Read Mitla Zapotec Marcos 15 Bible Online

Marcos 15 - Mitla Zapotec bible

Marcos 15

¹Che bara yääl bidxaag sa' rebixhojz ni rnibee, näj rebeṉgool ni najc guxhtis, näjza rebejṉ ni ruluii leii, näjza guiralii reguxhtis. Dxejcti gusloj cachaagreni diidx xho gunreni. Baliibreni Jesús, sanätirenini, niluxh badeedrenini loj Pila't.

²Dxejc gunabdiidx Pila't loj Jesús räjpni: ―¿La luj ni najc ṟeii xten rexpejṉ Israel, ä? Räjp Jesús lojni: ―Si'cni guniilu, si'c najcni.

³Dxejc gusloj rebixhojz nani rnibee cabe'c rexquej Jesús.

⁴Gunabdidxsac Pila't lojni: ―¿Xhet rniidilu ä? Ahuii lacti xquejlu cabe'creni.

⁵Bidxeloj Pila't sa'csi nicla si'c xhetru guniidi Jesús. Gunibeereni guet Jesús (Mt. 27:15‑31; Lc. 23:13‑25; <a href='B:500 18:38'>Jn. 18:38–<a href='B:500 19:16'>19:16)

⁶Dxelanijpac rusḻaa Pila't tej rebejṉ ni yu' latzguiib. Rusḻaani chutis te ni rniab rebejṉ.

⁷Lo rebejṉ ni yu' latzguiib nadxaag te niguii ni laa Barrabás. Bagu'tni te bejṉ che nu'chni lo te cuaa bejṉ ni gudiḻnäj gubieer.

⁸Dxejc bidojp xhidajl bejṉ loj Pila't, gunabreni lojni gunni si'ctis rujnni casob lanij.

⁹Dxejc gunabdiidx Pila't lojreni, räjpni: ―¿La rlajztu gusḻaä́ ṟeii xten rexpejṉ Israel, ä?

¹⁰Sa'csi gucbegajcni rdxechlajz rebixhojz loj Jesús, ni'c bateedrenini lojni.

¹¹Ni'cni baquiilza rebixhojz ni rnibee rebeṉxhidaal te gäbreni lo Pila't: ―Basḻaa Barrabás loonu lacuaa ni gusḻaalu Jesús.

¹²Dxejc räjp Pila't lojreni stehuält: ―¿Xhini'c rlajztu gunnää́ nani rniitu ṟeii xten rexpejṉ Israel?

¹³Dxejcru guredxa'reni: ―¡Bacuaani lo crujz!

¹⁴Dxejc räjp Pila't lojreni: ―¿Xhini'c xhet laati bejnni? Dxejcti laareni rbedxa'rureni: ―¡Bacuaani lo crujz!

¹⁵Basḻaati Pila't Barrabás, sa'csi rlajzni nuspaani lajz rebeṉxhidaal. Che gulujx gunibee Pila't, bia Jesús. Bateedti Pila't Jesús loj rexsoldaadni, te xcajni loj crujz.

¹⁶Dxejc huinä rexsoldaadni Jesús neṉ Pretoor, yu' cadro rujnreni yäḻguxhtis, ro'c batojpreni guiraa resa'reni.

¹⁷Dxejcti bashuajcwreni Jesús te lad moraad, bencheereni te coroṉ guejch basäḻreni yejcni.

¹⁸Guslogajc caguxhi näjrenini, caniireni lojni: ―¡Coḻguiliä'p xpala'n ṟeii xten rexpejṉ Israel!

¹⁹Batiäjlreni te yabixhijḻ yejcni, batiobxhejnreni lojni, luxh guzuxhijbreni te rajṉrenini.

²⁰Che gulujx basacsíreni Jesús, gulääreni lad moraad ni najcwni, sas bashuajcwrenini xhajbpacni. Gulägajcreni Jesús te cuaarenini lo crujz. Bacuaareni Jesús loj crujz (Mt. 27:32‑44; Lc. 23:26‑43; <a href='B:500 19:17'>Jn. 19:17‑27)

²¹Te niguii ni laa Simón, ni siääd Cirene, sadejd ro'c, bazajni lo nejz. Niguiire najc xtad Alejandro näjza Rufo. Che sadejdni nejzga, la fuerz basguurenini xcrujz Jesús.

²²Dxejcti huinäreni Jesús cadro laa Gólgota, nani säloj: dan Calabeer.

²³Ro'c badeedreni lo Jesús bin nani nu'ch mir lojni, dxejc laani naaddini niä'ni binga.

²⁴Che gulujxti bacuaareni Jesús loj crujz, gudzujtreni yejc rexhajbni, te don xhini'c xca' tejgareni.

²⁵Agujc choṉ oṟ gulejn gubijdx che bacuaareni Jesús lo crujz.

²⁶Letreer cadro bacuaareni xtojḻni scree bejnrenini: “R̲eii xten rexpejṉ Israel.”

²⁷Bacuaazareni lo stiop crujz tiop gubaan, tejni xladbee Jesús, xtee xladbäjgwni.

²⁸Dxejc guzojb diidx ni caj loj guijtz nani rnii: “Loj rebeṉguijdx bigabni.”

²⁹Luxh renani sadejd nejzga guniyajreni Jesús, cagusniibreni yejcreni, räjpreni lojni: ―¡Jaa! Luj nutiejxhlu guidoo luxh choṉtis dxej niunchesacluni.

³⁰N̲aj basḻaa lagajc luj, biäjt loj crujzga.

³¹Näjza rebixhojz ni rnibee, näj rebejṉ ni ruluii leii, baxhiznärenini, räjp loj sa'reni: ―Ste'ca bejṉ rusḻaani, xhoxh digacdi gusḻaani lagajc laani.

³²N̲aj sujiäjt Cristre, ṟeii xten rexpejṉ Israel, lo crujz te guihuiinu, te chalilaaznu. Näj regubaan ni caj lo crujz guniyajzareni Jesús. Xcäḻgujt Jesús (Mt. 27:45‑56; Lc. 23:44‑49; <a href='B:500 19:28'>Jn. 19:28‑30)

³³Che gojḻ läidxej, bicäjy si'cti choṉ oṟ.

³⁴Che gudejd choṉ oṟga, guredxa' Jesús dipro, räjpni con xtiidxni: ―Eloi, Eloi, ¿lama sabactani? ―dee säloj: Xtiozä, Xtiozä, ¿xhicuent gulälazlu narä?

³⁵Biejn diajg gaii bejṉ ni suga' ro'c räjpni si'c, dxejc räjpreni: ―Coḻcuadiajg, Elías cabejdxni.

³⁶Sas baxuṉ tejni, bahuajdxni te sponj loj binagr. Dxejcru basäḻnini yejc te yabixhijḻ, badeednini loj Jesús te yänini, räbgajcni: ―Coḻgusaan guihuiinu don la siädläjd Elíasni loj crujz.

³⁷Dxejcru guredxaduxh Jesús, gujttini.

³⁸Dxejc lajd ni najḻ neṉ guidoro biräjsni, gujcni tiop la', jiaali lo yujli.

³⁹Suga' capitán nani rnibee te gayuu soldaad nez loj Jesús, luxh che bahuiini xho guredxa' Jesús scree näj xho gujtni, räjpni: ―Guli'pacni, niguiire najc Xi'n Dios.

⁴⁰Suga'za gaii gunaa, zijt cadxelojreni. Lojreni yu' Marii Magdaleṉ, näj Marii, xnan Jacob ni najc huinru, näjza José, näjza Salomee.

⁴¹Che guyu' Jesús Galilee birinajl regunaare Jesús, luxh bahuiirenini. Yu'za xhidajlru regunaa ni biädnajl Jesús che biäädni Jerusalén. Biga'tz Jesús (Mt. 27:57‑61; Lc. 23:50‑56; <a href='B:500 19:38'>Jn. 19:38‑42)

⁴²Biu' gudxhijṉ, luxh najcni dxe bispr che rusucheereni par sabd, dxej ni rusilajz rexpejṉ Israel.

⁴³Biääd José ni siääd Arimatea, najcni te rebejṉ ni sajc loj reguxhtis. Näjza laani cabäjzni xcäḻrnibee Dios. Guideb yäḻnabajṉ gunabni tiexh Jesús lo Pila't.

⁴⁴Bidxelo Pila't alagujt Jesús, sas gurejdxni capitán ni rnibee tej gayuu soldaad, gunabdiidxni lojni la balagujt Jesús.

⁴⁵Che räjp capitánga lojni agujt Jesús, dxejc badeed Pila't tiexh Jesús loj José.

⁴⁶Agusii José te bariaad, luxh che gulätni Jesús lo crujz, batejbnini neṉ bariaadga. Dxejc gudixhni Jesús neṉ te biliää ni caj cuä' te guilaj, dxejcru batzugni te guiro ro' biliääga.

⁴⁷Bahuii Marii Magdaleṉ näj Marii xnan José cadro biga'tz Jesús.