Read Mitla Zapotec Mateo 4 Bible Online

Mateo 4 - Mitla Zapotec bible

Mateo 4

¹Dxejc bejn Sprit Dxan xten Dios huij Jesús nez lo reyubijdz te nejzga nuhuaḻ beṉdxab Jesús.

²Che gulujx bacua'n Jesús tiuu gubijdx, tiuu guxhijṉ, gulaanni.

³Sas biääd beṉdxab lojni, räjpni: ―Palga guliilu Xi'n Dioslu, gunibee gac reguijre yätxtiil.

⁴Badzu' Jesús diidxre lojni, räjpni: ―Loj reguijtz xten Dios caj scree: “Xhet ganaxdi yäḻtxtiil guibajṉ rebejṉ; sibajṉzani con guiraa diidx nani rnii Dios.”

⁵Dxejcti huinä beṉdxab Jesús guedx Jerusalén. Gulä'pnini jiaa yejc xques guidoro. Dxejcru räjp beṉdxab lojni:

⁶―Palga Xi'n Dios luj, bitiäjs lo yujli, sa'csi scree caj loj rexquijtz Dios:Sinibee Dios rexanglni ga'preni luj;siliäsreni luj con ṉaareni didi gacnaj ni'lu lo reguijga.

⁷Badzu' Jesús diidxre lojni, räjpni: ―Caj loj rexquijtz Dios: “Na'c faḻlu Dad ni najc Xtioslu.”

⁸Stee huält huinä beṉdxab Jesús yejc te danro. Dxejcti baluiini lojni guiraa reguejdx, reguedxro ni tre' lo guedxliuj näj guiraa xcäḻnasa'creni.

⁹Dxejcti räjpni loj Jesús: ―Guiraa redee sunidxä lojlu palga guzuxhijblu nez loä te gaṉlu narä.

¹⁰Dxejcti räjp Jesús lojni: ―¡Huij nez rec beṉdxab! Scree caj loj rexquijtz Dios: “Dad Xtiostislu gaṉlu; lojtisni chulu.”

¹¹Dxejcti gubicaj beṉdxab loj Jesús. Dxejc biääd rexangl Dios biädhuiireni Jesús. Gusloj Jesús cayujn xtzuunni (Mr. 1:14‑15; Lc. 4:14‑15)

¹²Che biejn diajg Jesús yu' Juan neṉ ladzguiib, huijni nez Galilee.

¹³Dxejcti gudejdni guedx Nasare't, huiläjzni guedx Capernaum ni tre' gajxh nez ro' nis, nez reguejdx Zabulón con Neftalí.

¹⁴Si'c gujc te guzojb diidx ni bacuaa Isaías ni gunii xtidx Dios:

¹⁵Lajdx Zabulón, lajdx Neftalí, nezyuj ni rij nez ro' nisdoo, stelaad gueu Jordán,Galilee cadro rbäjz rebejṉ nani di gac rexpeṉ Israel.

¹⁶Rebejṉ nani rbäjz neṉ te yäḻcäjy abahuiireni te bajlga,luxh bajlga basanij xcäriejn renani nabajṉ lo xcäḻrdxejb, lo xpalaa yäḻgujt.

¹⁷Dxejcli gusloj cagulijdx Jesús, räjpni: ―Coḻgusiejchlajztu, coḻguxhobdojḻ te guibaṉsa'ctu sa'csi abidzuṉgajxh xcäḻrnibee Dios. Che gurejdx Jesús tajp xpejṉni (Mr. 1:16‑20; Lc. 5:1‑11)

¹⁸Sasaj Jesús nez ro' nisdoo xten Galilee che bahuiini lo tio'p niguii. Tejni laa Simón, ni laaza Pedr. Steeni najc lagajc bejtzni, ni laa Andrés. Dzuun ni rujnreni najc rniaazreni bäjl, ni'c cacuaareni guijxh lo nisdoo.

¹⁹Dxejcti räjp Jesús lojreni: ―Coḻtanajl narä. N̲aj riniaaztu bäjl, niluxh narä gunä cueedxtu rebejṉ.

²⁰Lagajc dxejc basa'nreni xquijxhreni te sanajlreni laani.

²¹Che gudejdreni ro'c, bahuiini loj stio'p niguii, Jacoob con bejtzni Juan. Yu'reni neṉ te barcw con xtadreni, ni laa Zebedeo cayunsa'creni guijxh. Dxejc gurejdx Jesúsreni.

²²Lagajc dxejc basa'nreni barcw näjza xtadreni te sanajlreni Jesús. Caguluii Jesús xhidajl bejṉ (Lc. 6:17‑19)

²³Sasajti Jesús guideb nez región xten Galilee, caguluiini neṉ tejga rexquidooreni. Cagusule'ni redidxcoob xten xcäḻrnibee Dios. Cagusiajczani guiraa yäḻracxhuu ni rajc rebejṉ guejdxga, guiraa yäḻguijdx.

²⁴Biejn diajg rebeṉ Siria diidx xcuent ni cayujn Jesús. Sas biädnäreni guiraa rebeṉracxhuu ni cayajc guiraloj yäḻguijdx, yäḻnayan; guiraa reni rajc yejcreni, guiraa reni rajc malyäḻguijdx, reni rajc yäḻguidxbej, guiraareni abixu'ṉ tiejxhreni. Dxejcti basiajc Jesús rebejṉga.

²⁵Xhidalduxh beṉ Galilee huinajlni, näj rebeṉ reguedx Decápolis, näjza rebeṉ guedx Jerusalén, näjza rebeṉ Judea näjza rebejṉ ni tre' stelaad gueu Jordán.