Read Mitla Zapotec Marcos 3 Bible Online

Marcos 3 - Mitla Zapotec bible

Marcos 3

¹Biu' Jesús stehuält neṉ xquidobäz rexpejṉ Israel. Ro'c yu' te niguii nani nabijdz te ṉaani.

²Niluxh ro'c cagula'tz rebejṉ Jesús don la susiajcni niguiiga sabd, dxej ni rusilajz rexpejṉ Israel, sa'csi rlajzreni cue'creni xquejni loj nani rnibee rexpeṉ Israel.

³Dxejc räjp Jesús lo niguii nani nabijdz ṉaani: ―Huistie, guzuj galäiire.

⁴Dxejcti gunabdidxgajcni loj gaii rebejṉga, räjpni: ―¿La laaca gunni dzunza'c, o la dzunguijdx, sabd, ä? ¿La susḻaani yäḻnabajṉ, o la sugu'tni? Luxh laareni biacdxireni.

⁵Dxejc nadxe'ch bahuii Jesús lojreni, luxh guc-huin lajzni, sa'csi guc najd lajzreni. Dxejc räjp Jesús loj niguiiga: ―Baslii ṉaalu. Dxejcti basliini ṉaani. Biajctini.

⁶Dxejcru biunejz refarisee. Guslogajcreni caguchaagreni diidx con reni nadxaag Herodes, te don xho ju'treni Jesús. Xhidajl bejṉ bire' ro' nis

⁷Jesús näjza rexpejṉpacni sääreni ro' nis, luxh xhidajl beṉ Galilee birinajlni.

⁸Che gojnreni redzunro ni rujn Jesús, xhidajlreni biääd. Yu'reni birii Judea, yu'reni birii guedx Jerusalén, yu'reni birii Idumea, yu'zareni birii nejz stelaad gueu Jordán, biriizareni nez guedx Tiro, näj nez guedx Sidón, biädhuiireni loj Jesús.

⁹Ni'cni räjp Jesús loj rexpejṉpacni quiilreni te canuu, te na'c gutää rebeṉxhidaalgani.

¹⁰Abasiajc Jesús xhidajl beṉracxhuu, ni'cni guiraasi beṉracxhuu caxa't lojni, te caṉrenini te jiajcreni.

¹¹Niluxh che rhuii rebeṉdxab lojni, ruzuxhijbreni lojni. Dxejcti rbedxa'reni räjpreni: ―Luj najclu Xi'n Dios.

¹²Dxejcti Jesús gudidxa' lojreni te na'c niäjbreni chu najcni. Gule Jesús tzubitiop bejṉ loj reni rinajlni (Mt. 10:1‑4; Lc. 6:12‑16)

¹³Birii Jesús sääni lo te dajne' cadro gurejdxni renani rlajzni cueni. Gubigtireni lojni.

¹⁴Dxejcti guleni tzubitio'preni te sanäjreni laani, te guxhaḻnireni chaluiireni xtidx Dios;

¹⁵te ga'preni yäḻrnibee te gusiajcreni beṉracxhuu, te cuääzareni rebeṉdxab.

¹⁶Retzubitio'p bejṉ ni gule Jesús najc: Simón, ni gulälajzani Pedr.

¹⁷Dxejcti Jacoob con Juan, rexi'n Zebedeo, gulälaj Jesús Boanerges. Con xtiidxnu sälojni bejṉ ni nasesya', si'c guzii.

¹⁸Näj Andrés, Felipe, Bartolomé, Mateo, Tomás, Jacoob xi'n Alfeo, Tadeo, Simón, ni di guidxejb rnigajc,

¹⁹näj Judas Iscariot, ni bato' Jesús loj reni rdxechlajz lojni. Sä'tireni rolijz te dade'. Yäḻrniyaj loj Sprit Dxan xte Dios (Mt. 12:22‑32; Lc. 11:14‑23; 12:10)

²⁰Dxejc bidopsac rebeṉxhidaalga; nicla niajc niaunäj Jesús rexpejṉpacni.

²¹Che biejn diajg resa' Jesús dee, biädxhiirenini, sa'csi naareni, yejcni cayajc.

²²Rebejṉ ni ruluii leii ni birii guedx Jerusalén bidzujṉza lo Jesús, dxejc räjpreni: ―Beelzebú, nani rnibee rebeṉdxab, yu' neṉ lastoo niguiire. Niluxh nani rnibee rebeṉdxab rudeed yäḻrnibee lo Jesús te cuääni beṉdxab.

²³Dxejc gurejdx Jesús rebejṉga, bijyni te cuent ni ruluii lojreni, räjpni: ―¿Xho gurilaagw beṉdxab lagajc sabeṉdxabni?

²⁴Palga rebejṉ xten te yäḻrnibee la'reni, luxh tiḻnäj te cuaani ste cuaaga, di yäḻrnibeega chu xchej.

²⁵Palga te famiḻ rdiḻnäj lagajc sa'ni, di familga chu xchej.

²⁶Palga beṉdxab nani rnibee tiḻnäj lagajc laani, di xcäḻrnibeeni chu xchej, sa'csi ni'c gun luuxni.

²⁷’Rut gacdi jiu' rolijz te niguidaan, cuanni xhixhtenni, palga dini gulibxgaani, si'ctis sajc cuanni xhixhtenni.

²⁸’Rniliä́pac lojtu guiraa dojḻ näjza yäḻrniyaj xten rebejṉ sajc jia.

²⁹Nani guiniyaj Sprit Dxan xten Dios, digacdi guibicaj rextojḻni, anuutisni xtojḻni par tejpas.

³⁰Räjpni si'c sa'csi caniireni yu' beṉdxab neṉ lastooni. Xnan con rebetzhuin Jesús (Mt. 12:46‑50; Lc. 8:19‑21)

³¹Dxejcru bidzujṉ xnan Jesús, näj rebetzhuinni. Direni niu', baxhaḻtisreni chu huitejdxni.

³²Rebejṉ ni sobga' gabi Jesús räjpreni lojni: ―Xnanlu näj rebejtzlu suga' ro lä', caguiilreni luj.

³³Dxejcti räjp Jesús lojreni: ―¿Chu reni'c najc xnanä näj rebetzä?

³⁴Bahuigajcni loj renani sobga' gabini, dxejc räjpni lojreni: ―Redee najc xnanä, rebetzä.

³⁵Chutis ni rujn ni rlajz Dios, ni'c najc betzä, bisianä, näjza xnanä.