Read Mitla Zapotec Mateo 17 Bible Online

Mateo 17 - Mitla Zapotec bible

Mateo 17

¹Che gudeed xho'p dxej, huinä Jesús Pedr, Jacoob, con Juan betz Jacoob, xtebreni huijreni jiaa yejc te dajn.

²Dxejcti nez lojreni bidxaa xho rujn lojni. Lojni gusloj rdimbicha' si'c gubijdx; xhajbni gujc nolbäj si'c te bajl.

³Dxejc bahuigajcreni loj Moisés näjza loj Elías, cayujyreni diidx con Jesús.

⁴Dxejcti räjp Pedr loj Jesús: ―Dad, ¡huenduxh suga'nu ree! Palga rlajzlu, sajc jiennu choṉ yuguijxh, tejni gac xten guejblu, steeni gac xten Moisés, steeni gac xten Elías.

⁵Laḻni canii Pedr, biäjt te za ni rdimbicha' guideb gabireni; neṉ zaga biejn te xse' ni räjp: ―Dee najc xi'nä ni sanälazä, ruspaduxhni lazä, coḻcuadiajg xtiidxni.

⁶Che biejn diajg rexpejṉpac Jesús diidxga, bazuxhijbreni, basajbreni lojreni lo yuj, bidxebduxhreni.

⁷Dxejcti gubig Jesús lojreni, batzuubni ṉaani yejcreni, räjpni: ―Coḻchasulii, na'c rdxejbtu.

⁸Che guläs lojreni, lojtis Jesús bahuiireni, rutru suganäjdini.

⁹Cheni sayäjtreni yejc dajnga, gunibee Jesús lojreni, räjpni: ―Rutlojdi gäbtu xhini'c bahuiitu dxejli ni guibaṉsacä narä Xi'n Dios ni gujc Niguii lo rebeṉgut.

¹⁰Dxejcti gunabdiidx rexpejṉpacni lojni: ―¿Xhicuent rnii rebejṉ ni najn xleii Moisés ganid Elías nanab jiääd, ä?

¹¹Badzu' Jesús diidxre, räjpni: ―Guliini siädxgaa Elías, laani gunsa'cni guira'ti,

¹²niluxh narä rniä lojtu, abiääd Elías, di rebejṉ nienbeeni, luxh bennäjrenini si'ctis ni rlajzreni, basacsíduxhrenini. Sigajcza gunnäjreni narä Xi'n Dios ni gujc Niguii, susacsíduxhreni narä.

¹³Dxejcti gucbee rexpejṉpacni caniini xcuent Juan Bautist. Jesús basiajc te biuux ni guyu' xpej beṉdxab (Mr. 9:14‑29; Lc. 9:37‑43)

¹⁴Cheni bidzujṉreni cadro tre' xhidajl bejṉ, gubig te bejṉ lojni bazuxhijbni, dxejc räjpni:

¹⁵―Dad, balaslajz xinä sa'csi laani cayacxhuuni, rajcni yäḻguidxbej, rusacsíduxh yäḻguijdxgani, yu' huält rtejbni lo guiboo yu' huält rtejbni lo nis.

¹⁶Biädnää́ni loj rexpejṉpaclu, luxh di niajcdi nusiajcrenini.

¹⁷Jesús badzu' diidxre lojreni räjpni: ―Beṉguijdx, bejṉ ni di chalilajz, ¿gucli yu'ä lojtu? ¿Cati gac gunä huant la'tu? ¡Coḻtanä biuuxga ree!

¹⁸Dxejcti gudiḻnäj Jesús beṉdxab ni yu' lastoo biuuxga, gunibeeni biriini, lagajc dxejc biajc biuuxga.

¹⁹Dxejc guninäj rexpejṉpacni Jesús te laad, gunabdiidxreni räjpreni: ―¿Xhicuent di niajcdi nibäänu beṉdxab neṉ lastoo biuuxga?

²⁰Jesús räjp lojreni: ―Sa'csi la'tu guxiduxh rililajztu. Rniliä́ lojtu, paru najc yäḻrililajz xtentu si'cti te bejdz muxhtas, sajc gäbtu loj dajn rec: “Gubicaj ro'c, gudejd stelaad”, luxh sibicaj dajnga. Palga rililajzpactu, xhetliidi yu' ni di gacdi guntu.

²¹Niluxh sa' beṉdxabre, dini guirii palga ditu guiniabduxh lo Dios, gucua'nzatu. Jesús rusule' stehuält xho guetni (Mr. 9:30‑32; Lc. 9:43‑45)

²²Laḻni sasajreni nez región xten Galilee, räjp Jesús: ―Suteedreni narä Xi'n Dios ni gujc Niguii ladzṉaa rebeṉdojḻ te gusacsíreni narä.

²³Niluxh sugu'treni narä, dxejc ni riojṉ dxej sibaṉsacä lo rebeṉgut. Che biejn diajgreni diidxga, guc-huinduxh lajzreni. Gudijxni impuest xten guidoo

²⁴Che bidzujṉ Jesús näjza rexpejṉpacni guedx Capernaum, biääd rebejṉ ni rusquijx xcuent guidoo lo Pedr, gunabdiidxreni lojni, räjpreni: ―¿La di xmastrtu quiix impuest xten guidoo?

²⁵Räjp Pedr: ―Rguijxnini. Che biu' Pedr neṉ yu', ganid Jesús gunii lojni, räjpni: ―¿Xhi rchalolu, Simón? ¿Chuni'c rusquijx rebejṉ ni rnibee lo guedxliujre? ¿Chuni'c rguijx reimpuest, recuyo't? ¿Rebeṉ lajdxreni o rebeṉzijt?

²⁶Badzu' Pedr diidxre räjpni: ―Rebeṉzijt. Räjp Jesús: ―Ni'cni di rexi'nreni quiixni.

²⁷Luxh te di guidxe'chreni, huij ro' nisdoo, bacuaa ansuel, gulää bäjl ni guiniazxgaalu. Ro' bäjlga sidxällu te melpla't ni sajl te chatijxlu impuest xcuentä näjza xcuentlu.