Read Mitla Zapotec Marcos 11 Bible Online

Marcos 11 - Mitla Zapotec bible

Marcos 11

¹Cheni sadzujṉreni gajxh Jerusalén, gudejdreni neṉ reguedx Betfagé näjza neṉ guedx Betania nez cuä' dajne' ni laa dan Oliib. Baxhaḻ Jesús tiop xpejṉpacni,

²räjpni lojreni: ―Coḻchäj guedxe' ni ria'n nez lojtu. Che guidzujṉtu ro' guejdxga, sidxältu te buṟe' ni caduu. Gajd bejṉ cuibni. Coḻxhecni, coḻtanägajcni.

³Palga yu' chu naa lojtu: “¿Xhicuent rujntu si'c?” Coḻye'tztis: “Dad caquiinni.” Dxejc suxhaḻgajcni buṟe'ga ree.

⁴Säätireni ro'c. Dxejcru ronejz bidxälreni te buṟe' caduu ro' te lä'. Dxejcti baxhecrenini.

⁵Gaii bejṉ ni tre' ro'c räjp lojreni: ―¿Xhicuent caguxhectuni?

⁶Dxejc räjpreni loj rebejṉga si'cni räjp Jesús lojreni gäbreni. Basangajc rebejṉga sanäreni buṟe'ga.

⁷Dxejcru biädnäreni buṟe'ga loj Jesús. Badzuubreni xhablajzreni dejtz buṟe'ga. Gubijbti Jesús buṟe'ga.

⁸Xhidajlza bejṉ gudixh xhablajzreni lo nezyuj, sgaiireni gudi'ch balajg lo reyajg te gudixhrenini lo nezyuj.

⁹Rebejṉ ni nijd lojni näj reni sanajl dejtzni guredxa'reni, räjpreni: ―¡Coḻguiliä'p xpala'nni! Coḻdeed xquixhtiooz loj Dios sa'csi baxhaḻni nani siääd xcuentni.

¹⁰Coḻdeed xquixhtiooz loj Dios sa'csi agubiré xcäḻrnibee toxtadnu David. ¡Coḻguiliä'p xpala'n Dios ni yu' jiaro!

¹¹Dxejcti biu' Jesús neṉ guedx Jerusalén. Biu'zani neṉ guidoro. Che bahuii Jesús guira'ti ni cayajc neṉga, sanäni guitzubitio'p xpejṉpacni, sääreni Betania sa'csi agudxej. Batzubde Jesús yejc te yagiigw ni xhet cajdi lojni (Mt. 21:18‑19)

¹²Che bara yääl, biunejzreni Betania. Dxejcti gusloj calaan Jesús,

¹³bahuiini zijt sojb te yag iigw caj balajg lojni. Sas gubigni, bahuiini don gaxäjsi caj iigw lojni. Xhet bidxäldini lojni; balajgtis caj lojni, sa'csi xhet xtiempdi iigw dxejc.

¹⁴Sas gunii Jesús räjpni loj yag iigwga: ―Rutru gauudi ninejxh ni rcaj lojlu par tejpas. Biejnza diajg rexpejṉpacni. Gulää Jesús renani ruto' näj renani rsii neṉ guidoo (Mt. 21:12‑17; Lc. 19:45‑48; <a href='B:500 02:13'>Jn. 2:13‑22)

¹⁵Dxejcti bidzujṉreni guedx Jerusalén. Biu' Jesús neṉ guidoro. Gusloj cabääni renani ruto' näj renani rsii neṉ guidooga. Niluxh batiejxhni rexmex renani ruchaa meel, näjza reyagxhil xten renani ruto' paloom.

¹⁶Diruni nusaan nidednäjreni xhicos nez neṉ guidooga.

¹⁷Dxejc caguluiinireni, räpgajcni lojreni: ―¿La et screedi caj loj guijtz? “Xyu'ä siriḻaj yu' cadro rninab guiraa rebeṉguedxliuj lo Dios.” La'tu abejntuni si'c xpiliää gubaan.

¹⁸Rebixhojz ni rnibee näjza remastr xten leii biejn diajgreni nani gunii Jesús. Sas gudiilreni xho ju'trenini, sa'csi rdxejbreni Jesús, sa'csi guiraa rebejṉ rdxeloj rextidx Jesús.

¹⁹Che biu' guxhijṉ, birii Jesús guejdxga. Gubijdz yagiigw ni bidzubde (Mt. 21:20‑22)

²⁰Che bara yääl gudejdreni, bahuiireni agubijdz guideb yagiigw, näj rexlobaani.

²¹Dxejc banaj lajz Pedr, räjpni loj Jesús: ―Dad, bahuii yagiigw nani batzubdelu yejcni, agubijdzni.

²²Dxejcti gunii Jesús räjpni lojni: ―Coḻchalilajz Dios.

²³Rniliä́pac lojtu, chutis nani gäb loj dajnre: “Gubicaj, bitejb loj nisdoo”, luxh dini guntio'p lajzni, chalilajztisni scree gac nani guniini, sajcpac nani guniini.

²⁴Ni'cni rniä lojtu, xhitis nani guiniabtu lo Dios che rninäjtuni, coḻchalilajz xca'tuni, dxejc sica'tuni.

²⁵Luxh che guiniabtu Dios, palga yu' chu loj rdxechlajztu, coḻsiäjlza lajztu, te näjza Xtadtu nani yu' xhaguibaa gusiäjḻza rextojḻtu.

²⁶Palga ditu gusiäjḻ lajztu con resa'tu, diza Xtadtu nani yu' xhaguibaa gusiäjḻ lajzni rextojḻtu. Yäḻrnibee xten Jesús (Mt. 21:23‑27; Lc. 20:1‑8)

²⁷Sas bidzuṉsacreni guedx Jerusalén. Laḻ ni sasaj Jesús neṉ guidoro, rebixhojz nani rnibee, näjza rebejṉ ni ruluii leii, näjza reguxhtis gubig lojni.

²⁸Räjpreni lojni: ―¿Xhi yäḻrnibee rajplu, ni'c rujnlu redzuunre? ¿Chu baniidx yäḻrnibee rujnlu redzuunre?

²⁹Dxejc räjp Jesús lojreni: ―Guiniabdidxäza lojtu. Coḻtzu'ni loä, dxejcti guiniäza xhi yäḻrnibeere rapä ni'c runä redzuunre.

³⁰¿Chu baxhaḻ Juan ni batiobnis? ¿La Dios o la rebejṉ? Coḻnii loä ṉaj.

³¹Dxejcti gunii loj sa'reni, räjpreni: ―Palga jie'tznu “Dios”, naani “¿xhicuent ditu nililajz xtiidxni?”

³²Diza niacti niäjbreni “rebejṉ” sa'csi rdxejbreni rebeṉxhidaal, sa'csi guiraa rebejṉ huililajz Juan gujc te bejṉ ni guniipac xtidx Dios.

³³Dxejcti guniireni, räjpreni loj Jesús: ―Dinu guidon. Sas räjp Jesús lojreni: ―Dizana guiniä xhi yäḻrnibeere rapä runä redzuunre.