Read Mitla Zapotec Marcos 8 Bible Online

Marcos 8 - Mitla Zapotec bible

Marcos 8

¹Neṉ redxejga bidojp xhidalro bejṉ, luxh xheti xhigauureni. Dxejc gurejdx Jesús rexpejṉpacni ni rinajlni, räjpni lojreni:

²―Rulazlazä rebejṉre, sa'csi ṉaj rajc choṉ dxej tre'reni loä, luxh xhet yu'di gauureni.

³Niluxh palga guxhaḻäreni rolijzreni, xliajzreni, sidxajgreni lo nejz; sa'csi yu' renani zijtru siäädreni.

⁴Dxejcru räjp rexpejṉpacni lojni: ―¿Caro chaca'nu yätxtiil te cha xque' rebejṉre ree, cadro rut rbäjzdi?

⁵Sas gunabdiidx Jesús lojreni: ―¿Bal yätxtiil rajptu? Dxejcru räjpreni: ―Gajdztisni.

⁶Gunibee Jesús gurej rebeṉxhidaalga loj yuj. Sas cua'ni guigajdx yätxtiilga, badeedni xquixhtios lo Dios, guḻa'ni reyätxtiilga. Dxejc badeednini loj rexpejṉpacni te guteedrenini loj rebeṉxhidaal. Bateedtireni yätxtiilga lo rebeṉxhidaalga.

⁷Rajpzareni gaii bälbäz, dxejcti badedsac Jesús xquixhtios lo Dios, gunibeeni bateedzareni rebälbäzre loj rebeṉxhidaalga.

⁸Dxejc gudajwreni, gudxaj xque'reni. Dxejc batojp rexpejṉpac Jesús gajdz dxijm̲ reyätxtiil näj rebäjl dxuc ni bia'n.

⁹Niluxh renani gudajwga najcreni si'cti tajp mil bejṉ. Dxejcti basadiidxnireni.

¹⁰Biunägajc Jesús rexpejṉpacni neṉ canuu, biäädreni nez Dalmanuta. Gunab refarisee te senro loj Jesús (Mt. 16:1‑4; Lc. 12:54‑56)

¹¹Biääd refarisee, renani najc rebeṉguidoo loj guedx Israel, guslojreni cayeinäjreni Jesús. Canabreni gunni te senro nani Diostis ni yu' guibaa sajc gun. Cagula'tzsireni, don xhi gunni.

¹²Dxejcti bazaa lajz Jesús neṉ lastooni, räjpni: ―¿Xhicuent rlajz rebejṉ ni nabajṉ ṉaj fii gac resenro xten Dios? Rniliä́pac lojtu, di rebejṉ ni nabajṉ ṉaj fii nicla tej sen xhaguibaali.

¹³Dxejcti basa'nnireni ro'c, biusacni neṉ canuu, sä'tini stelaad nisga. Levaduur xten refarisee (Mt. 16:5‑12)

¹⁴Biaḻlajzreni nica'reni yätxtiil, luxh xhetliidi sanädireni. Tejtis yätxtiil nuureni neṉ canuu.

¹⁵Cagulijdx Jesús rexpejṉpacni, räjpni lojreni: ―Coḻsusiṉ, coḻnati levaduur xten refarisee, coḻnatiza levaduur xten Herodes. (Nalajznu, xtiidxreni najc si'c levaduur.)

¹⁶Dxejcti cayeinäj sa'reni diidx xcuent nani gunii Jesús lojreni, dxejc räjpreni: ―Sa'csi dinu jia'p yätxtiil, ni'c rniini scree.

¹⁷Che gucbee Jesús xhini'c caniireni, räjpni: ―¿Xhicuent rniitu: “Sa'csi dinu jia'p yätxtiil”? ¿La gajdtu fii, la gajdtu gacbee? ¿La laḻtis nacnajd lastootu?

¹⁸¿La yu' balojtu, luxh ditu fii? ¿La sojb diajgtu luxh di diajgtu jiejn? ¿La dilajztu guizaj?

¹⁹Che guḻa'a guigaii yätxtiil te gudajw gaii mil niguii, ¿bal dxijm̲ yätxtil biujy batojptu? Sas räjpreni lojni: ―Tzubitio'pni.

²⁰―Che guḻa'a guigajdz yätxtiil te gudajw tajp mil bejṉ, ¿bal dxijm̲ yätxtil biujy batojptu? Sas räjpreni: ―Gajdzni.

²¹Dxejc räjpni lojreni: ―¿La gajdtu gacbesa'c xhi benä? Basiajc Jesús te lotiä'p Betsaida

²²Bidzuṉnäj Jesús rexpejṉpacni guedx Betsaida. Dxejc biädnäreni te lotiä'p loj Jesús, gunabreni loj Jesús caanni bejṉga.

²³Dxejc gunaazni ṉaa lotiä'pga, guläänini neṉ guejdx. Che batiobxhejnni neṉ rebalojni, basugajcni ṉaani yejc baloj lotiä'pga, gunabdidxgajc Jesús: ―¿La yu' xhi rhuiilu, ä?

²⁴Luxh che bahuii bejṉga räjpni: ―Rhuiä sasaj rebejṉ, luxh si'c yajg rhuiä lojreni.

²⁵Basusac Jesús ṉaani yejc rebaloj bejṉga. Dxejc bejn Jesús bahuii bejṉga. Biajctini, zijtru gujc bahuisa'cni lo guiraa rebejṉ.

²⁶Dxejcti baxhaḻ Jesúsni rolijzni, räjpni: ―Basquejn, huijga rolijzlu, na'c jiu'lu neṉ guejdx, na'c gäblu xhi gujclu lo rebejṉ ni yu' neṉ guejdx. Basule' Pedr Jesús najc Crist (Mt. 16:13‑20; Lc. 9:18‑21)

²⁷Birinäj Jesús rexpejṉpacni lo reguejdx ni ria'n nez Cesarea xten Filipo. Laḻni sasajreni lo nejz räjp Jesús loj rexpejṉpacni: ―¿Chuni'c rnii rebejṉ nacä narä?

²⁸Sas räjpreni lojni: ―Yu'reni rnii najclu Juan ni batiobnis, yu'zareni rnii najclu Elías, yu'zareni rnii najclu te rebejṉ ni gunii xtidx Dios.

²⁹Dxejc räjpni lojreni: ―¿La'tu a'? ¿Chuni'c rniitu nacä narä? Dxejc bazejc Pedr diidx, räjpni lojni: ―Luj najclu Crist.

³⁰Dxejcti räjp Jesús lojreni: ―Rutlojdi gäbtu chu nacä. Gunii Jesús xho guetni (Mt. 16:21‑28; Lc. 9:22‑27)

³¹Dxejcti gusloj Jesús caguluiini rexpejṉpacni, räjpni: ―Narä nacä Xi'n Dios, ni gujc Niguii. Nanabpac tedä trabajwduxh. Sibälaz rebeṉgool ni najc guxhtis neṉ guedx Israel narä, näjza renani rnibee loj rebixhojz, näjza rebejṉ ni ruluii leii: sugu'treni narä, luxh ni riojṉ dxej guibaṉsacä lo rebeṉgut.

³²Guyasi guniini rediidxre. Sas huinä Pedr Jesús telaad, dxejc räjpni loj Jesús: ―Na'c guiniilu si'c.

³³Dxejc batzuré loj Jesús, bahuiini loj rexpejṉpacni. Dxejc gudiḻṉäjni Pedr räjpni: ―Gubicaj loä, Satanás, luj dilu gun xhigab xten Dios, xhigab ni rujn rebejṉtis rujnlu.

³⁴Dxejc gurejdxni rebeṉxhidaal con reni najc xpejṉpacni, räjpni lojreni: ―Palga yu' chu rlajz gac xpeṉäpac, sucuääz gunni ni rsia' lajzni gunni, sutedni trabajw si'c tej ni caj lo crujz, sujiädnajlni narä.

³⁵Sa'csi nani rlajz gusḻaa xcäḻnabajṉni, sunijtni xcäḻnabajṉni. Luxh nani runijt xcäḻnabajṉni xcäḻnasa'c narä, xcäḻnasa'c xtidxä, siḻiaapac xcäḻnabajṉni.

³⁶Xlia' ga'p bejṉ guiraloj lo guedxliujre palga nitni lo Dios par tejpas.

³⁷Xhet gacdi gudeed bejṉ te guibaṉnäjni Dios.

³⁸Nani guituinäj narä con rextidxä ṉaj, cheni najc rebejṉ beṉdojḻ, narä, Xi'n Dios nani gujc Niguii, situinää́zani che jiädnää́ reangl xten Dios che jiälää́ lo xcäḻrdimbicha' Xtadä.