Che sasaj Jesús nez loj reyuj cadro naga' triuu, luxh dxejga najc dxej ni rusilajz rexpejṉ Israel, calaan rexpejṉpacni, guslojreni calädxa'reni doj lo triuu te cayajwrenini.

²Che bahuii rebeṉ guidoo ni laa farisee, räjpreni loj Jesús: ―Ahuii xho rujn rexpejṉpaclu dzuun nani di nungäjḻ gunreni dxej nani rusilajz bejṉ.

³Luxh laani räjpni lojreni: ―¿La gajdtu goḻ xhi caj loj reguijtz xcuent ni bejn toDavid che gulannäjni rexpejṉni, ä?

⁴Biu'reni xquidoo Dios, gudajwreni yätxtiil nani di nungäjḻ gauni, nicla laani, niclaza rebejṉ nani sanäni, sa'csi yätxtiilga rebixhojztis rajwni.

⁵O ¿la gajdtu goḻ lo reguijtz xten leii cadro caj xcuent rebixhojz, ä? Laareni riu'reni neṉ reguidoo dxej ni rusilajz bejṉ, rujnreni xtzuunreni niluxh xhet dojḻdi rujnreni.

⁶Narä rniä lojtu, ree suga' tej nani sajcru loj guidooga.

⁷Paru niacbeetu xhi säloj dee: “Yäḻrulaslajz rlazä, xhet yäḻrejtdi guidxaa”, ditu nucuaquij redee ni xhet bejndi.

⁸Sa'csi narä Xi'n Dios ni gujc Niguii rnibeä dxej ni rusilajz rebejṉ. Niguii ni rxu'n ṉaani (Mr. 3:1‑6; Lc. 6:6‑11)

⁹Che birii Jesús ro'c, biu'ni te xquidobäzreni.

¹⁰Ro'c suga' te bejṉ ni gubijdz te ṉaani. Luxh sa'csi caguiilreni xho gucuaquijreni Jesús, gusloj canabdiidxreni lojni, räjpreni: ―¿La rusaan leii gusiajcni beṉracxhuu dxej ni rusilajz bejṉ, ä?

¹¹Badzu' Jesús diidxre lojreni, räjpni: ―Chutejtu ni rajp te xiil niluxh palga guitejbni neṉ bisie che gaḻ dxej ni rusilajz bejṉ, ¿xhixh dini cuää xiilga neṉ bisie, ä?

¹²Sacduxhru te bejṉ loj te xiil, ni'cni susaan leii gun bejṉ dzunsa'c dxej nani rusilajz bejṉ.

¹³Dxejcti räjpni loj dade'ga: ―Baslii ṉaalu. Che basliinini, dxejc biajc ṉaani, gujcni tebloj si'c najc stelaad ṉaani.

¹⁴Dxejcti birii rebeṉ guidoo ni laa farisee, bachagsa'zareni te bia'nreni diidx ju'treni Jesús. Diidx ni guniireni xcuent Jesús

¹⁵Che gucbee Jesús xhi xhigab cayujnreni, biriini ro'c. Xhidajl bejṉ sanajlni, dxejc basiajc Jesús guiraa rebeṉracxhuu.

¹⁶Dxejc räjpni lojreni: ―Na'cpac gäbreni chu najcni.

¹⁷Si'c gujc te gusojb diidx ni gunii Isaías ni gunii xtidx Dios che räjpni:

¹⁸Deeni najc xmosä nani aguleä, laani sanälazä, laani rbanälazä, sudedä sprit xtenä lojni te gusule'ni yäḻguxhtis xtenä lo guedxliuj.

¹⁹Dini tiḻnäj bejṉ, dizani cuedxa';rudza jiejndi diajgni xse'ni lad nezyuj.

²⁰Dini qui'ch nicla te nijt ni cabiejc,dizani gusuii te duxiil ni cayujn guxh,dxejli che gunni gaan guinibeeni yäḻguxhtis.

²¹Lajtisni sustioob lastoo rebeṉ ni digac xpejṉ Israel. Rucuaquijreni Jesús rajpni yäḻrnibee xten beṉdxab (Mr. 3:19‑30; Lc. 11:14‑23; 12:10)

²²Dxejcti biädnäreni loj Jesús te bejṉ ni di fii, dizani guinii, yu' te beṉdxab lastooni. Dxejcti basiajc Jesúsni, te gujc guniini, te gujcza bahuiini.

²³Guiraa rebejṉ bidxelojreni, räjpreni: ―¿Xhaa laa Xi'n toDavidni, ä?

²⁴Che biejn diajg rebeṉ guidoo ni laa farisee rediidxga, räjpreni: ―Bejṉre rbää rebeṉdxab con yäḻrnibee xten Beelzebú ni rnibee loj rebeṉdxab.

²⁵Che gucbee Jesús xhi xhigab cayujnreni, dxejc räjpni: ―Guiraa yäḻrnibee nani rlia' sa'ni sinitloj; te guedxro sigajc te famil nani rlia' sa'reni, nani ridiḻnäj sa'reni, sinitlojreni.

²⁶Sigajcza palga beṉdxab rbää sabeṉdxabni, silia' sa'reni, dxejc ¿xho gac chanuu xcäḻrnibeereni?

²⁷Palga narä rbää́ rebeṉdxab con yäḻrnibee xten Beelzebú, ¿chu xcäḻrnibee rajc rbää rexpejṉtu beṉdxab, ä? Ni'cni lagajc laareni suluiireni xhet laadi rujntu xhigab.

²⁸Palga narä rbää́ rebeṉdxab con Xprit xten Dios, guliipacni abidzujṉ xcäḻrnibee Dios lojtu.

²⁹’Bahuilaare. ¿Xho gac jiu' te bejṉ cuan rolijz te beṉdaan, xho gac cuanni xhixten bejṉga, palga dini gulibxgaani beṉdaanga? Che abiliib bejṉga, sajc cuanni rexhixten bejṉga.

³⁰’Nani xhet yu'di xladä, rdxe'chni loä. Nani di jiädnajl narä, rutie'chni reni siädnajl narä.

³¹’Ni'cni rniä guira'ti dojḻ, guira'ti yäḻrusguee xte bejṉ sajc gusiäjḻ lajzni xtebtis yäḻrniyaj Sprit Dxan xten Dios di Dios gusiäjḻ lajzni.

³²Chutis ni guinii xhi te diidx yäḻrniyaj Xi'n Dios ni gujc Niguii sajc gusiäjḻ lajzni, luxh chutis ni guiniyaj Sprit Dxan xten Dios, di Dios gusiäjḻ lajzni, nicla lo guedxliujre, niclaza xhaguibaa. Sajc gumbeetu bejṉ xcuent diidx ni rniireni (Lc. 6:43‑45)

³³’Palga nasa'c te yajg sicaj ninexhsa'c lojni, per che di yajg gac yagsa'c, xho xcaj ninexhsa'c lojni. Ni'cni huenliisi siembeetu te yajg che fiitu xho najc ninejxh ni rcaj lojni.

³⁴Sa' la'tu beṉguijdx ni najc si'c te bäḻ niälasduxh, ¿xho gac guiniitu te didxsa'c?, ni ro' bejṉ rniitis rexhigab ni yu' neṉ lastoo bejṉ.

³⁵Te beṉsa'c rniini didxsa'c, sa'csi ganax xhigabsa'c yu' neṉ lastooni, te beṉguijdx rniitisni cosguijdx sa'csi ganax xhigabguijdx yu' neṉ lastooni.

³⁶Narä rniäza, guiraa redidxguijdx nani rnii bejṉ sudeedreni cuent lo Dios cheni gunni yäḻguxhtis,

³⁷sa'csi lagajc rextiidxlu sujn guinii Dios najclu beṉsa'c, lagajc rextiidxlu sujn gunijtlu lo Dios. Rebeṉguijdx rniab te milagwr si'c te seen (Mr. 8:12; Lc. 11:29‑32)

³⁸Dxejcti rebejṉ ni ruluii xleii toMoisés näjza rebeṉ guidoo ni laa farisee, räjpreni loj Jesús: ―Mastr, nuurnu rlajznu guihuiinu te seen; bejn te milagwr te fiinuni.

³⁹Badzu' Jesús diidxre, räjpni: ―Rebeṉguijdx ni rusguee rniab te seen, niluxh xhetru seendi fiireni xseentis Jonás, dade' ni gunii xtidx Dios.

⁴⁰Sa'csi lagajc si'cni guyu' Jonás xque' te bälro choṉ dxej, choṉ yääl, si'cza chu Xi'n Dios ni gujc Niguii neṉ lastoo guedxliuj choṉ dxej, choṉza yääl.

⁴¹Cheni gac yäḻguxhtis xten Dios pet sistie rebejṉ ni siääd Nínive te fiireni gac yäḻguxhtis rebejṉ ni tre' lo guedxliuj ṉaj, niluxh säjb rebejṉ Nínive abanijt rebejṉre sa'csi rebeṉ Nínive basiejch lajzreni, bia xtojḻreni che basule' Jonás xtidx Dios lojreni. Luxh nani yu' lojtu ṉaj, sacduxhruni loj Jonás.

⁴²Näjza reiṉ xten rebeṉ sur sistieni te fiini gac yäḻguxhtis rebejṉ ni tre' lo guedxliujre ṉaj, niluxh näjzani säjbni abanijtreni. Sa'csi laani zitduxh biriini te biädcuadiajgni reyäḻnajn xten Salomón, luxh nani yu' lojtu ṉaj nanduxhruni loj Salomón. Te spritdxuudx ni rbisac (Lc. 11:24‑26)

⁴³Räjpzani: ―Cheni ṟii te spritdxab neṉ lastoo te bejṉ, ricanzajni nez lo reyubijdz, ritiilni cadro gusilajzni, per cad rdxäldini.

⁴⁴Dxejcti rujnni xhigab, naani, guibisacä cadro biriä. Cheni rbisacni ro'c, rdzujṉni si'c rdzujṉ te bejṉ neṉ te yu' ni naya neṉni, naliobsa'cni, sucheeni, luxh rut rbäjzdi ro'c.

⁴⁵Dxejcti rijni, rixiini sgajdz sprit nani najc nadxuudxru lojni te jiädläznäjrenini neṉ lastoo bejṉga. Dxejcti rxhiṉduxhru bejṉga lojni gujcni galoo. Sigajcza gac rebejṉ ni tre' lo guedxliujre ṉaj. Xnan Jesús con rebejtzni (Mr. 3:31‑35; Lc. 8:19‑21)

⁴⁶Laḻ ni caninäjni rebejṉ, bidzujṉ xnanni con rebejtzni, suga'reni rolä' rlajzreni guiniireni lojni.

⁴⁷Dxejcti biääd tej ni räjp loj Jesús: ―Xnanlu näjza rebejtzlu suga' rolä' rlajzreni guininäjreni luj.

⁴⁸Laani badzu'ni diidx lo bejṉga räjpni: ―¿Chuni'c najc xnanä? ¿Chuni'c najc rebetzä?

⁴⁹Dxejcti basgaani ṉaani nez loj rexpejṉpacni, räjpni: ―¡Redee najc xnanä redeeza najc rebetzä!

⁵⁰Chutis nani rujn si'cni rnibee Xtadä ni yu' xhaguibaa ni'c najc betzä, ni'c najc bisianä, ni'cza najc xnanä.