Read Mitla Zapotec Mateo 13 Bible Online

Mateo 13 - Mitla Zapotec bible

Mateo 13

¹Lagajc dxejga birii Jesús royu'ga, huicueni nez ro' nisdoo.

²Xhidalduxh bejṉ bire' cadro suga'ni, sas biu'ni neṉ te barcw, ro'c gurejni. Dxejcti rebejṉ gurej nez lo plaii.

³Dxejc gusloj caguluii Jesús con recuent, räjpni: ―Coḻcuadiajg. Birii te dade' ni rbe'c binij te cue'cni binij.

⁴Laḻ ni cabe'cni binij yu' binij ni bitejb gajxh nez ro' nesiuj, biääd remane' ni rutajt, sas gudajwreni binijga.

⁵Yu' binij ni bitejb nez neṉ reguij cadro guxii yu' yuj. Gulengajc binijga sa'csi direni nibej jiät neṉ yuj.

⁶Che birii gubijdx, bigoḻreni sa'csi xhetiza xlobaani, dxejc gubijdzni.

⁷Yu'za binij ni bitejb neṉ reguejch. Che guroob reguejchga, dini nusaan niroob regäjle', gubijdztireni.

⁸Guyu' binij ni gurej lo reyusa'c, ro'c gucduxhni. Yu' binij cuaj te gayuu, yu'za binij cuaj gayojṉni, yu'za ni cuaj gaḻbitzuuni loj cade tej binij ni gurej.

⁹Nani rsobdiajg diidx gucuadiajgni diidxre. Xhi pajr najc recuent xten Jesús (Mr. 4:10‑12; Lc. 8:9‑10)

¹⁰Dxejcti gubig rexpejṉpacni, gunabdiidx lojni, räjpreni: ―¿Xhicuent rusule'lu diidx loj rebejṉ con recuent?

¹¹Dxejcti badzu' Jesús diidx rajpni lojreni: ―Sacnäj Dios la'tu te gacbeetu recos xhiga'tz xten xcäḻrnibee Dios xhaguibaa, luxh laareni digacdi gacbeerenini.

¹²Chutis ni arajp yäḻracbee, sica'runi te gapruni yäḻracbee. Sas nani guxii rajp yäḻracbee, guiraa yäḻracbee ni rajpni sibicaj.

¹³Ni'cni rniä lojreni con recuent sa'csi mase cadxelojreni, direni fii, mase cacuadiajgreni di diajgreni jiejn, xhet racbeedireni.

¹⁴Laareni najcreni si'c te soob diidx ni gunii Isaías, dade' ni gunii xtidx Dios, che räjpni:Siejn diajgpactu, niluxh xhetliidi gacbeetu,sidxelojpactu, niluxh ditu fii.

¹⁵Sa'csi guyalajz rebejṉre, lastooreni najc si'c te guij,di diajgreni jiejn,luxh niäuza balojreni, didi fisa'creni con balojreni,didi jiejnza diajgreni, didi gacbeeza lastooreni,didi gusiejch lajzreni guibi'reni loä te gusiacä lastooreni.

¹⁶’La'tu coḻguibalaznäj balojtu sa'csi rhuisa'ctu, riensa'cza diajgtu.

¹⁷Rniliä́pac, xhidajl redade' ni gunii xtidx Dios, näjza xhidajl beṉsa'c rlazduxh nuhuii sa' recos ni cahuiitu, luxh direni nuhuiini, rlajzreni niejn diajgreni sa' rediidx nani cayejn diajgtu, luxh di diajgreni niejnni. Rusule' Jesús xcuent bejṉ ni rbe'c binij (Mr. 4:13‑20; Lc. 8:11‑15)

¹⁸’Coḻcuadiajg xhi säloj xcuent bejṉ nani rbe'c binij.

¹⁹Rebejṉ nani rucuadiajg diidx xten xcäḻrnibee Dios, niluxh direni gacbeeni, najcreni si'c najc binij nani bitejb nez ro' nesyuj; riääd beṉdxab rudzucajni rediidx nani biu' neṉ lastooni.

²⁰Rebinij nani bitejb nez neṉ reguij, najc si'c rebejṉ nani rucuadiajg diidx, gustli rca'reni diidxga,

²¹luxh guxii yu' xlobaani, direni sutijp. Che rdejdreni trabajw, che rdxe'ch bejṉ lojreni, sa'csi rucuadiajgreni xtidx Dios, rusiejch lajzreni, rbälazni diidxga.

²²Rebinij nani gurej neṉ reyaguejch säloj rebejṉ nani rucuadiajg rextidx Dios rujnrureni te gunreni dzuun te ga'preni yäḻnasa'c ni yu' lo guedxliujre. Dxejcti rexcäḻnasa'c xten guedxliujre rusgueereni. Guiraa recosre rutau lo xtidx Dios neṉ lastoo rebejṉre, dini gusaan gac te cosechsa'c neṉ lastoo rebejṉre.

²³Dxejc rebinij nani rtejb lo reyusa'c, ni'c najc si'c rebejṉ nani rucuadiajg xtidx Dios, nani racbee diidxga, nani rutie'ru sa'reni te racxhidajlreni. Yu' bejṉ ni najc si'c binij ni gujc te gayuu; yu' bejṉ ni najc si'c binij ni gujc gayojṉ; yu'za bejṉ ni najc si'c binij ni gujc gaḻbitzuu. Xcuent triuu cadro guyu' cuanguejch

²⁴Dxejc bij Jesús stee cuent, räjpni: ―Xcäḻrnibee Dios xhaguibaa najc si'c te bejṉ nani gule'c ganax triusa'c lo xyujni.

²⁵Laḻ nagaguejs bejṉga, biääd te bejṉ nani rdxe'ch lajz loj xpaxhuaan binijga, biädle'cni bedz cuanguejch lo xtriuu bejṉga, dxejcti sääni.

²⁶Cheni gulejn triuuga, birii doj lojni, dxejc biricaj näjza cuanguejch ro'c.

²⁷Dxejcti räjp remos lo xḻam̲reni; “Dad, ¿la et ganax triusa'c di gule'clu, ä? ¿Caxh bazaj cuanguejchre?”

²⁸Räjp xlam̲reni: “Te bejṉ ni rdxechlajz loä biädle'cchani.” Dxejcti gunabdiidx rexmosni räjpreni: “¿La rlajz guejblu cholädxa'nu recuanguejchga, ä?”

²⁹Dxejc räjp xlam̲reni: “Na'c, sa'csi che guiliäädxtu cuanguejchga, nägajcza triuu guiliäädxtu.

³⁰Coḻsaan tioobreni tebloj. Che guire' cose'ch, dxejc guinibeä remos gutiexgaareni cuanguejch, guliibrenini gacni ters, dxejcti checni. Dxejcti sajc gutie'reni triuu chucheeni neṉ yu'.” Xcuent bedz muxhtas (Mr. 4:30‑32; Lc. 13:18‑19)

³¹Bijza Jesús stee cuent räjpni: ―Xcäḻrnibee Dios xhaguibaa najcni si'c te bedz muxhtas nani cue'c te bejṉ lo xyujni.

³²Gulii bejdzga najc bäze'ru loj guiraa rebejdz, per che roob yajgga, rajcni guroobru loj guiralii recuaan, rajcni te yagro, luxh riääd remane' ni rutajt riädyujn xpitiääzreni lo xajcw yajgga. Xcuent levaduur (Lc. 13:20‑21)

³³Bijzani stee cuentre, räjpni: ―Xcäḻrnibee Dios xhaguibaa najc si'c levaduur nani rugu'ch te gunaa lo choṉ mediid ariṉ, dxejc ni'c rusaguijni guideb cojbga. Xhicuent baluii Jesús ganaxtis con cuent (Mr. 4:33‑34)

³⁴Baluii Jesús guiraa rebejṉ ganaxtis con recuent, xhetiru stee mood nuluiini, ganaxtis con cuent guniini lojreni.

³⁵Si'c bejnni te guzojb xtidx dade' ni gunii xtidx Dios che bacuaani lo reguijtz, räjpni:Suiyä diidx con recuent,suiyä diidx xcuent recos ni naga'tz che bencheeli Dios guedxliuj. Rusule' Jesús xcuent cuanguejch neṉ triuu

³⁶Dxejcti basadiidx Jesús rebejṉ, biu'tini neṉ yu' cadro bire' rexpejṉpacni lojni, räjpreni lojni: ―Basule' loonu xcuent cuanguejch ni guyu' loniaa.

³⁷Räjp Jesús lojreni: ―Bejṉ nani rbe'c retriusa'c, najc Xi'n Dios ni gujc Niguii;

³⁸loniaaga najc guedxliuj; retriusa'c najc rebejṉ nani najc xpejṉ Dios, nani rucuadiajg xtiidxni; recuanguejchga najc rebejṉ ni najc xpejṉ beṉdxab.

³⁹Bejṉ nani rdxe'ch lajz najc lagajc beṉdxab. Cose'ch säloj che nitloj guedxliuj; reni gutie' cose'ch najc rexangl Dios.

⁴⁰Sigacni guire' recuanguejch te chääni lo guiboo te checni, sigajcza gac che gac fis guedxliuj.

⁴¹Xi'n Dios ni gujc Niguii suxhaḻ rexanglni te jiädgutie'reni, te jiädlääreni lo xcäḻrnibeeni guiraa renani rujn riajb bejṉ neṉ dojḻ, näjza reni rujn cosguijdx.

⁴²Susäḻreni rebejṉga neṉ te oṟ cadro cayecduxh. Ro'c sonduxhreni, sauya'reni läijyreni.

⁴³Dxejcti rebeṉsa'c sidimbicha'reni si'c gubijdx lo xcäḻrnibee Xtadreni. Palga sobdiajgtu, coḻgucuadiagsa'c. Te cossacduxh ni naga'tz

⁴⁴Räjpzani: ―Si'cza xcäḻrnibee Dios xhaguibaa najc si'c te cossacduxh ni naga'tz lo te yuj loniaa. Bidxäl te dade'ni, luxh bacuatzsacnini. Dxejcti rbalajzni, huijni, huito'ni guiraa xhixtenni te rajpni meel siini yujga. Perl nani sacduxh

⁴⁵Räjpzani: ―Xcäḻrnibee Dios xhaguibaa najcza si'c najc te dad rapduxh nani caguiil perlsa'c te siini.

⁴⁶Che bidxälni te perlsa'c, tejni sacduxh, bato'ni guiraa xhixtenni te gusiini perlga. Guijxh ni rniaaz bäjl

⁴⁷Räjpzani: ―Xcäḻrnibee Dios xhaguibaa najcza si'c te guijxh ni rusäḻ bejṉ lo nis te rniaazreni guiraloj cuaa bäjl.

⁴⁸Cheni agudxajni, rbäärenini nez ro' nisdoo, te ro'c rbereni loj rebäjl. Rebäjl ni najc hueen rucheeni neṉ te dxijm̲; nani di gac hueen rusäḻrenini te laad.

⁴⁹Si'cza gac che gac fis guedxliuj; sirii rexangl Dios te sudzucajreni rebeṉguijdx lo rebeṉsa'c.

⁵⁰Dxejcti susäḻreni rebeṉguijdx neṉ te oṟ cadro cayecduxh; ro'c sonduxhreni, sauya'reni läjyreni. Te beṉ rajp

⁵¹Dxejcti gunabdiidx Jesús lojreni, räjpni: ―¿La racbeetu guiraa ni caniä lojtu, ä? Dxejcti räjpreni: ―O', racbeenuni Dad.

⁵²Dxejcti räjpni lojreni: ―Cheni rsieed te bejṉ nani najn leii xcuent yäḻrnibee xten Dios xhaguibaa, najcni si'c te lam̲ nani rajc rbää lo rexcäḻnasa'cni recos ni nacoob, näjza recos biejw. Jesús lo guedx Nazare't (Mr. 6:1‑6; Lc. 4:16‑30)

⁵³Che gulujx basule'ni recuentre, biriini ro'c, sääni.

⁵⁴Huijni lagajc lajdxni. Ro'c gusloj caguluiini neṉ xquidobäzreni ro'c. Dxejcti rdxeloduxh rebeṉ ro'c, räjpreni: ―¿Caro bisieedni reyäḻnajnre? ¿Xho rajc rujnni remilagwr?

⁵⁵¿La et laadi dee ni najc xi'n carpinteer, ä? ¿La et Mariidi najc xnanni? Dee ni najc bejtz Jacoob, José, Simón con Judas.

⁵⁶Luxh rebisiajnni rbäjzreni lo guejdxre. ¿Cacharo bisieedni guiraa nani caguluiini?

⁵⁷Dxejcti cayujnreni xhigab chugan la guliini, dxejc räjp Jesús lojreni: ―Guiraa rebejṉ rinälajz te niguii nani rnii xtidx Dios, biädla rebeṉ lajdxpacni direni jiu xtiidxni.

⁵⁸Ni'c dini niujn xhidal milagwr ro'c sa'csi direni chalilajz xtiidxni.