Read Mitla Zapotec Mateo 15 Bible Online

Mateo 15 - Mitla Zapotec bible

Mateo 15

¹Dxejcti gubig gaii rebejṉ nani ruluii leii näjza rebejṉ guidoo ni laa farisee. Siäädreni guedx Jerusalén, räjpreni loj Jesús:

²―¿Xhicuent di rexpejṉpaclu jiu xcostrumbr rebeṉgool? ¿Xhicuent direni gusoob yäḻrdiib ṉaareni che rajwreni?

³Badzu'ni diidx, räjpni: ―¿Xhicuent di la'tu gusoobzatu xtidx Dios? Dee alga riurutu rexcostumbrtu.

⁴Dios gunibeeni xho guntu che räjpni: “Gojp xpala'n xtadlu, xnanlu”, näjza “Nani guiniyaj lo xtadni o loj xnanni, suguetni.”

⁵Luxh la'tu rniitu sajc gäb chutis bejṉ loj xtadni o loj xnanni: “Digacdi gacnää́tu sa'csi guiraa ni rapä abadedäni lo Dios.”

⁶Luxh chutis ni guinii si'c, xhetru nanabdi gacnäjni xtadni o xnani. Si'c ni cabälaztu rextidx Dios te gac chanuutu rexcostumbrtu.

⁷¡Bejṉ ni rusguee najctu! Laaca gunii Isaías, bejṉ nani gunii xtidx Dios xcuenttu cheni räjpni:

⁸Rebeṉguejdxre con ro'reni rliä'preni xpala'nä niluxh lastooreni zijt suga' nez loä.

⁹Xlia'si rajṉreni narä, sa'csi ruluiireni si'c xtidxä reyäḻrnibee xten rebeṉ guedxliuj.

¹⁰Dxejcti gurejdxni rebejṉ, räjpni lojreni: ―Coḻcuadiajg, coḻyacbee.

¹¹Nani riu' ro' bejṉ di guxhiṉ bejṉga, sanga nani ṟii ro' bejṉga ni'cni ruxhiṉ bejṉga.

¹²Dxejcti rexpejṉpacni gubig lojni, räjpreni: ―¿La najnlu bidxe'ch rebejṉ farisee che biejn diajgreni diidx ni guniilu?

¹³Dxejc laani räjpni: ―Xhitis yajg nani di Xtadä ni yu' xhaguibaa nusuj siliädxa'ni guideb xlobaani.

¹⁴Coḻgusaanreni; lotiä'preni, ruluiireni nezyuj lo salotiä'preni. Luxh palga te beṉ lotiä'p guluii canejz chää stee lotiä'p, guiro'preni sitejbreni neṉ te gueed.

¹⁵Räjp Pedr loj Jesús: ―Basule' cuentre loonu.

¹⁶Räjp Jesús: ―¿La näjza la'tu ditu gacbee, ä?

¹⁷¿La ditu gacbee guiraa ni rajw bejṉ ru' xque'ni, dxejcti che rdejdni xque'ni, abigo'ṉni?

¹⁸Niluxh diidx nani ṟii ro' bejṉ, neṉ lastoo bejṉ ṟiini; dee ni ruxhiṉ bejṉ.

¹⁹Sa'csi neṉ lastoo bejṉ ṟii rexhigabguijdx xten rebejṉ ni rugu't sa'ni; xten rebejṉ ni rusguee gunaa; xten rebejṉ ni rusguee chääl sa'ni; xten rebejṉ ni rbajn; xten rebejṉ ni rnii didxxhii lo sa'ni; xtenza rebejṉ ni rutijḻ sa'ni.

²⁰Laa sa' recosre ni ruxhiṉ bejṉ. Che dini gusoob recostumbr xte yäḻrdiib ṉaani, di ni'c guxhiṉ bejṉ. Te gunazit nani huililajz xtidx Jesús (Mr. 7:24‑30)

²¹Biriiti Jesús ro'c, sääni nez región xten Tiro näjza Sidón.

²²Nejzga rbäjz te gunaa cananee, cabedxa'ni biäädni lo Jesús, räjpni: ―Dad, xi'n toDavid, balaslajz narä. Xindxa'pä yu' xpej beṉdxab lastooni, niluxh cagusacsíduxhnini.

²³Xhet räjpdi Jesús lojni. Dxejcti biädnabduxh rexpejṉpacni lojni, räjpreni: ―Barilaagw gunaare, didi rbedxa'ni siädnajlni luj.

²⁴Dxejcti räjp Jesús lojni: ―Dios baxhaḻ narä lojtis xpeṉ Israel nani agunijt neṉ dojḻ.

²⁵Dxejcti gubig gunaaga, bazuxhijbni nez loj Jesús, räjpni: ―Dad, gucnäj narä.

²⁶Dxejc räjp Jesús lojni: ―Di gac hueen xca' bejṉ xcuxtiil rexi'nni gusäḻnini lo rebä'cw.

²⁷Dxejc räjp gunaaga lojni: ―Guliini Dad, näjza rebä'cw rajw te la' yätxtiil ni rtejb lo mex xten xpaxhuaanni.

²⁸Dxejcti räjp Jesús lojni: ―Nane', lacti guroob najc xcäḻrililajzlu. Sugac si'cni rlajzlu. Lagajc dxejc biajc xindxa'pni. Basiajc Jesús xhidal beṉ racxhuu

²⁹Birii Jesús ro'c gudejdni nez ro' nisdoo ni laa Galilee. Huäpgajcni yejc te dajn, ro'c gurejni.

³⁰Xhidajl bejṉ bidzujṉ cad sobga'ni. Siädnäreni rebeṉ ni rajc ni'ni, rebeṉ ni najc lotiä'p, rebeṉ gop, rebeṉ ni xheti ṉaani, näjza xhidalro beṉ racxhuu, bidzuṉnäjrenini nez loj Jesús. Dxejcti basiajcnireni.

³¹Ni'cni lacti bidxeloduxh rebeṉ xhidajlga che bahuiireni rnii regop, riajc reni xheti ṉaani, rsiaj reni rajc ni'ni, ruhuii relotiä'p, dxejc rliä'preni xpala'n Xtios rexpeṉ Israel. Badeed Jesús xhi gudajw tajp miḻ bejṉ (Mr. 8:1‑10)

³²Gurejdx Jesús rexpejṉpacni räjpni lojreni: ―Riaä́ rebejṉre sa'csi agujc choṉ dxej yunäjreni narä luxh xhet ca'direni gaureni. Di rlazä guxhaḻäreni jiireni rolijzreni palga gajdreni gau didi guidxajgreni lo nezyuj.

³³Dxejcti räjp rexpejṉpacni lojni: ―¿Xho guidxälnu xhi gau rebeṉ xhidajlre nez lo reyubijzre cadro rut rbäjzdi, ä?

³⁴Räjp Jesús lojreni: ―¿Bal yätxtiil ca'tu? Räjpreni: ―Gajdztisni, näjza gaii bälbäze'.

³⁵Sas gunibee Jesús cue rebejṉ lo yuj.

³⁶Dxejc cua' Jesús guigajdz yätxtiilga näjza rebäjl, badeedni xquixtios lo Dios dxejc gula'ni reyätxtiilga näjza rebäjlga badeednireni loj rexpejṉpacni. Dxejcti laareni gudisreni yätxtiilga con rebäjlga lo rebejṉ xhidajlga.

³⁷Guiraareni gudajw, gudxaj xque'reni. Che gulujx gudajwreni, batie'reni reyätxtiil ni bia'nga, gudxaj gajdz dxijm̲ni.

³⁸Renani gudajwga najc si'cti tajp miḻ bejṉ, niluxh xhet näjdi regunaa niclaza rebiuux bigab.

³⁹Dxejcti basadiidx Jesús rebejṉ, biu'tini neṉ barcw te gudejdni lo nisdoo nez región xten Magdala.