Read Mitla Zapotec Mateo 18 Bible Online

Mateo 18 - Mitla Zapotec bible

Mateo 18

¹Laa dxejcni gubig rexpejṉpac Jesús lojni te gunabdiidxreni: ―¿Chuni'c sajcru lajdx Dios xhaguibaa?

²Dxejcti gurejdx Jesús te biuxbäz, bazujnini nez galäiireni,

³dxejc räjpni: ―Rniliä́pac lojtu, palga ditu gusiechlajztu, palga ditu gac nadolajz si'c te biuxbäz, ditu jiu' lajdx Dios xhaguibaa.

⁴Ni'cni chutis bejṉ nani gac nadolajz si'c biuxe're, laani gac ni sajcru lajdx Dios xhaguibaa.

⁵Chutis ni riu te sa' biuxe're, sa'csi rinälajzni narä, lagajc narä riuni. Riezgw jiajbni neṉ dojḻ (Mr. 9:42‑48; Lc. 17:1‑2)

⁶Räjpzani: ―Chutis ni gudzucaj lo xnezyuä te sa' biuxe're ni ahuililajzni xtidxä, maazru huen niliib te guij xten molin dojb yejnni, chatejbni loj nisdoo, palga gunni jiajb tej reni'c lo dojḻ.

⁷Proobza guedxliuj sa'csi yuduxh xhigabguijdx lojni. Sa'csi nanabpac chu xhigabguijdx. Gunatiro, bejṉ ni ruzobloj rexhigabguijdxre, ni rujn riajbza lo dojḻ reni rililajz xtidxä, ni najc si'c biuxe're.

⁸’Palga ni'lu o ṉaalu gun jiajblu lo dojḻ, batiu'ni. Hueenru jiu'lu lo xcäḻnabajṉ Dios nitiujnglu o ṉatiujnglu lacuaa jiilu con guiro'p ni'lu o guiro'p ṉaalu lo balduxh ni rejc par tejpas.

⁹Palga te balojlu rujn riajblu lo dojḻ, gulääni. Hueenru jiu'lu lo xcäḻrnibee Dios najclu lotiä'p lacuaa chu guiro'p baloj chazäḻreni luj lo balduxh ni rejc par tejpas. Xcuent xiil ni gunijt (Lc. 15:3‑7)

¹⁰Räjpza Jesús lojreni: ―Coḻnatiro, andi cuälaztu rebejṉ ni najc si'c biuxbäzre ni sasaj lo xnez Dios, sa'csi rexangl Dios ni cahuiireni, guiraatis dxej yu'reni loj Dios.

¹¹Sa'csi Xi'n Dios ni gujc Niguii biääd te gusḻaani rebejṉ nani agunijt neṉ dojḻ.

¹²Räjpzani: ―¿Xho rhuiitu? Palga rajp te bejṉ te gayuu xiil, dxejc nit tejni, ¿laa dini gusaan stabitzubigaaga ni yu' neṉ gurajl te chatiilni xile' ni gunijt, ä?

¹³Luxh palga guidxälni xile'ga, rniliä lojtu, sibalazduxhruni xcuent xile'ga luxh guxiiru guibanäj lajzni xcuent rexiil nani di ninijt.

¹⁴Sigajcza Xtadnu ni yu' xhaguibaa di rlajz nit lo Dios nicla tej reni ahuililajz xtiidxni, ni najc si'c biuxbäzre. Xho gunnäjlu bejtzlu (Lc. 17:3)

¹⁵Räjpzani: ―Palga gun bejtzlu te cosguijdx lojlu, guninäjni xtebtislu, gojs lojni xhi dojḻ bejnni lojlu. Palga saru gucuadiajgni xtiidxlu, abiäjḻ lajztu.

¹⁶Palga naaddini gucuadiajgni, dini jiu xtiidxlu, dxejc huinä stee o stio'p bejṉ chaninäjluni, te guiraa ni guiniitu jiejn diajg rebejṉga, te arajplu tio'p o choṉ testiigw.

¹⁷Palga di bejtzlu gucuadiajg xtidx rebejṉga, luxh dizani jiu xtiidxreni, neṉ guidoo huile'c xquejlu loj rebejṉ ni ricuadiajg xtidx Dios. Palga dizani jiu rebeṉ guidoo, sugacni nez lojlu si'c te beṉguijdx ni di gumbee xtidx Dios o si'c rebejṉ nani rusquijx loj rebejṉ nani ruto'.

¹⁸’Ni'cni rniliä́pac lojtu, guiraa yäḻguxhtis xten bejṉ ni di gusiechlajz xtojḻreni ni guntu lo guedxliuj, si'c jia'nni xhaguibaa; guiraa redojḻ nani gusiäjḻ lajztu lo guedxliuj sa'csi basiechlajz beṉdojḻga, si'cza jia'nni xhaguibaa.

¹⁹’Sigajcza rniä lojtu, palga tio'ptu tejsi xhigab guntu xhini'c guiniabtu lo Dios, che guiniabtuni lo Dios, Xtadä ni yu' xhaguibaa suniidxni ni rniabtu lojni.

²⁰Sa'csi cadrotis nadxagsa' tio'p o choṉ bejṉ sa'csi rinälajzreni narä, anasuga'ä galäii rebejṉga.

²¹Dxejcti gubig Pedr loj Jesús, gunabdiidxni: ―Dad, ¿palga gunijt betzä loä, bal huält nanab gusiäjḻ lazä? ¿La sajl gajdzli huält, ä?

²²Badzu' Jesús diidxre lojni räjpni: ―Dina guiniä gajdztis huält, rniä gayoṉbidzuu huält, nalajznu si'ctiza huält basiäjḻ lajzlu. Xcuent tio'p bejṉ ni nazääb meel

²³’Xcäḻrnibee Dios xhaguibaa najc si'c te ṟeii ni rlajz gunni cuent lac nazääb rexmosni lojni.

²⁴Agusloj cayujnni xcuentni chela bidzuṉnäjreni te mos ni nazääb balti mil lojni.

²⁵Luxh mosre xhet rajpdini te quiixni rexti'nni, ni'c gunibee ṟeii guido'ni si'c sclav, näjza chäälni, näjza rexi'nni, nägajcza guiralii xhixtenni, te gaxh xti'nni.

²⁶Dxejcti mosga bazuxhijbni loj xlam̲ni, gunabduxhni lojni, räjpni: “Guläzsijc tiop-choṉ dxej, Dad, te gac quixä xti'nä.”

²⁷Dxejcti lam̲ga balazlajzni xmosni, badzucajni guiraa ni nazääb mosga lojni, basḻaanini.

²⁸Cheni birii mosga rolijz xlam̲ni, bidxaagni stee samosni ni nazääb bale'si beex lojni. Gunaaznini, baxhiya'ni yejnni, dxejc räjpni: “Gudijxga ni nazääblu loä.”

²⁹Dxejcti ste mosga bazuxhijbni lojni, räjpni: “Guläzsijc. Siguixäca guiraa ni nazäbä lojlu.”

³⁰Luxh steega naaddini, alga huisäugacni samosni neṉ latzguiib te bejnni gaan gudijxni guiraa ni nazääbni.

³¹Cheni bahuii sgaii mos xhini'c bejnni, gucnaduxhlajzreni, huiye'tzreni lo xlam̲reni xhi huiyejnni.

³²Dxejcti gurejdx xlam̲reni mosga, räjpni lojni: “¡Mos guijdx! Narä badzucaä di'n ni nazääblu loä, sa'csi gunabduxhlu loä.

³³Si'cza niunnäjlu sa'lu, nulazlajzluni sigajc ni balazlazälu.”

³⁴Sas lacti bidxechduxh lam̲ga, gunibeeni biäuuni te gudijxni guiragajc ni nazääbni lo xlam̲ni.

³⁵Baluux Jesús cuentga, räjpni: ―Sigajcza gunnäj Xtadä ni yu' xhaguibaa guiraa rebejṉ ni di gusiäḻlajzpac guiraa redojḻ ni rujn resa'ni lojni.