Read Mitla Zapotec Juan 1 Bible Online

Juan 1 - Mitla Zapotec bible

Juan 1

¹Galodoo che gusloj guira'ti, ala yu' Diidx. Luxh nani najc Diidxga yunäj Dios, luxh Diidxga najc Dios.

²Che gajd gac-cheeli guedxliuj, yunäjni Dios.

³Xcuent laani benchee Dios guedxliuj näjza guira'ti ni yu' lojni. Guiraa recos ni yu' di gacdi niu'reni paru rutini.

⁴Laani gojp yäḻnabajṉ. Yäḻnabajṉga najc bianij xten rebejṉ.

⁵Luxh bianijga rdimbicha' nez lo yäḻcäjy, niluxh yäḻcäjyga di niajcdi nusuiinini.

⁶Guyu' te niguii birilaj Juan, ni baxhaḻ Dios.

⁷Laani biäädni te basule'ni diidx. Biädsule'ni diidx xcuent bianij te nililajz guiraa rebejṉ diidx xcuent bianij.

⁸Laani dini gac bianij, laani biädsule'ni diidx xcuent bianij.

⁹Laa bianijpacga ni rusanij lastoo guiraa rebejṉ, luxh ṉaj abiäädni lo guedxliujre.

¹⁰Nani najc Diidxga guyu' lo guedxliujre, xcuent laazani guc-chee guedxliujre, luxh di rebeṉ guedxliujre nililajz chu najni najcni.

¹¹Biäädni loj rexpeṉ Israel, niluxh rexpejṉni direni nicäjb niu'ni lojreni.

¹²Dxejc loj guiraa reni cuäjb guyu'ni lojreni, loj renani huililajz xtiidxni, loj reni'c badeedni yäḻrnibee gacreni xi'n Dios.

¹³Laa reni'c ni di gac si'c xi'n beṉ guedxliuj, ni gojl sa'csi rlajz te biniet chu xi'nni, dee najcpacreni Xi'n Dios sa'csi sudeedni yäḻnabajṉ par tejpas lojreni.

¹⁴Diidxga gujc te beṉ guedxliuj. Guläjzni lo guedxliujre, bahuilojzanu xcäḻrdimbicha'ni, si'c yäḻrdimbicha' xten xingan xteb xtadni, laani najcpacni nani sanälajz nuurnu, nani rnii didxlii loonu.

¹⁵Juan gunii xcuent Jesús. Guredxa'ni, räjpni: ―Laa dee ni rniä, nani siääd detzä sajcruni loä, sa'csi laani ganidni nabajṉni loä.

¹⁶Sa'csi guiraanu cua'nu xcäḻnasacduxhni, yäḻracnäj detz yäḻracnäj.

¹⁷Leii xten Dios biädnä toMoisés, niluxh yäḻracnäj näjza redidxlii biädnä Jesucrist.

¹⁸Rut chu tejdi abahuii lo Dios, xinxtebni ni yunäjpac Dios, laani basule'ni diidx xcuent Dios loonu. Juan ni rutiobnis gunii chuni'c najc Jesucrist (Mt. 3:11‑12; Mr. 1:7‑8; Lc. 3:15‑17)

¹⁹Dee najc diidx nani gunii Juan ni rutiobnis che baxhaḻ rexpejṉ Israel rebixhojz näjza rexpejṉ guidoo ni laa levitas, biriireni guedx Jerusalén te sanabdiidxreni lo Juan, räjpreni lojni: ―¿Luj chu najclu?

²⁰Dxejcti bicäjpni lojreni, xhet bacua'tzdini lojreni, räjpni: ―Et narädi nacä Crist ni jiääd.

²¹Dxejcti gunabdiidxreni lojni, räjpreni: ―¿Chuxhni'c najclu? ¿La lujni najc Elías? Räjpni: ―Dina gacäni. Räjpreni: ―¿La najclu te dade' ni gunii xtidx Dios ni cabääznu jiääd? Dxejc räjpni: ―Dina gacäni.

²²Räjpreni: ―¿Chuxhni'c najclu? Te chonänu diidx loj reni baxhaḻ nuure. ¿Xhi rniilu, chuxhni'c najclu?

²³Räjp Juan: ―Narä nacä nani rbedxa' nez lo reyubijdz si'c ni gunii Isaías, ni gunii xtidx Dios scree: “Coḻyensa'c xnezyuj Dad.”

²⁴Rebejṉ ni baxhaḻ redee najc reni rniireni “farisee”.

²⁵Dxejc gunabdiidxreni stee, räjpreni lo Juan: ―¿Xhicuent rutiobnislu palga dilu gac Crist ni jiääd niclaza Elías niclaza stee niguii ni rnii xtidx Dios ni cabääznu jiääd, ä?

²⁶Dxejcti räjp Juan lojreni: ―Narä rutiobnisä con nis, niluxh galäiitu yu' tej nani ditu gumbee.

²⁷Laa dee ni siääd detzä niluxh di nungäjḻ nicla surloä cuää́ xcura'chni, sa'csi sajcruni loä.

²⁸Guiraa recosre gujc stelaad cadro laa Betábara, ni ria'n stelaad ro' gueu Jordán cadro cagutiobnis Juan. Jesús najc Xile' xten Dios

²⁹Che bara yääl, bahuii Juan siääd Jesús lojni. Dxejc räjpni: ―¡Coḻhuii! Aree Xile' xten Dios nani rudzucaj xtojḻ rebeṉ guedxliuj.

³⁰Lagajc xcuent dee ni rniä cheni guniä lojtu: “Detzä siääd te niguii ni sajcru loä, sa'csi ganidli narä agac nabajṉni.”

³¹Luxh dina niembeäni, per biädtiobnisä con nis te guluiä lo rexpejṉ Israel chu najcni.

³²Guniiza Juan stee diidx xcuentni, räjpni: ―Narä bahuiä biäjt Sprit Dxan xten Dios xhaguibaa si'c te palom guzudxini yejcni.

³³Dina niembeäni, per nani baxhaḻ narä gutiobnisä con nis, laani najni loä: “Cheni fiilu jiäjt Sprit Dxan xten Dios xhaguibaa si'c te palom, sudxini yejc te bejṉ, laanini najc ni gutiobnis con Sprit Dxan xten Dios.”

³⁴Narä abahuiä lojni, ni'cni rniliä: “Dee ni najc Xi'n Dios.” Reni gujc xpejṉ Jesús ganiddoo

³⁵Che bara stee yääl, sugasac Juan ro'c, suganäjni tio'p rexpejṉni.

³⁶Bahuiini lo Jesús che sasajni, dxejc gunii Juan, räjpni: ―¡Coḻhuii! ¡Laa dee ni najc Xiil xten Dios!

³⁷Biejn diajg guiro'p rexpejṉpac Juan diidxga, dxejc sanajlreni Jesús.

³⁸Che gubiré Jesús bahuiini siädnajlreni, dxejc räjpni: ―¿Xhi caguiiltu? Räjp rebejṉga: ―Mastr, ¿caro rbäjzlu?

³⁹Badzu' Jesús diidxre, räjpni: ―Coḻtaa, te fiitu. Dxejcti huijreni te bahuiireni caro rbäjzni ro'c. Biannäjrenini ro'c sa'csi agojl si'cti rcatajp gudxej.

⁴⁰Tej reni biejn diajgni xtidx Juan laa Andrés, bejtz Simón Pedr dxejc huinäjḻni Jesús.

⁴¹Ganiddoo huitiilni bejtzni, dxejc räjpni lojni: ―Abidxälnu Mesías nani sälojza Crist ni cabääznu jiääd.

⁴²Sas huinänini loj Jesús. Che bahuii Jesús lojni, räjpni: ―Luj najclu Simón xi'n Jonás; sirilajlu Cefas nani sälojza Pedr. Gurejdx Jesús Felipe näjza Natanael

⁴³Bara yäälga rlajz Jesús chää nez Galilee. Dxejc bidxaagni Felipe, räjpni lojni: ―Gudanajl narä.

⁴⁴Felipe siääd guedx Betsaida, guedxro ni najcza lajdx Andrés näjza Pedr.

⁴⁵Felipe bidxaag Natanael räjpni lojni: ―Abidxälnu bejṉ nani bacuaa toMoisés xcuentni lo reguijtz xten leii agujc xchej, nani bazä'tza reniguii ni gunii xtidx Dios, Jesús xi'n José ni siääd Nazare't.

⁴⁶Räjp Natanael: ―¿La sajc guirii te beṉsa'c guedx Nazare't, ä? Räjp Felipe lojni: ―Gudaa, te fiilu.

⁴⁷Che bahuii Jesús siääd Natanael nez lojni, räjpni: ―Coḻhuii te beṉ Israelpac nani dipacni gusguee.

⁴⁸Räjp Natanael: ―¿Xho numbeelu narä? Badzu' Jesús diidxre lojni räjpni: ―Che gajd Felipe cueedx luj, che suga'lilu ni' te yagiigw, bahuiä lojlu.

⁴⁹Badzu' Natanael diidxre, räjpni: ―Mastr, luj najc Xi'n Dios, luj najc Reii xten rexpeṉ Israel.

⁵⁰Räjp Jesús lojni: ―Sa'csi rniä lojlu, “bahuiä suga'lu ni' yagiigw”, ¿ni'c rililajzlu, ä? Xhidajl cosroru suhuiilu.

⁵¹Dxejcti räjpzani: ―Rniliä́pac lojtu, suhuiitu guixal xhaguibaa, näjza rä'p riäjt rexangl Dios yejc Xi'n Dios ni gujc Niguii.