Read Mitla Zapotec Lucas 1 Bible Online

Lucas 1 - Mitla Zapotec bible

Lucas 1

¹Xhidajl bejṉ abacuaa lo guijtz xcuent guiraa redzuun ni gujc nez loonu te cuäxnejzreni redzuunga

²si'cpac ni biääd rediidxga loonu. Rebejṉ nani bahuiloj guiraa recosre cheni guslojlireni, näjza reni gucnäj basule' xtidx Dios najc renani basule' rediidxga loonu.

³Luxh sa'csi abiḻä, abahuiloä, abenduxhä xhigab xcuent guiragajc ni gusajc che gusoblojlini, ni'c runä xhigab laaca gucuaä rediidxre, xnejz-xnejzni lo guejblu, Dad Teófilo,

⁴te gacbesa'c guejblu ni najc didxlii xcuent guiraa rediidx ni abisieed guejblu. Te xangl Dios gunii xho gaal Juan ni rutiobnis

⁵Cheni gujc Herodes ṟeii xten región Judea, guyu' te bixhojz ni laa Zacarías, ni nadxaag lo rexpejṉ Abías. Chäälni laa Elisabe't, ni najcza te xagdoo bixhoz Aarón.

⁶Guiro'preni najcreni nadolajz nez loj Dios, rusoobreni xtidx Dios näjza xleii Dios, ni'c digacdi gucuaquij bejṉreni xcuent nicla tej dojḻ.

⁷Luxh ruti xi'nreni, sa'csi chäälni digacdi chu xi'nni. Luxh guiro'preni anajcreni beṉgool.

⁸Te dxej, laḻ ni cayujn Zacarías dzuun neṉ guidoro si'c bixhojz nez loj Dios,

⁹dxejc con daad bibee chuni'c jiu' neṉ yudxan xten guidoro te guze'creni yaal si'cni najc costumbr xten rebixhojzga. Dxejc si'c gulereni Zacarías gunni.

¹⁰Laḻ ni caguze'cni guxhyaal, suga' guiraa rebejṉ lo xle' guidoro, cabedx-canabreni lo Dios.

¹¹Dxejcti baluiloj te xangl Dios lo Zacarías, suliini ladbee lo dxan cadro cayejc guxhyaal.

¹²Che bahuii Zacarías lo xangl Dios, di jien xhi gunni, lacti bidxebduxhni.

¹³Sas xangl Dios räjp lojni: ―Na'c guidxejblu, Zacaríi, sa'csi Dios abiejn diajgni xtiidxlu, luxh su' te xi'n chäälu, Elisabe't; cuälajluni Juan.

¹⁴Sibalazduxhlu, siroob lastoolu; xhidajl bejṉ sibalajz sa'csi gaalni,

¹⁵sa'csi beṉro gac xi'nlu nez loj Dios. Dini yä bin, nicla maxcaal. Sibäjz Sprit Dxan xten Dios neṉ lastooni cheni gaallini.

¹⁶Sujnni gusiechlajz xhidajl rexpejṉ Israel, guibi'reni lo Gueb Dios.

¹⁷Juanre sinijdni loj Dad, sujni lagajc xhigab, sajpni lagajc yäḻrnibee ni gojp profe't Elías, te che jiejn diajgreni xtiidxni susiechlajz redad, susiäjḻzareni diidx con rexi'nreni. Sigajcza rebejṉ ni di gusoob xtidx Dios sisieedreni gusoobreni xtidx Dios, te si'c jiädsucheeni lastoo rebejṉ te chalilajzreni xtidx Dad ni jiääd.

¹⁸Gunabdiidx Zacaríi loj anglga, räjpni: ―¿Xho mood gacbeä guliilu? Sa'csi anacä beṉgol, sigajcza chälä.

¹⁹Dxejcti räjp anglga lojni: ―Narä nacä Gabriel, runä dzuun lo Dios. Laani baxhaḻni narä te guininää́ luj, jiädnää́ didxhueenre lojlu.

²⁰Luxh ṉaj, sa'csi dilajzlu nilii xtidxä, sia'nlu gop, digacdiru guiniilu, cheni gaalli xi'nlu sinisaclu. Rextidxä sisiojb che guidzujṉ dxej che riäjḻ gacni.

²¹Laḻni cayajc dee, cadxeloj rebejṉ ni suga' nez ro' yudxan cabäjzreni guiṟii Zacaríi sa'csi cayaclaani neṉ yudxan.

²²Che biṟii Zacaríi, di niajcdiru niniini loj rebejṉ; dxejc gucbeereni yu' xhi cosro bahuiini neṉ yudxan xten guidoo. Dxejc con seen guninäjni rebejṉga, sa'csi xheti xse'ni te niniini.

²³Che gulujx bejnni dzuun neṉ guidoro, gubi'ni rolijzni.

²⁴Che gudejd redxej dxejcti bazeṉ nuu Elisabe't, chäälni, bäz, gaii bäii diruni niṟii rolijzni. Bejnni xhigab, räjpni:

²⁵“Si'c bejn Dad Dios narä ṉaj, gucnäjni narä te diru bejṉ cuälaz narä sa'csi ruti xi'nä.” Biäddeed te xangl Dios diidx lo Marii gaal Jesús

²⁶Che gudejd xho'p bäii, baxhaḻ Dios xanglni Gabriel lo te guedx Galilee ni laa Nazare't,

²⁷te chahuiini te dxapxteeb ni laa Marii. Agojt xtiidxni te guchṉaani te dade' ni laa José. Dade're najc xagdoo toṟeii David.

²⁸Biu' anglre cadro sobga' dxape'ga, räjpni lojni: ―Xchan, dxa'p ni sanälajz Dios, ni agule Dios loj guiraa regunaa. Dios gacnäjlu. Abenle' Dioslu loj guiraa regunaa.

²⁹Luxh che bahuiini lo xangl Dios bidxelojni lo rextiidxni, rujnni xhigab: “¿Xhicuent caniini si'c loä?”

³⁰Dxejc räjp xangl Dios lojni: ―Na'c guidxejblu, Marii; agule Dios luj.

³¹Bacuadiajg diidx. Suulu bäz, su' te xi'nlu. Che gaalni guirilajni Jesús.

³²Laani sajcni te bejṉ ni sacduxh. Sirilajzani Xi'n Gueb Dios ni yu' xhaguibaro. Gueb Dios sujn gacni ṟeii sigajc ni gujc toxtadgoldooni David,

³³te tejpas guinibeeni loj rexi'n Israel, luxh dipac xcäḻrnibeeni nitloj.

³⁴Dxejc gunabdiidx Marii lo xangl Dios, räjpni: ―¿Xho mood gac dee? Ni dxapxteeb narä, gajd narä gumbeä niguii.

³⁵Badzu' xangl Dios diidxre lojni, räjpni: ―Sprit Dxan xten Dios siääd lojlu, xcäḻrnibee Gueb Dios ni yu' xhaguibaa suhuajcwni luj si'c te za. Ni'cni bäz ni gaal sajcni te beṉdxan, sibälaj bejṉni Xi'n Dios.

³⁶Näjza sa'lu Elisabe't su' te xi'nni luxh anajcni te beṉgool; ni'cni gunaa nani najreni digacdi chu xi'nni agujc xho'p bäii nuuni bäz.

³⁷Xheti te cos ni naganduxhtej nez loj Dios ―räjp Xangl Dios.

³⁸Dxejcti räjp Marii: ―Narä nacä xmos Xtadnu Dios; mbaj, sugunnäj Dios narä si'ctisni gunii gueblu loä. Dxejcti biunejz angl xten Dios lojni, sä'tini. Bihuii Marii lo Elisabe't

³⁹Neṉ redxejga, basquejn Marii sääni lo te guejdx ni tre' neṉ redajn xten Judea.

⁴⁰Biu'ni rolijz Zacaríi, guniini xtidxbee loj Elisabe't.

⁴¹Che biejn diajg Elisabe't guniini, biniib xi'nni xque'ni, gudxaj Sprit Dxan xten Dios lastoo Elisabe't.

⁴²Dxejc dipduxh guniini räjpni: ―Abenle'ru Gueb Dios luj loj guiraa regunaa. Abenle'zani xi'nlu.

⁴³¿Chu narä te siädhuii xnan Xtioozä narä?

⁴⁴Biejntis diagä xtiidxlu, bibalazgajc xi'nä, biniibni xque'ä.

⁴⁵Sibaa lajzlu, luj ni huililajz sisiojbpac nani gunii Xtadnu Dios.

⁴⁶Dxejc räjp Marii:Xaimä rliä'p xpala'n Xtadnu Dios.

⁴⁷Rbalazduxhza lastoä xcuent Dios ni rusḻaa narä lo dojḻ.

⁴⁸Sa'csi agule Dios narä,nacä te mos gunaa ni xhet sajcdi,luxh ṉajli sinii rebejṉ näjza reni churu chu lo guedxliuj,chicbaani loj guiraa regunaa.

⁴⁹Sa'csi Gueb Dios ni rajp guiraa yäḻrnibee abejn xhidajl cosro loä,dxanduxh najc lajni.

⁵⁰Dini cuääz gulaslajzni guiraa rebejṉ ni riu xtiidxni, reni rajṉni.

⁵¹Xhidajl cosnagajn abejnni con lagajc ṉaani,abatie'chni renani rustioob lastooreni rliä'p lagajc xpala'nreni.

⁵²Abasajbni reni rnibee,per rebeṉnadolajz bejnni gacreni beṉro.

⁵³Bachajni xque' reni calaan,badeedni ganax cossa'c,niluxh badzu'ni rebejṉ ni yu' xhixtenreni xhet badeed dini lojreni.

⁵⁴Gucnäjni nacióṉ xten xpejṉ Israel, ni najc xmos Dios.Di lajzni niäḻ nulaslajznireni

⁵⁵sa'csi si'c bia'nni diidx con retoxtadgoldoonu,sinuu gulazlajzni toAbram näjza rexagdooni par tejpas.

⁵⁶Dxejc bia'n Marii rolijz Elisabe't si'cti choṉ bäii, dxejc gubisacni rolijzni. Che gojl Juan ni rutiobnis

⁵⁷Che baza' xpäi Elisabe't, dxejc gojl xpäzni te bäz niguiini.

⁵⁸Dxejc bidzujṉ rexpisiṉni näjza resa'ni biädhuiireni guiro'preni che gucbeereni lacti hueen gujc Dios con laani. Bibalaznäjrenini.

⁵⁹Che gudejd xhujṉ dxej, huinäreni bäze'ga chuni bee. Rlajz rebejṉ nirilaj bäze'ga si'c laa xtadni, Zacaríi.

⁶⁰Niluxh xnanni räjp: ―Na'c, guirilajpacni Juan.

⁶¹―¿Xhicuent? ―räjpreni―. Ruti xfamiḻlu ni laa si'c.

⁶²Dxejcti gunabdiidxreni con seen lo xtad bäze'ga te gacbeereni xho rlajzni guirilaj bäze'ga.

⁶³Xtadni gunab te la' guijtz, dxejc bacuaani: “Lajni najc Juan.” Dxejc guiraareni bidxelojreni.

⁶⁴Luxh lagajc dxejc gujc gunii Zacaríi stehuält, dxejc guslojni calä'pni xpala'n Dios.

⁶⁵Bidxeloduxh rexpisiṉreni xhini'c gujc ro'c. Luxh bire'ch diidx xcuent recosre guideb neṉ redajn xten Judea.

⁶⁶Guiraa reni biejn diajg rediidxga gusloj cayujnreni xhigab, dxejc gunabdiidxreni loj sa'reni: ―¿Chuchani'c gac biuxe'ga? Si'c guniireni sa'csi huenliisi abenle' Diosni. Dij ni biḻ Zacaríi

⁶⁷Dxejcti biääd Sprit Dxan xten Dios neṉ lastoo xtadni Zacaríi, gusloj caniini rediidx ni badeed Dios lojni, räjpni:

⁶⁸Guiliä'pnu xpala'n Dios, Xtios rexpejṉ Israel,sa'csi abiädhuiini loonu, ni najcnu rexpejṉni,te siädgusḻaani nuurnu neṉ dojḻ.

⁶⁹Abaxhaḻni loonu te bejṉ ni rajp yäḻrusḻaduxh bejṉ neṉ dojḻ.Najcni te rexagdoo toxmosni David.

⁷⁰Lagajc si'cni badeed Dios gunii redade' ni bacuaa xtiidxni lo guijtz galoo:

⁷¹Susḻaani nuurnu loj reni rdxe'ch loonu,näjza ladzṉaa rebejṉ ni gulälaz nurnu.

⁷²Te gulaslajzni retoxtadgoldoonu,te soob diidx ni bia'nni con rebejṉga.

⁷³Scree bia'nni diidx con toxtadgoldoonu, Abram:

⁷⁴Susḻaani nuurnu ladzṉaa rebejṉ ni rdxe'ch loonu,te na'c guidxeebnu chunu lojni gusoobnu xtiidxni,

⁷⁵con yäḻnabaṉsa'c näjza yäḻguxhtis guiraa redxej ni guibajṉnu.

⁷⁶Luxh luj, bäze', sirilajlu dade' nani rnii xtidx Gueb Dios ni yu' xhaguibaa,sa'csi sinijdlu lo Dad te gusucheelu rexnezyulajzni,

⁷⁷te gunlu gacbee rexpejṉni xho gac ḻaani lo dojḻ,te gac guibicaj xtojḻreni.

⁷⁸Sa'csi Dios sanälajz bejṉ,näjza rulaslajzni bejṉ ni'cni xhaguibaali suxhaḻni xi'nni te jiädnäni te dxecoob,

⁷⁹te gusanijni lo rebejṉ ni nabajṉ lo yäḻxcäjy xten dojḻ,näjza rebejṉ ni nabajṉ lo xpalaa yäḻgujt,te guluiini xho sánu lo xnez yäḻrbecdxilajz.

⁸⁰Dxejc gunís biuxe'ga, guyuduxh xcäriejnni xcuent recos xten Dios. Gubajṉni nez loj reyubijdz cheni bidzujṉli dxej che baluilojni loj rexpejṉ Israel, che gusloj cagusule'ni xtidx Dios.