Read Mitla Zapotec Marcos 5 Bible Online

Marcos 5 - Mitla Zapotec bible

Marcos 5

¹Bidzujṉtireni stelaad ro' nisga, lo yuj xten Gadara.

²Si'ctis ni birii Jesús neṉ canuu, biädgajc te niguii lojni ni birii neṉ rebiliää cadro rga'tz beṉgut. Yu' beṉdxab neṉ lastoo niguiiga.

³Rbäjzni neṉ rebiliääga luxh rut rajcdi rucuaduuni, nicla con cadeṉguiib.

⁴Xhidajl huält agacbacuaduureni ni', ṉaa niguiiga con cadeṉguiib, luxh litis batiuugni recadeṉguiibga, rut rajcdi rusiacdxini.

⁵Si'ctis canzajni, dxej, yääl. Rbedxa'ni neṉ redajn, neṉ rebiliää, luxh cagutiuugni tiejxhni con reguij.

⁶Che bahuiini loj Jesús zijtru, baxuṉni huichaglojni Jesús, bazuxhijbni lojni.

⁷Dxejcti rbedxaduxhni, räjpni: ―¿Xhicuent siäädlu loä, Jesús, Xi'n Dios ni yu' jiaro? Rniabä lojlu nez loj Dios na'c gusacsílu narä.

⁸Sa'csi agac cayäjb Jesús lojni: ―Luj, beṉdxab, birii neṉ lastoo niguiiga.

⁹Dxejcti gunabdiidx Jesús räjpni: ―¿Chu laalu? Dxejc räjpni: ―Narä laä Legión, nani säloj xhidalro, sa'csi xhidajl najcnu.

¹⁰Sanuutis canabni lo Jesús na'c guxhaḻni rebeṉdxabga ste'ca guejdx.

¹¹Ro'c tre' xhidalduxh cuch cuä' dane'ga, cayajwreni.

¹²Dxejc gunab rebeṉdxabga loj Jesús, räjpreni: ―Baxhaḻ nuure loj recuchre te jiu'nu neṉ lastooreni.

¹³Dxejcti basaan Jesúsreni. Biriiti rebeṉdxabga neṉ niguiiga, dxejc biu'reni neṉ lastoo recuchga. Yu' si'cti tiop miḻ cuch ro'c. Baxuṉ recuchga, dxejc biroḻreni ro' guilaj, bitejbreni neṉ nis, gujttireni neṉ nisga.

¹⁴Renani cayajp recuchga baxuṉreni, huiyeiireni diidxga neṉ guejdx, näjza loniaa. Dxejc biääd bejṉ biädhuii nani gujc ro'c.

¹⁵Che bidzujṉreni cadro suga' Jesús, bahuiireni loj niguii nani guyu' rebeṉdxabga neṉ lastooni. Sobga'ni ro'c, najcwni xhajbni luxh nasa'c yejcni. Niguiire najc nani guyu' beṉdxab ni laa Legión neṉ lastooni. Bidxejbti rebejṉ nani bahuii lojni.

¹⁶Dxejcru rebejṉ ni bahuii xhi gujc ro', huiyeiireni diidx xho guzajc niguiire nani guyu' beṉdxab neṉni galoo, näjza nani guzajc recuch.

¹⁷Dxejc gusloj canabreni loj Jesús jiunejzni.

¹⁸Che biu' Jesús neṉ canuu, niguii nani guyu' beṉdxab neṉ lastooni gunabni loj Jesús, räjpni: ―Huinä narä.

¹⁹Per di Jesús nusaan nijni. Räjp Jesús lojni: ―Huij rolijzlu, lo resa'lu. Huiyeii diidx lojreni xho bennäj Dadlu, näjza xho balaslajzni luj.

²⁰Sä'ti niguiiga, gusloj cayujyni diidx neṉ reguejdx xten Decápolis xho bennäj Jesúsni. Guiraa rebejṉ bidxeloj. Xindxa'p Jairo näjza gunaa ni bahuaḻ xhajb Jesús (Mt. 9:18‑26; Lc. 8:40‑56)

²¹Che bidzuṉsac Jesús stelaad ro' nisga neṉ canuu, bidzujṉ xhidalduxh bejṉ cadro suga'ni. Bia'nti Jesús ro' nisga.

²²Dxejcru biääd te niguii nani laa Jairo, ni rnibee neṉ xquidobäz rexpeṉ Israel. Che bahuiini loj Jesús, bazuxhijbni lojni.

²³Canabpacni lojni, räjpni: ―Xindxapä'ä acayejt. Gudaa, guzujlu ṉaalu yejcni, te jiajcni, te guibajṉni.

²⁴Sanäti Jesús bejṉga. Xhidajl bejṉ sanajlni, luxh cagutäärenini.

²⁵Loj rebeṉxhidaalga yu' te gunaa ni agujc tzubitio'p ijz racxhuuni yäḻguidxbäii.

²⁶Agudedduxhni trabajw, abahuii xhidajl doctoorni. Xlia'si abanijtni guiraa nani rajpni, luxh xhet racnäjdini, alga rxuuruni.

²⁷Sa'csi biejn diajgni xhini'c canii rebejṉ xcuent Jesús, gubig gunaaga nez dejtz Jesús, guideb neṉ rebejṉ, bahuaḻni xhajb Jesús.

²⁸Cayujnni xhigab, naani: “Palga narä faḻä xhajbtisni, siacä.”

²⁹Lagajc dxejc guläjz caxe' xtiejnni, gucbeeza tiejxhni abirii xcäḻracxhuuni.

³⁰Gucbegajc Jesús yu' chu abasiajcni. Gubiregajcni neṉ rebeṉxhidaalga, räjpni: ―¿Chuni'c bahuaḻ xhabä?

³¹Dxejcru räjp rexpejṉpacni lojni: ―Rhuiilu beṉxhidaal cagutäälu, luxh naalu: “¿Chuni'c bahuaḻ xhabä?”

³²Sas cahuii Jesús nez ree, nez rec, te fiini loj nani bahuaḻni.

³³Dxejc bidxejb gunaare, racsejsni, sa'csi gucbeeni xhini'c gujcni. Dxejc biäädni, bazuxhijbni loj Jesús, räbliini loj Jesús guira'ti ni bejnni.

³⁴Dxejc räjp Jesús lojni: ―Xindxa'pä, abiajclu sa'csi huililajzlu. Gulecdxi lajzlu, huij rolijzlu, abiajc xcäḻracxhuulu.

³⁵Canisijc Jesús si'c che bidzujṉ renani birii rolijz dade' ni rnibee neṉ xquidobäz rexpejṉ Israel. Räjpreni: ―Agujt xindxape'lu. ¿Xhicuent rusieedrulu Dad mastr?

³⁶Dxejc che biejn diajg Jesús nani caniireni, räjpni lo dade'ga: ―Na'c guidxejblu. Bililajztis.

³⁷Luxh dini nusaanru nij chu ninäni, Pedrtis näj Jacoob näjza Juan bejtzni.

³⁸Che bidzujṉni rolijz dade'ga, bahuii Jesús biejy ni cayujn rebejṉ ni rbedxa' roon.

³⁹Biu'tini räjpni: ―¿Xhicuent rujntu si'c? Gajd dxape're guet. Nagayejssini.

⁴⁰Alga baxhiznäjrenini. Dxejc gunibee Jesús birii guiraa rebejṉga. Dxejcti huinäni xcuzajn dxape'ga con renani sanäni. Biu'reni cadro naga' dxape're.

⁴¹Gunaazni ṉaa dxape'ga, dxejc räjpni: ―Talita cumi ―nani säloj con xtiidxnu: Dxape', lojlu rniä, huistie.

⁴²Dxejcti huistiegajc dxape'. Tzubitio'p ijz yu' dxape'ga. Bidxeloduxh rebejṉ ni bahuii guläs Jesús dxape'ga.

⁴³Dxejc balijdx Jesús reni te rut lojdi chaye'tzreni xhini'c gujc. Gunibegajcni gudeedreni xhi gauu dxape'ga.