Read Mitla Zapotec Juan 10 Bible Online

Juan 10 - Mitla Zapotec bible

Juan 10

¹’Rniliä́, rniliä́pac lojtu, nani di jiu' ro' gurajl xte rexiil, alga richu'ni stelaad, rä'pni cuä' gurajl, ni'c najcni te gubaan.

²Nani riu' nez ro' gurajl xten rexiil, laani najc xpaxtoorreni.

³Che guidzujṉ baxtoor, ruxhal nani rcanäj ro lä', te jiu'ni. Rexiilga numbeereni xse' baxtoor, dxejctiru laani rbejdxni rexiilga, tebgaj xiilga yu' lajni, rinäzanireni cadro naga' guixasa'c.

⁴Che ṟii rexiilga neṉ gurajl, sanä baxtoorgareni, luxh numbee rexiilga xse'ni, ni'c rsianäjreni baxtoorga.

⁵Luxh dipacreni chanä te baxtoor nani direni gumbee, ruxuṉreni lojni sa'csi direni gumbee xse' garenca bejṉ.

⁶Bij Jesús rediidxga lojreni, niluxh direni niacbee xhi säloj ni guniini.

⁷Dxejcti gunisac Jesús diidx lojreni; räjpni: ―Rniliä́, rniliä́pac lojtu, narä nacä si'c roxlä' xcurajl rexiil.

⁸Guiraa reni abiääd galoo, najcreni ganax gubaan luxh di rexiil nucuadiajg xse'ni.

⁹Narä nacä si'c rolä' xten gurajl, nani jiu' nejzga, siḻaani loj xtojḻni, siu'ni, siriini te guidxälni guixasa'c gauni.

¹⁰’Ni najc gubaan riäädtisni te cuanni, te ju'tni, te guxhiṉzani, niluxh narä siäḻä te ga'ptu yäḻnabaṉsa'c, yäḻnabajṉ par tejpas.

¹¹Narä nacä baxtorsa'c; luxh baxtorsa'c sudeed lagajc xcäḻnabajṉni xcuent rexiilni.

¹²Niluxh te mos ni rajxh, di gac baxtoorpac, ni xhet xtendini najc rexiil, che rhuiini siääd te cuyo't, ruxuṉni, li rbälazni rexiil. Dxejc rniaaz cuyo't rexiil, rutie'chzani rexiil.

¹³Mosga ruxuṉ sa'csi najcni mostis, luxh dini jiu xhi rsiajc rexiil.

¹⁴’Narä nacä baxtorsa'c; numbeä reni najcpac rexilä; rexilä numbeezareni narä

¹⁵sigajc numbee Xtadä narä, sigajc numbeäza Xtadä; luxh sudedä xcäḻnabaṉä xcuent rexiilga.

¹⁶Rapäza ste cuaa xiil, ni di gac xten gurajlre; näjza laareni nanab chaxiä, te gusobdiajgreni xtidxä, te guidxagsa' guiro'p cuaareni, gacreni tejtis gurajl, tejtisza baxtoor.

¹⁷’Narä siguixäza xcäḻnabaṉä, guetä, te dxejcru siliässacä xcäḻnabaṉä, guibaṉsacä, ni'cni sanälajz Xtadä narä.

¹⁸Rut sajcdi ju't narä, lagajc narä gudedä xcäḻnabaṉä, guetä. Rapä yäḻrnibee te gudedä xcäḻnabaṉä, guetä, rapäza yäḻrnibee te xcasacä xcäḻnabaṉä te guibaṉsacä, sa'csi dee najc yäḻrnibee ni baniidx Xtadä loä.

¹⁹Xcuent rediidxre gula' sa' rexpejṉ Israel, gujcreni tio'p gala'.

²⁰Xhidajlreni canii: ―¿Xhicuent riutuni? ¿La ditu gan te beṉdxab yu' lastooni? Yejcni rajc. Xhigac rcuadiajgtu xtiidxni.

²¹Dxejc ste cuaareni: ―Dini gac. Di rediidxre gac xtidx te beṉdxab. ¿Xhixh sajc rusiajc beṉdxab baloj relotiä'p, ä? Rdxe'ch rebejṉ loj Jesucrist

²²Lagajc neṉ redxejga gujc lanij xten xquidoo rexpejṉ Israel guedx Jerusalén.

²³Najcni bäi najl. Biu' Jesús guidoro, sasajni nez neṉ cordoor ni laa xten Salomón.

²⁴Gubig rexpejṉ Israel guideb gabi Jesús, räjpreni lojni: ―¿Gucli gucua'tzlu loonu chu najclu? Palga luj najclu Crist ni cabääznu jiääd, guiniliini loonu tejpas.

²⁵Dxejc badzu' Jesús diidxre, räjpni lojreni: ―Aguniä lojtu si'c, niluxh ditu nililajz. Redzuun nani runä xcuent xcäḻrnibee Xtadä, huenliisi ruluilojreni chuni'c nacä.

²⁶La'tu ditu chalilajz sa'csi ditu gac rexilä.

²⁷Rexilä numbee xse'ä, luxh narä numbeäzareni, riädnajlzareni narä.

²⁸Narä rudedä yäḻnabajṉ par tejpas loj rexilä, luxh direni nitloj par tejpas. Rutza laadi nani sajc gudzucajreni ladzṉaä.

²⁹Xtadä baniidxreni loä, laani najcni guroobru, nadipru loj guiraareni. Rut laadi nani sajc gudzucajreni ladzṉaa Xtadä.

³⁰Narä näjza Xtadä najcnu tejsi.

³¹Dxejc gulässac rexpejṉ Israel guij, te nucuaareni yejc Jesús.

³²Dxejcti räjp Jesús lojreni: ―Xhidajl dzuun xten Xtadä abaluiä lojtu, ¿lo redzuunga, xhi tej dzuun rujn gucuaatu guij yecä?

³³Dxejcti räjp rexpejṉ Israel lojni: ―Xcuent redzuun ni rujnlu dinu gucuaa guijlu. Sa'csi guniyajlu, ni'c nucuaanu guij yejclu. Beṉ guedxliujlu, luxh najlu najclu tejsi con Dios.

³⁴Badzu' Jesús diidxre, räjpni lojreni: ―¿La et loj xleiiditu caj rediidxre: “Narä rniä, la'tu najc redios”?

³⁵Nancheenu digacdi guidxaa xquijtz Dios. Palga gulalajni redios rebejṉ nani bejn yäḻguxhtis loj rexpejṉ Israel, dxejc

³⁶ṉaj ¿xhicuent guniitu loä: “Caniyajlu Dios”, sa'csi guniä lojtu narä nacä Xi'n Dios? Ni gule Dios narä, baxhaḻni narä lo guedxliujre.

³⁷Palga dina gunä redzuun xten Xtadä, na'c chalilajztu rextidxä.

³⁸Luxh palga runnäni, mascä ditu chalilajz xtidxä, coḻchalilajz ni ruluii reyäḻmilagwr nani runä, te gacbeetu par tejpas, Xtadä yunäj narä, narä yunää́za laani.

³⁹Che rlajzreni niniaazrenini stehuält, laani biriini ladzṉaareni.

⁴⁰Dxejcti sääni, gubisacni nez stelaad gueu Jordán, nejzga huijia'nni, cadro gusloj batiobnis Juan.

⁴¹Xhidajl bejṉ bidzujṉ lojni ro'c, räjpreni: ―Di Juan niujn nicla tej yäḻmilagwr luxh guiraa rediidx ni gunii Juan xcuent dade're najc didxliipac.

⁴²Xhidalduxhreni huililajz xtiidxni ro'c.