Read Mitla Zapotec Lucas 20 Bible Online

Lucas 20 - Mitla Zapotec bible

Lucas 20

¹Te dxej suga' Jesús neṉ guidoro, caguluiini rebejṉ, cagusule'zani diidx xcuent xho guibicaj xtojḻreni, che bidzujṉ reni rnibee loj rebixhojz näjza rebejṉ ni ruluii leii näjza rebeṉgool,

²räjpreni lojni: ―¿Xhi yäḻrnibee rujnlu recosre? ¿Chu baniidx yäḻrnibeega lojlu?

³Dxejcti räjp Jesús lojreni: ―Narä sigajcza gunä te yäḻgunabdiidx lojtu, coḻgudzu' diidxre loä,

⁴¿chuni'c baxhaḻ Juan te gutiobnisni rebejṉ? ¿La Dios o la rebejṉ, ä?

⁵Niluxh laareni guslojreni canabdiidx lo sa'reni, räjpreni: ―¿Xhichani'c jie'tznu? Palga jie'tznu Dios baxhaḻni, dxejc naani loonu: “¿Xhixhcuent ditu ninilajz xtiidxni?”

⁶Palga jie'tznu: “Rebejṉ baxhaḻni”, guiraa rebejṉ sucuaa guij yejcnu, ju'tlireni nuurnu sa'csi laareni rujnpacreni xhigab gunii Juan xtidx Dios.

⁷Dxejc badzu'reni diidxre, räjpreni: ―Dinu guidon chuni'c baxhaḻ Juan te biädtiobnisni.

⁸Dxejc räjp Jesús lojreni: ―Dizana guiniä xhi yäḻrnibee rapä te runä recosre. Xcuent remosguijdx (Mt. 21:33‑44; Mr. 12:1‑11)

⁹Dxejc gusloj canii Jesús loj rebejṉ, bijni cuentre lojreni, räjpni: ―Guyu' te bejṉ bazuj yaguub lo xyujni. Dxejc badedlaanini lo gaii bejṉ chääreni meed, sä'tnini zijt, gucladuxhni ro'c.

¹⁰Che bidzujṉ dxej ni guidojp cose'ch, baxhaḻni te xmosni sanab cose'ch ni riäjḻ xca'ni. Per laareni gudijnreni mosga, xhetliidi badeedreni chanäni lo xpaxhuaan yujga.

¹¹Dxejcti baxhaḻni stee mos lojreni. Dxejc sigajcza gudiḻnäjrenini, gudijnrenini, luxh xhetza badeeddireni lojni, ganaxni gubi'ni lo xlam̲ni.

¹²Dxejcti baxhaḻni ni riojṉ mos lojreni, per sigajcza gudinduxhrenini, barilaagwrenini.

¹³’Dxejc bejn baxhuaanga xhigab, naani: “¿Xhichani'c gunä? Suxhaḻä xi'nä ni sanälazä; che fiireni lojni, pet siureni xtiidxni.”

¹⁴Dxejc che bahuii reni go'n-meed lo xi'nni, dxejc räjpreni lo sa'reni: “Laa deeni gac xtenni reyujre. Do'o guigu'tnuni te nuurnu xca'nu yujre gacni xtennu.”

¹⁵Dxejcti barilaagwrenini lo yujga, sas bagu'trenini. Dxejc gunabdiidx Jesús lojreni, räjpni: ―¿Xhichani'c gunnäj xpaxhuaan yujga rebeṉ guijdxre, ä?

¹⁶Sidzujṉni, sugu'tni guiraa reni cayujn dzun-meed lo yujga, dxejc sudeedni yujga lo garenca bejṉ. Che biejn diajgreni rediidxre, räjpreni: ―¡Na'c gusaan Dios gacni si'c!

¹⁷Bahuii Jesús lojreni, dxejc räjpni: ―¿Xhixhni'c caj lo guijtz ni bacuaa redade' ni gunii xtidx Dios galoo? Ro'c cajni:Guij nani guläcaj renani runchee yu',ni'c agujc guisa'c ni guzuj galoo.

¹⁸Chutis ni jiajb yejc guijga, sianduxhni, per nani jiajb guijga yejcni siujypacni, li däj gacni. Xcuent reimpuest (Mt. 21:45‑46; 22:15‑22; Mr. 12:12‑17)

¹⁹Reni rnibee loj rebixhojz, näjza reni ruluii leii rlajzreni guiniaazreni Jesús lagajc oṟga, sa'csi gucbeereni lojreni gunii Jesús cuentre, luxh xhet bejndireni sa'csi rdxejbreni rebejṉ.

²⁰Dxejc cagula'tztisrenini, baxhaḻreni gaii bejṉ te gunsireni si'c ni najcreni beṉdxan, te gucuadiajgreni xtiidxni don gaxäjssi guiga'ni lo te diidx te guteedrenini lo yäḻguxhtis, yäḻrnibee xte gubernadoor.

²¹Dxejc gunabdiidxreni lojni, räjpreni: ―Dad, Mastr, nadonnu laaca rnii guejblu, laaca ruluii guejblu, luxh di guejblu fixgaa la yu' chu najc bejṉ, ruluisa'c guejblu xnez lo Dios.

²²Gunilaa loonu, ¿la laaca guidiixnu reimpuest loj xcubieer César o la xhet laadini, ä?

²³Sas gucbegajc Jesús cayujnsireni yäḻgunabdiidxga, dxejc räjpni lojreni: ―¿Xhicuent runnäjtu narä scree?

²⁴Baluii loä te xmeeltu. ¿Chucha yejc caj lojni, chucha laj caj lojni? Dxejc räjpreni: ―Xten César.

²⁵Dxejc räjpni lojreni: ―Coḻdeed lo César nani najc xten César; coḻdeedza lo Dios nani najc xten Dios.

²⁶Luxh direni niujn gaan niga'ni loj nicla te diidx ni guniini nez loj rebejṉ. Rdxelojtisreni lo rextiidxni, biäuti ro'reni, guzudxireni. Rniabdiidxreni xcuent yäḻrbaṉsac lo rebeṉgut (Mt. 22:23‑33; Mr. 12:18‑27)

²⁷Dxejc huij gaii resaduceos huihuiireni loj Jesús. Di resaduceos chalilajz rbaṉsac bejṉ lo rebeṉgut. Ni'cni gunabdiidxreni loj Jesús,

²⁸räjpreni: ―Dad, Mastr, basa'n Moisés guijtz loonu, lojga caj: “Palga guet te bejṉ, gusaanni chäälni ruti xi'nni, nanabpac xca' bejtzni gunaaga te chu xi'nni con laani xcuent tobejtzni.”

²⁹Guyu' gajdz niguii, bejtz najcreni. Sas cua' niguigalooga chäälni. Che gujtni ruti xi'nni.

³⁰Dxejcti cua' ni ṟojpga gunaaga. Che gujtni, rutiza xi'nni.

³¹Sigajcza guzajc ni riojnga. Si'cza guläsnäj gunaaga guigajdzreni. Guiraareni gujt, nicla tejreni di xi'nreni niu'.

³²Dxejcti näj gunaaga gujt.

³³Guigajdzreni guläsnäjreni gunaare, ni'cni, che guibaṉsacreni lo rebeṉgut, ¿chu chääl gacni, ä?

³⁴Dxejc räjp Jesús lojreni: ―Lo guedxliujre ruchṉaa rebejṉ, rudeedzareni xindxa'preni ruchṉaa.

³⁵Niluxh rebejṉ ni agule Dios te chääreni xhaguibaa, näjza te guibaṉsacreni loj rebeṉgut, di reni'c guchṉaa, dizareni gudeed xindxa'preni guchṉaa,

³⁶sa'csi diru gac guetreni, anajcreni si'c najc rexangl Dios. Laareni najc xi'n Dios sa'csi abaspaṉsac Diosreni.

³⁷Moisésli basule' xcuent ni rbaṉsac rebeṉ loj rebeṉgut che bacuaani diidx xcuent yajg ni gurebajl. Ro'c gurejdxni Dios räjpni: “Xtios Abram, Xtios Isaac, näjza Xtios Jacoob”, ni'cni nabajṉpacreni lo Dios.

³⁸Sa'csi di Dios gac Xtios rebeṉgut; najcni Xtios rebejṉ ni nabajṉ par tejpas, sa'csi par laani guiraa rebejṉ nabajṉ.

³⁹Dxejc gaii reni ruluii leii badzu'reni diidxre, räjpreni lojni: ―Mastr, laaca guniilu.

⁴⁰Sa'csi dirureni niajx niniabdiidxrureni lojni. Chu xi'n najc Crist (Mt. 22:41‑46; Mr. 12:35‑37)

⁴¹Dxejcti räjp Jesús lojreni: ―¿Xho mood rniireni Crist najc xi'n toDavid, ä?

⁴²Ni lagajc toDavid bacuaa lo reguijtz ni laa reSalmo:Dad Dios räjp lo Xtadä:

⁴³“Gurej xladbeä cheni guidzujṉli dxej ni gudzugä guiraa ni rdxe'ch lojlu te gacbeereni luj rnibeelu guira'ti.”

⁴⁴¿Xho mood gacni xi'nni palga rnii toDavid lojni “Dad”? Rucuaquij Jesús reni ruluii leii (Mt. 23:1‑36; Mr. 12:38‑40; Lc. 11:37‑54)

⁴⁵Guiraa rebejṉ cagucuadiajg che räjp Jesús loj rexpejṉpacni:

⁴⁶―Coḻyajp cuidaad reni ruluii leii, sa'csi rdxaglajzreni rajcwreni lajd siool, rlajzreni saru guinii guiraa rebejṉ “xchan” lojreni, rlajzreni jiu bejṉreni nez loguii, rlajzreni cuereni lo reyagxhilsa'c neṉ reguidobäz, näjza cadro rajc lanij.

⁴⁷Rudzucajzareni rexhixten regunabiuud, dxejc roḻreni rele' siolduxh che rniabreni lo Dios te fii rebejṉ, te naa bejṉ najcreni beṉdxan, luxh lojreni suxhaḻ Dios te castigwroru.