Read Mitla Zapotec Lucas 22 Bible Online

Lucas 22 - Mitla Zapotec bible

Lucas 22

¹Siäddzuṉgajxh dxe lanij che rajwreni yätxtiil ni di säguij, laaza lanijga pascw.

²Dxejc reni rnibee loj rebixhojz näjza rebejṉ ni ruluii leii caguiilreni xho gunreni te ju'treni Jesús, sa'csi rdxejbreni rebeṉguejdx.

³Dxejc biu' beṉdxab lastoo Judas ni laaza Iscariote, ni najc tej retzubitio'p xpejṉpacni.

⁴Dee huininäjni dade' ni rnibee loj rebixhojz näjza loj reni rnibee rexcuxhtis guidoo. Guninäj Judasreni xho gunni te guteedni Jesús ladzṉaareni.

⁵Dxejc bibalajzreni, bia'nreni diidx gudeedreni meel lojni.

⁶Cuäjbti Judas, dxejcni guslojni caguiilni xho gunni guteedni Jesús ladzṉaareni che rut bejṉdi suga'. Xchej xten Dad Jesús (Mt. 26:17‑29; Mr. 14:12‑25; <a href='B:500 13:21'>Jn. 13:21‑30; <a href='B:500 01:1'>1Co<a href='B:500 11:23'>. 11:23‑26)

⁷Bidzujṉ dxe lanij che rajwreni yätxtiil ni di säguij, che rugu'tzareni te xiil si'c ni caj lo xleii toMoisés.

⁸Dxejc baxhaḻ Jesús Pedr näjza Juan, räjpni lojreni: ―Coḻchayejn xchej xten pascw te guidaununi.

⁹Dxejc laareni gunabdiidxreni lojni, räjpreni: ―¿Caro rlajzlu choyennuni?

¹⁰Räjp Jesús lojreni: ―Cheni jiu'tu lo guejdx, sidxaagtu te dade' ni nuu te re' nis. Coḻchanajlni, coḻjiu' rolijz bejṉ cadro jiu'ni laani.

¹¹Dxejc coḻye'tz lo bejṉ ni najc rolijzni ro'c: “Si'c naj Dad Mastr: ¿Con yu' cadro sajc gauxchenää́ rexpeṉä ṉaj pascw?”

¹²Dxejc guluiini lojtu te yu' ni sojb jiaa yejc stee yu'. Asuchexgaa yu'ga. Ro'c coḻyejn xhi guidaunu.

¹³Sä'tireni. Si'ctis ni räjp Jesús lojreni, si'cpac bidxälreni. Dxejc bejnreni xchej xte lanij pascw gaureni.

¹⁴Che bidzujṉ oṟ, gurenäj Jesús rexpejṉpacni lo mex.

¹⁵Dxejc räjpni lojreni: ―Guyuduxhä gaan gaunää́pactu xchej xten pascw ansde tedä trabajwduxh.

¹⁶Sa'csi rniä lojtu, diruna gaunää́ la'tu pascw cheni guidzujṉli dxej ni gacni lo xcäḻrnibee Dios.

¹⁷Dxejc cua'ni te co'p, badeedni xquixtios lo Dios, räjpni: ―Coḻyä' dee, coḻgudeedni lo sa'tu.

¹⁸Sa'csi rniä lojtu, diruna yä'ä nis ni rii yejc uub stehuält cheni guidzujṉli xcäḻrnibee Dios.

¹⁹Dxejcti cua'ni yätxtiil, badeedni xquixtios loj Dios, gula'nini, gudisnini lojreni, räjpni: ―Dee najc si'c tiexhä ni gudedä ju'treni xcuenttu. Coḻyejn screeza te guinalajztu narä.

²⁰Si'cza bennäjni co'p che gulujx gudajwreni, räjpni lojreni: ―Ni yu' neṉ co'p najc si'c xtienä ni guixe' che ju'treni narä xcuenttu te si'c jiu' didxcoob ni jia'n Dios con rebejṉ ni aguleni.

²¹’Per bahuilaare, bejṉ ni guto' narä sobganäj narä lo mexre.

²²Guliipacni, Xi'n Dios ni gujc Niguii sinuu tedni loj nezyuj ni abaluii Dios lojni. Luxh proobza bejṉ ni guto' narä.

²³Dxejc gusloj canabdiidxreni lo sa'reni, ¿chuchani'c gunni? Cayejyreni chuni'c najc beṉroru

²⁴Sas gusloj cayejyreni, don chuni'c guibee gac beṉro lojreni.

²⁵Dxejcti räjp Jesús lojreni: ―Reṟeii ni rnibee lajdx bejṉ ni digac xpejṉ Israel, rnibeereni lojreni astoo xtenpacreni najc reguejdxga. Luxh rebeṉguejdxga rnii lacti hueen najc reṟeiiga.

²⁶Per la'tu na'c gactu si'c. Nani najc beṉgoolru lojtu, ni'c riäjḻ gacni si'c najc ni huinru lojtu. Luxh nani rnibee riäjḻ gacni si'c mos.

²⁷¿Chuni'c sajcru lo bejṉ? ¿La bejṉ ni rbej lo mex te gauni o la ni ruteed xhi gaureni lo mex? ¿La xhet sajcdiru bejṉ ni sojb lo mex, ä? Niluxh narä yu'ä lojtu si'c ni ruteed xhi gauni.

²⁸’La'tu najctu ni gusunäj narä guideb ni gudedä retrabajw ni gudedä.

²⁹Ni'cni narä runidxä yäḻrnibee lojtu sigajc ni baniidx xtad yäḻrnibee loä,

³⁰te gautu, yätu lo xmexä xhaguibaa, te cuezatu lo yagxhil cadro guntu yäḻguxhtis loj rexpejṉ guitzubitio'p rexagdoo Israel. Räpxgaa Jesús di Pedr guicäjp numbeeni (Mt. 26:31‑35; Mr. 14:27‑31; <a href='B:500 13:36'>Jn. 13:36‑38)

³¹Räjp Jesús loj Simón: ―Simón, Simón, agunab beṉdxab ni laa Satanás luj te gusniibni luj si'c rusniib bejṉ xob te jiani.

³²Narä agunabä lo Dios xcuentlu te na'c jiäädx xcäḻrililajzlu. Luxh luj che gusiejch lajzlu, guibi'lu, bastioob lastoo resa'lu.

³³Räjp Simón lojni: ―Dad, narä sirinalälu; mase gusäureni luj latzguiib, näjza narä siäunää́lu; mase ju'treni luj, näjza narä setnää́lu.

³⁴Dxejcti räjp Jesús loj Simón: ―Pedr, rniä lojlu, nicla gajd guidgaii cuedxa' nadxej niluxh luj alaräjplu choṉli huält, dipaclu gumbee narä. Nanab soob rediidx ni bacuaareni xcuent Jesús

³⁵Dxejc gunabdiidx Jesús lojreni räjpni: ―Che ganaxtu baxhaḻä la'tu, xhet bolsdi sanätu, nicla carteerdi, niclaza stee gura'chdi, ¿la yu' xhi biquiintu, xhi biäädx lojtu, ä? Dxejc räjpreni: ―Xheti.

³⁶Dxejc räjpni lojreni: ―Luxh ṉaj rniä lojtu, ni rajp bols, suchanänini; sigajcza carteer. Luxh ni di ga'p espaad, guto'ni xchamarni te siini tejni.

³⁷Sa'csi rniä lojtu, sisiojb rediidx ni caj lo requijtz Dios xcuentä, cadro caj: “Bigabnäjni rebeṉ latsiaj.” Guiraa ni caj lo reguijtz xten Dios xcuentä nanab soobpacni.

³⁸Dxejc räjpreni lojni: ―Dad, aree tio'p espaad. Dxejc räjpni lojreni: ―Sajl reni'c. Rbedx-rniab Jesús loj Dios (Mt. 26:36‑46; Mr. 14:32‑42)

³⁹Dxejcti birii Jesús, si'cni rujnpacni, sääni nez dajn ni laa Oliib. Dxejc sanajl rexpejṉpacni.

⁴⁰Che bidzujṉreni ro'c, räjpni lojreni: ―Coḻcuejdx, coḻnab lo Dios te na'c jiajbtu lo dojḻ.

⁴¹Dxejc gubicaj Jesús lojreni, huijni te lajt zite' cadro suga'reni, si'cti cadro rdzujṉ te guij che rucuaanini. Ro'c bazuxhijbni, gurejdx-gunabni lo Dios,

⁴²räjpni: ―Xtadä, palga rlajzlu, basḻaa narä loj trabajwduxhre. Niluxh na'c gacni si'c ni rlazä narä. Bejn si'cni rlajzlu gunlu.

⁴³Dxejc biricaj te xangl Dios lojni te badeedni yäḻrutiplajzni.

⁴⁴Laḻni cadejdni trabajwduxh, cayac-huinduxh lajzni, cabedx-canabruni lo Dios. Guzunislini gusloj catejb lo yuj biniduxh si'c rejn lojni.

⁴⁵Cheni huisuni, gulujx gurejdx-gunabni lo Dios, huijni cadro suga' rexpejṉpacni. Ro'c bidxälnireni nagayejs guiraareni sa'csi cayac-huin lajzreni.

⁴⁶Dxejc räjpni lojreni: ―¿Xhicuent nagayejstu? ¡Coḻchastie! ¡Coḻnab lo Dios te na'c jiajbtu lo dojḻ! Che gunaazreni Jesús (Mt. 26:47‑56; Mr. 14:43‑50; <a href='B:500 18:2'>Jn. 18:2‑<a href='B:500 11:1'>11)

⁴⁷Laḻ ni canii Jesús lojreni, bidzujṉ xhidajl bejṉ. Tej rexpejṉpacni ni laa Judas, nijdni nez loj rebejṉga. Dxejcti gubigni loj Jesús, te bachagro'ni loj Jesús.

⁴⁸Dxejc räjp Jesús lojni: ―Judas, ¿la con te yäḻruchagro' ruteedlu Xi'n Dios ni gujc Niguii ladzṉaa rebejṉre, ä?

⁴⁹Che bahuii reni suganäj Jesús xhini'c cayajc ro'c, gunabdiidxreni loj Jesús, räjpreni: ―Dad, ¿la sixa'tnu yejcreni con spaad, ä?

⁵⁰Sas tej rexpejṉ Jesús gudiḻnäj te mos xten ni rnibee loj rebixhojz, batiu'ni diajgni ladbee.

⁵¹Dxejc räjp Jesús lojreni: ―¡Agujc! ¡Coḻgusaanreni! Dxejc gudajn Jesús diajg mosga, basiajcnini.

⁵²Gunigajc Jesús loj reni rnibee loj rebixhojz näjza reni najc guixhajg xten guidoo näjza rebeṉgool, guiraa reni siädxiinini, räjpni: ―¿La siädnätu spaad näjza garo't, astoocanu siädxiitu te gubaan, ä?

⁵³Cheni suga'a lojtu guixe-guixee neṉ guidoo, ditu nuhuaḻ narä. Per dee najc xoṟtu, luxh arnibee yäḻnacäjy la'tu. Di Pedr guicäjp numbeeni Jesús (Mt. 26:57‑58, 69‑75; Mr. 14:53‑54, 66‑72; <a href='B:500 18:12'>Jn. 18:12‑<a href='B:500 18:1'>18, 25‑27)

⁵⁴Dxejcti gunaazreni Jesús huinärenini rolijz bixhojz ni rnibee lo guiraa rebixhojz. Siädnäjl Pedrni zit-zijt.

⁵⁵Che bidzujṉreni gule'creni guiboo galäii lole' xten bixhojzga, gurejreni guideb gabi, te bidxa' lajzreni. Näj Pedr nadxaag lojreni gurej ro'c.

⁵⁶Dxejc te gunaa ni rujn dzuun ro'c, che bahuiini sobga' Pedr ro'c, rdxelojtisni lojni, räjpni: ―Näj niguiire guyunäj Jesús.

⁵⁷Dxejc basuni' Pedr räjpni: ―Nan, dina gumbeäni.

⁵⁸Che gojl stera't, che bahuii stee bejṉ lojni, räjpni lojni: ―Näj luj najclu te rexpejṉni. Per Pedr räjp lojni: ―Gurniälojlu, Dad, dina gacä xpejṉni.

⁵⁹Che gudejd si'cti teb oṟ, räjp stee bejṉ lojni: ―Guliipacni, näj bejṉre guyunäjni, sa'csi laani najczani te beṉ Galilee.

⁶⁰Dxejc räjp Pedr lojni: ―Gurniälojlu Dad, dipacna ganä xhini'c caniilu loä. Laḻni canii Pedr rediidxre, guredxa' te guidgaii,

⁶¹luxh gubiréza Jesús, bahuidzu'tzni lo Pedr, dxejc banalajz Pedr nani gunii Jesús lojni, räjpni: “Che gajd guidgaii cuedxa', abazuni'lu choṉ huält, räjplu dilu gumbee najrä.”

⁶²Dxejcti guc-huin lajz Pedr, biriini ro'c, ronduxhni. Rniyajreni Jesús (Mt. 26:67‑68; Mr. 14:65)

⁶³Rebejṉ ni canäj Jesús, gusloj caguxhisnäjrenini, caguijnzarenini.

⁶⁴Dxejc basäureni lojni, gudajpreni lojni, räjpreni lojni: ―¡Gunii chuni'c gudijnlu!

⁶⁵Luxh guiraloj cayäjbreni lojni, caniyaduxhrenini. Bidzuṉnäjreni Jesús nez loj rebixhojz (Mt. 26:59‑66; Mr. 14:55‑64; <a href='B:500 18:19'>Jn. 18:19‑24)

⁶⁶Che bara yääl, bidojp rebeṉgool ni rnibee, näjza reni rnibee loj rebixhojz, näjza rebejṉ ni ruluii leii, huinäreni Jesús te suuni nez lojreni neṉ yu' cadro rujnreni yäḻguxhtis. Dxejcti räjpreni lojni:

⁶⁷―Palga luj najclu Crist, bicäjpni loonu. Dxejc badzu' Jesús diidxre lojreni, räjpni: ―Palga guicäpäni, ditu chalilajz.

⁶⁸Luxh palga gunä te yäḻgunabdiidx lojtu xcuent Crist, ditu gudzu' diidxga loä.

⁶⁹Per ṉajli sibej Xi'n Dios ni gujc Niguii xladbee Gueb Dios ni yu' xhaguibaa.

⁷⁰Dxejc gunabdiidx guiraareni lojni, räjpreni: ―Mbaj pues, ¿la luj najclu Xi'n Dios, ä? Dxejc badzu' Jesús diidxre lojreni räjpni: ―Nacäni, si'cni najtu la'tu.

⁷¹Dxejc räjpreni lo sa'reni: ―¿Xhirucxhamaaz rlajztu? Dirunu guiquiin diidx guinii bejṉ, sa'csi lagajc nuurnu abiejn diajgnu diidx ni guniini lagajc laani.