Read Mitla Zapotec Marcos 2 Bible Online

Marcos 2 - Mitla Zapotec bible

Marcos 2

¹Che agudejd balti dxej, biusac Jesús neṉ guedx Capernaum. Dxejcti biejn diajg rebejṉ arbäjzni.

²Bidopgajc xhidalduxh bejṉ. Gudxaj neṉ yu'. Nicla rolä' di niajḻ nisiujreni. Dxejcti caguluii Jesús xtidx Dios lo rebejṉ.

³Dxejcti bidzujṉ tajp bejṉ, nuureni te bejṉ ni digacti guiniib; siädnärenini lo Jesús.

⁴Luxh di niajcdi nidzujṉreni cadro suga' Jesús, sa'csi yu' xhidajl bejṉ ro'c. Ni'c baxhalreni yejc yu' nejz cadro sujni. Dxejcru cadro baxhalreni basiäjtreni da' ni naga' beṉracxhuuga lojni.

⁵Che bahuii Jesús rililajzreni, dxejc räjpni loj beṉrachxhuuga: ―Xi'nä, agubicaj rextojḻlu.

⁶Sas gaii bejṉ ni ruluii leii ni sobga' ro'c bejnreni xhigab neṉ lastooreni, naareni:

⁷“¿Xhicuent rnii niguiire scree? Caniyajni Dios; rut rajcdi rudzucaj dojḻ. ¡Diostis rajc rudzucaj dojḻ!”

⁸Dxejcti gucbegajc Jesús xhi xhigab cayujnreni. Dxejc räjpni lojreni: ―¿Xhicuent rujntu xhigab si'c neṉ lastootu?

⁹¿La guyasiru gäbni loj beṉracxhuure: “Agubicaj rextojḻlu”, o la gäbni: “Huistie, cua' xta'lu, gusaj”?

¹⁰Baj ṉaj, te gantu rajc rudzucaj Xi'n Dios, nani gujc Niguii, dojḻ lo guedxliujre, caniä loj beṉracxhuure:

¹¹―Lojlu rniä, ¡Huistie, cua' xta'lu, huij rolijzlu!

¹²Lagajc dxejc huistie beṉracxhuuga, guläzni xta'ni, biriini ro'c nez loj guiraareni. Ni'cni bidxelo guiraareni. Dxejc gulä'preni xpala'n Dios, räjpreni: ―Gajdpacnu guihuii sa' dzuunre. Gurejdx Jesús Leví (Mt. 9:9‑13; Lc. 5:27‑32)

¹³Dxejcru gubisac Jesús ro' nis xten Galilee, luxh che bidojp guiraa rebejṉ lojni, baluiini xtidx Dios lojreni.

¹⁴Sasaj Jesús che bidxaagni Leví, xi'n Alfeo. Sobga'ni cadro rusquijxni rebejṉ. Dxejc räjp Jesús lojni: ―Gudanajl narä. Sas huisuni, sanajltini Jesús.

¹⁵Dxejc sobga' Jesús cayajwni rolijz Leví. Luxh sobganäj Jesús xhidajl reni rusquijx, näjza rebeṉdojḻ ni di chasanäj leii, näjza rexpejṉpacni, lo mex. Xhidajlreni tre', luxh sanajlreni Jesús.

¹⁶Dxejcru rebejṉ ni ruluii leii näj refarisee, che bahuiireni cayaunäjni renani rusquijx näjza rebeṉdojḻ, räjpreni loj rexpejṉpac Jesús: ―¿Xhicuent rbenäj xmastrtu reni rusquijx näj rebeṉdojḻ, luxh raunäjnireni, ränäjnireni?

¹⁷Che biejn diajg Jesús xhi caniireni, räjpni lojreni: ―Renani nadip nadaan di guiquiin doctoor, per reni racxhuu rquiin doctoor. Dina niädtedxä rebeṉsa'c, biädtedxä rebeṉdojḻ, te gusiech lajzreni. Gunabdiidxreni loj Jesús xcuent yäḻrucua'n (Mt. 9:14‑17; Lc. 5:33‑39)

¹⁸Cagucua'n rexpejṉ Juan näj rexpejṉ refarisee, renani najc rebeṉguidoo loj guedx Israel. Dxejc biääd gaii bejṉ loj Jesús, gunabdiidxreni lojni räjpreni: ―¿Xhicuent cagucua'n rexpejṉ Juan näj rexpejṉ refarisee luxh rexpejṉpaclu di gucua'n?

¹⁹Dxejcti räjp Jesús lojreni: ―¿La rucua'n rebejṉ ni rdoṉ chää cadro ru' yäḻruchṉaa che meer suga' bi'n? Che meer suga' bi'n lojreni, direni gucua'n.

²⁰Per sidzujṉ dxej sibicaj bi'n lojreni, dxejc sii sucua'nreni.

²¹’Rut rucuaadi tla' ladcoob loj tla' ladyux, sa'csi ladcoob rxu'nni luxh rutiäjzni ladyuxga, dxejc xhiroobruni räjs.

²²Rutza rusäḻdi bin ni gajd guilaj neṉ guidyux ni abigaa. Sa'csi bin ni gajd guilajga sutiäjsni guijdga che guilajni, luxh sinijt binga näjza guijdga. Ni'cni nanab gusäḻni bincoob neṉ guidcoobza. Batojp rebejṉ ni rinajl Jesús triuu sabd (Mt. 12:1‑8; Lc. 6:1‑5)

²³Te sabd, dxej ni rusilajz rexpejṉ Israel, sasaj Jesús nez loj reyuya'n. Sas gusloj rexpejṉpacni caläädx doj lo triuu.

²⁴Dxejc räjp refarisee, renani najc beṉguidoo loj guedx Israel, loj Jesús: ―Arniä, ¿xhicuent rujn rexpejṉpaclu dzuun ni di guchaag gunni neṉ dxej ni rusilajznu, ä?

²⁵Dxejcti räjp Jesús lojreni: ―¿La gajdtu goḻ nani bejn toDavid te huält, laani näj resa'ni, ä? Che biäädx xhi gauureni, gulaanreni.

²⁶Biu' David neṉ xyu' Dios cheni guyu' toAbiatar loj Dios. Abiatar sajcru loj rebixhojz ni guyu' neṉ xquidoo rexpejṉ Israel. Dxejc gudajw toDavid reyätxtiil ni dzuub ro'c. Badeedzanini gudajw rebejṉ ni yunäjni. Luxh rebixhojztis rajc rajw yätxtiilga.

²⁷Räjpza Jesús lojreni: ―Dios bejn dxe sabd sa'csi najnni naquiinpac gusilajz bejṉ. Dini niujn sabd te gapda bejṉni.

²⁸Ni'cni narä, Xi'n Dios ni gujc Niguii, näjza sabd rnibeä.