Read Mitla Zapotec Lucas 24 Bible Online

Lucas 24 - Mitla Zapotec bible

Lucas 24

¹Dxej ni gusloj xmaanga, rsildooru huinä regunaaga robaa recuaan ni rlianejxh ni bencheereni.

²Che bidzujṉreni, bahuiireni agubicaj guij ni rusäu ro' baa.

³Dxejc che biu'reni neṉ baaga, direni nidxäl tiejxh Jesús.

⁴Laḻ ni cadxelojreni, di jieṉ xhi gunreni, biricaj tio'p dade' gusuj cuä'reni. Rdimbichaduxh xhajbreni.

⁵Bidxebduxh regunaaga, basajbreni lojreni lo yuj. Dxejc räjp redade'ga lojreni: ―¿Xhicuent siädtiiltu te bejṉ ni nabajṉ lo rebeṉgut, ä?

⁶Rutini ree. Agubaṉsacni. Coḻgusnaj lajztu rediidx ni guniini cheni guyusijcni Galilee,

⁷che najni lojtu: “Riäjḻ jiajb Xi'n Dios ni gujc Niguii ladzṉaa rebeṉdojḻ, xcajzani lo crujz, dxejc ni riojṉ dxejga sibaṉsacni loj rebeṉgut.”

⁸Dxejc banaj lajz regunaa xtidx Jesús,

⁹biriireni robaa, gubi'tireni te bijreni diidx lo retzubiteeb rexpejṉpacni näjza loj rebejṉ ni yunäjreni.

¹⁰Reni huisa'n diidx loj rexpejṉpac Jesús najc redee: Marii Magdaleṉ, näjza Xuan, näjza Marii xnan Jacoob, näjza sgaii gunaa.

¹¹Niluxh rexpejṉpacni bejn xhigab didxnayäälni, direni nililajz xtidx regunaaga.

¹²Dxejc huisu Pedr, ruxuṉlini huijni ro' baa. Che gudixhlojni, bahuiini neṉ baaga, ganaxtis bariaad dzuub te laad. Dxejc gubi'ni rolijzni, rdxelojtisni xcuent ni gujc. Ni guzajc lo nezyuj ni sii guedx Emaús (Mr. 16:12‑13)

¹³Lagajc dxejga, tio'p rexpejṉpacni sääreni te guejdx ni laa Emaús, ni ria'n si'cti tzubiteeb kilómetro loj guedx Jerusalén.

¹⁴Laḻ ni sasajreni lo nezyujga, cayujyreni diidx xcuent reni gujc ro'c.

¹⁵Laḻ ni caniireni gubig Jesús lojreni, gusloj sasanäjnireni.

¹⁶Luxh mase cahuiireni lojni, yu' xhi badxojn niembeerenini.

¹⁷Dxejc gunabdiidx Jesús lojreni, räjpni: ―¿Xhini'c rujytu laḻ ni sasajtu, ä? ¿Xhicuent cayac-huin lajztu?

¹⁸Tejreni ni laa Cleofas badzu' diidxre, räjpni: ―Guiraasi bejṉ najn xhi gujc neṉ guedx Jerusalén. ¿La lujtis bia'nlu neṉ guejdxga ni di gan xhi gujc ro'c, ä?

¹⁹Dxejcti räjp Jesús lojreni: ―¿Xhini'c gujc ro'c? Dxejc räjpreni lojni: ―Recos xcuent Jesús ni siääd guedx Nazare't, ni gujc te niguii ni gunii xtidx Dios, rajpni yäḻrnibeduxh xten Dios loj redzuun ni rujnni näjza loj rediidx ni rniini, nez loj Dios näjza nez loj rebejṉ.

²⁰Näjza xho bejn reni rnibee loj rebixhojz näjza rexcuxhtisnu, bateedrenini ladzṉaa reni gunibee guetni, dxejc bacuaarenini lo crujz.

²¹Niluxh nuurnu cabääznu laani gacni nani nusḻaa rexpejṉ Israel ladzṉaa rebeṉzijt. N̲aj agujc choṉ dxej ni gujc recosre.

²²Luxh yu' gaii gunaa ni nadxaag loonu ni baschelojreni nuurnu. Barsil, che huijreni robaa xtenni,

²³direni nidxäl tiejxhni. Biädsa'nreni diidx loonu najreni bahuiireni lo tio'p xangl Dios ni räjp lojreni, agubaṉsac Jesús lo rebeṉgut.

²⁴Dxejcti huihuii gaii sa'nu robaa, bahuiizareni najcni si'ctis ni naj regunaaga loonu, niluxh direni nuhuii loj Jesús.

²⁵Dxejc räjp Jesús lojreni: ―¡Lacti nayääl tre' xcäriejntu! Lacti neṉ rililajztu xtidx redade' ni gunii xtidx Dios xcuent Crist.

²⁶¿La di nungäjḻ tedxgaa Crist retrabajwduxhre dxejcti jiu'ni lo xcäḻrdimbicha' Dios, ä?

²⁷Dxejc gusloj cagusule'ni guiraa rediidx ni caj lo xquijtz Dios xcuent Crist. Guslonäjni xtidx Moisés, dxejc huinuuni basule'ni guiraa reguijtz ni bacuaa redade' ni gunii xtidx Dios.

²⁸Che bidzujṉreni guejdx cadro sääreni, bejn Jesús si'cni chanuuni chääni lo nezyuj.

²⁹Dxejc laareni bascuääzrenini te jiannäjnireni, räjpreni lojni: ―Biannäj nuurnu, sa'csi acayajc gudxej, agojl jiu' guxhijṉ. Dxejcti biu' Jesús te jiannäjnireni.

³⁰Cheni sobganäjnireni lo mex, cua'ni yätxtiil, benle'nini, dxejc gula'nini, gudisnini lojreni.

³¹Lagajc dxejc, baxhal Dios balojreni, biembeereni Jesús, dxejc laani gunitlojni lojreni.

³²Dxejcti räjpreni lo sa'reni: ―¿La di lastoonu nibeguiboo cheni siädniini loonu lo nezyuj, che cagusule'ni xtidx Dios?

³³Dxejc dirureni nibäjz ro'c, alga gunasgajcreni nez, gubi'reni guedx Jerusalén. Ro'c bidxälreni abidojp xpejṉpac Jesús näjza sgaii bejṉ.

³⁴Dxejcti bijreni diidx loj guiro'preni bidzujṉ, räjpreni: ―Guliipac gubaṉsac Jesucrist, luxh baluilojni loj Simón.

³⁵Dxejc guiṟo'p reni bidzujṉ bijzareni diidx ni gusajcreni lo nezyuj, näj xho biembeezareni Jesús che gula'ni yätxtiil. Baluiloj Jesús loj rexpejṉpacni (Mt. 28:16‑20; Mr. 16:14‑18; <a href='B:500 20:19'>Jn. 20:19‑23)

³⁶Canisi'creni rediidxre chela baluiloj lagajc Jesús galäiireni, guniini xchan lojreni, räjpni: ―¡Coḻcuecdxi lajztu!

³⁷Per laareni rdxelojreni bidxejbreni, naareni cahuiireni lo te sprit.

³⁸Dxejc räjp Jesús lojreni: ―¿Xhicuent cadxejbtu? ¿Xhicuent rac tio'p lastootu?

³⁹¡Coḻhuii reṉaä, näjza reni'ä! Lagajc naräni. Coḻcajn narä te fiipactu laa naräni, sa'csi anajntu di te sprit ga'p bääl niclaza tzujt si'c rapä narä.

⁴⁰Che guniini rediidxga, baluigajcni reṉaani näjza reni'ni.

⁴¹Laḻ ni cadxelojreni, di gacdi chalilajzreni, sa'csi cabaduxh lajzreni, räjpni lojreni: ―¿La yu' xhi rajptu gauä ree, ä?

⁴²Dxejc badeedreni te la' bälbigue', näjza te la' seer ni yu' tzujn.

⁴³Ni'c cua'ni gudajwnini nez lojreni.

⁴⁴Dxejc räjpni lojreni: ―Dee najc xtidxä ni rniä lojtu cheni yusicä lojtu, rniä riäjḻ soob guiraa rediidx xcuentä ni caj lo xleii Moisés, näjza lo rexquijtz redade' ni gunii xtidx Dios näjza ni caj lo rexquitz Salmos.

⁴⁵Dxejcti basanijni xcäriejnreni te gucbeereni xhi säloj rediidx ni caj lo rexquijtz Dios xcuentni.

⁴⁶Dxejc räjpni lojreni: ―Scree caj lo reguijtz: Nanab guet Crist, dxejc ni riojṉ dxej, guibaṉsacni loj rebeṉgut.

⁴⁷Sire'chza diidx xcuent xho rusḻaa Crist rebejṉ neṉ dojḻ che rusiejchreni lajzreni, che rililajzreni xtiidxni. Guedx Jerusalén guislojni, dxejc sire'ch diidx guideb guedxliuj.

⁴⁸La'tu najctu testiigw guiraa recosre.

⁴⁹Narä suxhaḻä Sprit Dxan xten Dios lojtu, ni'c coḻjia'n guedx Jerusalén cheni jiädläjzlini neṉ lastootu, guniidxni yäḻrnibee ni siääd xhaguibaali. Huäjs Jesús xhaguibaa (Mr. 16:19‑20)

⁵⁰Dxejc huinä Jesúsreni stelaad guedx Jerusalén gajxh lo te guejdx ni laa Betania. Ro'c guläsni ṉaani, benle'ni yejcreni.

⁵¹Laḻ ni cayujnni si'c, gubicajni lojreni, huäjsni xhaguibaa.

⁵²Peta laareni gulujx gojnrenini, dxejc cabalazduxhreni gubi'reni guedx Jerusalén.

⁵³Ro'c guixe-guixee guyu'reni neṉ guidoro, calä'preni xpala'n Dios. Sugacni si'c.