Read Mitla Zapotec Lucas 14 Bible Online

Lucas 14 - Mitla Zapotec bible

Lucas 14

¹Che gojl te dxej ni rusilajz rexpejṉ Israel, huitajw Jesús rolijz tej ni rnibee loj refarisee. Cagula'tz gaii refarisee, guidon xhini'c gun Jesús,

²sa'csi nez loj Jesús suga' te dade' ni guidxa guij tiejxhni.

³Dxejc gunabdiidx Jesús lo rebejṉ ni ruluii leii näjza lo refarisee, räjpni lojreni: ―¿La sajc gusiajcni te beṉracxhuu dxej ni rusilajz bejṉ o la di gacdini?

⁴Per laareni dxitis suga'reni, niäutis ro'reni. Dxejc cua' Jesús beṉracxhuuga, basiajcnini, gunibeezani biunejzni.

⁵Dxejc räjpni loj refarisee: ―Chu la'tu ni rajp te buṟ o te gon, palga jiajbni neṉ te bisie, ¿la ditu chalägajcni mase najcni dxej ni rusilajz bejṉ, ä?

⁶Dxejc di niajcni nudzu'reni diidx lojni. Reni bidoṉ chää sa'

⁷Cheni bahuii Jesús xho rchaglajz rebejṉ rbereni latsa'c te cuereni cuä' rebejṉro, bijni te cuent ni ruluii lojreni, räjpni:

⁸―Cheni guidoṉtu chäätu te sa', na'c guntu te cuetu cuä' rebeṉro, te di guidzujṉ te beṉroru lojlu,

⁹dxejc jiääd bejṉ ni cayujn lanij, naani lojlu: “Badeed cue dade're ro'c.” Dxejc situjylilu chacuelu ste'ca lajt lo le'li.

¹⁰Maazru hueen, cheni guidoṉlu chäälu te sa', huicue lo mex ni zuj lo le' te che guidzujṉ bejṉ ni cayujn lanij, naani lojlu: “Xamigwä, gudaa cuelu neṉ yu' cadro rbej rebeṉro.” Si'c sä'p xpala'nlu nez loj guiraa rebejṉ ni sobganäjlu lo mex.

¹¹Sa'csi ni rlajz chä'p xpala'nni nez loj rebejṉ, sianxtujyni nez lojreni. Luxh bejṉ ni najc nadolajz, sä'p xpala'nni nez loj guiraa rebejṉ.

¹²Räjpzani loj bejṉ ni cagudeed xhi gaureni: ―Cheni gunlu te lanij o guteedlu bejṉ lo xmexlu, na'c cueedxtislu rexamigwlu con rebejtzlu, con resa'lu, niclaza rexpisiṉlu ni najc ri'cw, sa'csi laareni sigajcza sibejdxreni luj che gunreni te lanij, luxh si'c agudijxreni ni badeedlu lojreni.

¹³Che gunlu te lanij, alga gurejdx rebeṉproob, rebeṉcoj, näjza rebeṉlotiä'p,

¹⁴dxejcti sibaa lajzlu sa'csi laareni di gacdi gunidxsacreni ni badeedlu lojreni; luxh si'c siguixsac Dios ni bejnlu che gaḻ dxej ni guibaṉsac rebejṉ loj rebeṉgut. Xcuent te laniro

¹⁵Che biejn diajg tej reni sobga' lo mex, räjpni loj Jesús: ―Chicbaa rebejṉ ni gau yätxtiil cadro rnibee Dios.

¹⁶Dxejc räjp Jesús lojni: ―Guyu' te dade' ni bejn te laniro rolijzni. Gunibeeni bidoṉ xhidajl bejṉ te jiädtaunäjrenini.

¹⁷Che bidzujṉ oṟ ni gaureni, baxhaḻ dade'ga te xmosni chatejdxni rebejṉ ni abidoṉ, räjpni lojreni: “Coḻchäj, asuchee lo mex.”

¹⁸Dxejc guiragajcreni gusloj cayäjb di gacdi chääreni. Tejni räjp: “Entis gusiä te la' yuj, luxh ṉaj nanab chahuiä xho najcni. Goslaa di gacdi jiäḻä.”

¹⁹Steeni räjp: “Gusiä gaii nejs gon, luxh nanab chahuiä xho rujnreni dzuun. Goslaa di gacdi jiäḻä.”

²⁰Steeni räjp: “Entis bachṉaä ni'cni di gacdi jiäḻä.”

²¹Che gubi' mosga, badeedni diidx lo xlam̲ni xhi räjp rebejṉga lojni. Dxejc bidxechduxh lam̲ga, räjpni lo xmosni: “Basquejn huij ladnezyuj näjza ladnezyuj dää, gudanä rebeṉproob, rebeṉcoj, rebeṉlotiä'p, rebeṉnatiujṉc.”

²²Si'c bejn mosga. Che gubi'ni räjpni lo xlam̲ni: “Dad, abenä si'c ni gunibeelu, luxh lajtru yagxhiil.”

²³Dxejc räjp lam̲ga lo xmosni: “Huij lo renezyuj ni sii loj reguedxzijt, gudanäj rebejṉ ni guidxaaglu nejzga, te cha bejṉ rolizä.

²⁴Rniliä lojtu, nicla tej reni bidoṉ ganid di gau xhuej nani benä.” Ni nanab gunni te chanajlni Crist

²⁵Laḻ sasaj Jesús lo nejz, xhidalduxh bejṉ sanajlni. Dxejc gubiréni, gusloj cayäjpni lojreni:

²⁶―Palga yu' chu tej ni jiääd loä, ni di cuälaz xtadni, xnanni, chäälni, rexi'nni, rebejtzni, näjza rebisiajnni, nägajcza xcäḻnabajṉni, di gacdi gacni te rexpeṉä.

²⁷Palga yu' chutis tej ni di rlajz tedni trabajw te jiädnajlni narä, di gacdi gacni te rexpeṉäpac.

²⁸Chu tejtu ni rlajz gun te yuro, ni di gunxgaa xhigab lacti meel chanä yu'ga, te guidon la sajc guluuxnini.

²⁹Didi cheni abejnni recimient, di gacdi guluuxnini, dxejc guiraa reni fii lojni suxhiznäjrenini,

³⁰säjpreni: “¡Bahuilaare! Bejṉre gusloj bencheeni te yu' per di niajcdi nuluuxnini.”

³¹¿Chu te ṟeii ni gun xhigab chachagdijḻni stee ṟeii, ni di gunxgaa xhigab don laa sajc gunni gaan con tzuu miḻ soldaad loj stee ṟeii ni siääd con gajḻ miḻ soldaad, ä?

³²Palga di gacdi gucuanäjnini, che gacbeeni zijtli siääd stee ṟeiiga, suxhaḻni te xpejṉni chanab yäḻrbedxi lojni.

³³Ni'cni palga chutis tejtu di gusaan rexhixtenni te jiädnajlni narä, di gacdi gacni te rexpeṉäpac. Che diru sejd gac nadzujy (Mt. 5:13; Mr. 9:50)

³⁴Räjpzani: ―Huen najc sejd. Per cheni diruni gac nadzujy, ¿xho gacru gac nadzujyni?

³⁵Xhetru sajcdini, nicla te chääni loj yuj, niclaza te chääni lo aboṉ. Gusäḻtis bejṉ sejdga. Reni rlajz gucuadiajg xtidxä, sucuadiagsa'creni.