Read Mitla Zapotec Marcos 7 Bible Online

Marcos 7 - Mitla Zapotec bible

Marcos 7

¹Dxejcti refarisee, renani najc beṉguidoo loj guedx Israel, näjza gaii rebejṉ ni ruluii leii, renani birii Jerusalén, bidojpreni loj Jesús.

²Bahuiireni cayajw gaii rexpejṉpac Jesús, luxh canii rebejṉ nacdxuudx naareni (dee säloj direni quiib ṉaareni si'ctis ni rdiib ṉaa rebeṉ lajdxreni). Ni'cni guniyajreni rexpejṉpac Jesús.

³(Guiraa rebejṉ xten Israel, näjza refarisee, sasanäj nani baluii rebeṉgool ni yu' guedx Israelreni. Direni gauu palga direni quiib ṉaareni balti huält.

⁴Che rbi'reni rijreni lo guii, rguibsa'creni ṉaareni, lojreni, ni'reni, dxejcti rajc rajwreni. Niluxh guyu' xhidajl costumbr ni sasanäjrureni, luxh yu' mood rguiibreni rextrastreni näjza rexplooreni, näjza rextrastguiibreni, näjza rexloonreni.)

⁵Dxejc gunabdiidx refarisee näjza rebejṉ ni ruluii leii loj Jesús, räjpreni: ―¿Xhicuent di rexpejṉpaclu gun si'cni baluii rebeṉgool, niluxh rajwreni guideb nacdxuudx ṉaareni?

⁶Dxejcti gunii Jesús lojreni räjpni: ―¡Beṉ guijdx! Laaca gunii Isaías xcuenttu che guniini xtidx Dios. Scree cajni loj guijtz:Guejdxre sanälajz narä con rextiidxni,niluxh lastooreni zitro suga' loä.

⁷Xlia'si ruzuxhijbreni, sa'csi direni chanälajz narä.Ruluiireni si'c xtiidxpac Dios nani rnii rebejṉ.

⁸Rusa'ntu xleii Dios, sasanädzu'tztu costumbr nani baluii rebeṉgool. Rdibsa'c rexploortu, rextrasttu, luxh rujnzatu xhidajlru cos sa' redee.

⁹Räjpza Jesús lojreni: ―Rusa'ntu xtidx Dios te risanäjtu recostumbr xtentu.

¹⁰Sa'csi räjp Moisés: “Huinälajz xtadlu con xnanlu.” Räjpzani: “Suju'tpactu nani gudzubde yejc xtadni o yejc xnanni.”

¹¹Niluxh la'tu rniitu sajc gäb bejṉ loj xtadni o loj xnanni: “Dina gapä xhi cojn gacnää́lu” (nani säloj, abadedä guira'ti loj Dios).

¹²La'tu ditu gusaan gunru bejṉ por xtadni nicla por xnanni.

¹³Si'c rbälaztu xtidx Dios, te sasanäjtu recostumbr nani ruluiitu, luxh xhidajl cos sa' dee rujntu.

¹⁴Gurejdx Jesús guiraa rebejṉ, dxejc räjpni loj guiraareni: ―Colcuadiajg, coḻyacbee xtidxä.

¹⁵Rexhicos yäḻrajw ni rajw bejṉ, dini gunijt bejṉga, rediidx ni ṟii neṉ lastoo bejṉ, näjza recos ni rujn bejṉ, ni'c runijt bejṉga.

¹⁶Pal yu' chu rlajz guisieed, sucuadiajgni.

¹⁷Dxejcti gula'reni loj rebeṉxhidaal, biu'reni neṉ yu'. Dxejc gunabdiidx rexpejṉpacni loj Jesús xhi säloj cuent ni guniini.

¹⁸Basejc Jesús diidx lojreni, räjpni: ―¿La näjza la'tu xheti xcäriejntu? ¿La di'tu gacbee xhitis yäḻrajw nani riu' neṉ bejṉ digacdi gunijtni lastoo bejṉ, ä?

¹⁹Sa'csi dini jiu' neṉ lastooni; riu'ni xque'ni, rdejdtini. Si'c guniini te baluiini guira'ti xhicos najc naya.

²⁰Dxejc räjpni: ―Rediidx ni ṟii neṉ lastoo bejṉ, näjza recos ni rujn bejṉ, ni'c sii runijt lastoo bejṉ.

²¹Sa'csi neṉ lastoo rebejṉ ṟii rexhigabguijdx, näjza yäḻresnäj chääl sa'ni, yäḻresnäj ni xhet najcdi chäälni, yäḻrugu't sa'ni,

²²yäḻgubaan, yäḻrlajzni ga'pni xhixhten bejṉ, yäḻlatsiaj, yäḻrusgueeni, yäḻ xheti xtujy lojni, yäḻrdxechlajz, yäḻrudzubde sa'ni, yäḻnayechlajzni, yäḻguyalajz.

²³Guiraa reyäḻlatsiajre neṉ lastoo bejṉ ṟiireni, luxh reni'csi runijt bejṉ. Tej guna Sirofenicia ni bililajz xtidx Jesús (Mt. 15:21‑28)

²⁴Dxejc biriini ro'c, sääni nez guedx Tiro näjza nez Sidón. Ro'c bia'nni neṉ te yu' sa'csi di rlajzni niacbee rebejṉ caro yu'ni, niluxh di niajcdi niuxhiga'tztisni.

²⁵Biengajc diajg te gunaa ro'c yu' Jesús. Xindxape' gunaaga yu' beṉdxab neṉ lastooni. Bidzujṉ gunaaga, bazuxhijbni lo Jesús.

²⁶Gunaaga rnii griegw, najcni beṉ Sirofenicia. Gunabni lojni guinibeeni guirii beṉdxabga neṉ lastoo xi'nni.

²⁷Dxejc räjp Jesús lojni: ―Basaan gauxgaa rebiuux, sa'csi xhet laati gudzucajni xcuxtiil rebiuux te gudeednini loj rebä'cw.

²⁸Dxejc gunii gunaaga, räjpni loj Jesús: ―Yo, Dad. Näjza rebäcue' ni suga' neṉ mex rajw nani rtejb ro' rebiuux.

²⁹Dxejcti räjp Jesús lojni: ―Laaca rniliilu. Huij rolijzlu. Abirii beṉdxab neṉ lastoo xindxape'lu.

³⁰Luxh che bidzujṉ gunaare rolijzni, a dxape' naga' lo da'. Gucbegajc gunaaga abirii beṉdxab neṉ lastoo dxape'ga. Basiajc Jesús te beṉgop

³¹Dxejcru birii Jesús stehuält lo rexyuj guedx Tiro, gudejdni nez Sidón näjza rexyuj Decápolis. Bidzujṉtini ro' nis xten Galilee.

³²Biädnä gaii bejṉ te niguii ni nacua't diajgni lo Jesús. Digacdiza guinisa'c niguiiga. Biädnabreni lo Jesús nusujni ṉaani yejc niguiiga.

³³Dxejcti badzucajnini loj rebejṉ. Baquitzgajcni rebicueṉaani neṉ diajgni, dxejcru batiobxhejnni, gudajntini lujdxni.

³⁴Bahuiini xhaguibaa, bazaa lajzni, dxejc räjpni: ―¡Efata! ―nani säloj bixal.

³⁵Dxejcru bixalgajc rediajgni, gubaṉgajc lujdxni, gunisa'cni.

³⁶Dxejcti gunibee Jesús rutlojdi gäbreni, per che räjpni lojreni si'c, laareni batie'chrureni diidxga.

³⁷Rdxeloduxhreni, räjpreni: ―Guira'ti laaca rujnni; ruxhalni diajg rediagcua't, luxh rusniini regop.