Read Mitla Zapotec Juan 12 Bible Online

Juan 12 - Mitla Zapotec bible

Juan 12

¹Che riäädx xho'p dxej gaḻ lanij pascw, huij Jesús guedx Betania cadro rbäjz Larz nani baspaṉsac Jesús loj rebeṉgut.

²Ro'c bejnreni te xchej te gau Jesús. Mart bateed xchejga, näjza Larz sobganäj Jesús näjza rexpejṉpacni lo mex.

³Dxejcti bidzuṉnäj Marii si'cti garol litr se't ni rlianexhduxh si'c nard. Sacduxh se'tga. Dxejcti gudääbni se'tga lo reni' Jesús, baspijdzni ni'ni con xquidxejcni. Guideb neṉ yu'ga gulanejxh se'tga.

⁴Dxejcti räjp Judas Iscariot, xi'n Simón, ni najc te rexpejṉpac Jesús, lagajc ni abejn xhigab guto'ni Jesús, räjpni:

⁵―¿Xhicuent di se'tre nido' choṉ gayuu denar te nidis meelga loj rebeṉproob? (Choṉ gayuuga najc si'cti ni xca' te niguii paru gunni dzuun tzubiteb bäii.)

⁶Guniini si'c, xhet sa'csi riadini reproob, per sa'csi laani najcni te gubaan, luxh laani ca'ni bols cadro ruchee meel, luxh rbääni meel lojga te rca'nini.

⁷Ni'cni räjp Jesús lojni: ―Na'c gudxojnluni; subasäḻxgaanini, che gajd guidzujṉ dxej nani guiga'tzä.

⁸Dxej-yääl yu' rebeṉproob lojtu, luxh narä dina chuä lojtu xchej. Laareni rlajzreni nugu'tzareni Larz

⁹Dxejc che gucbee xhidajl xpejṉ Israel yu' Jesús rolijz Larz ni gubaṉsac lo rebeṉgut, bidzujṉreni, xhet xcuentis Jesús. Biäädreni te fiizareni loj Larz nani baspaṉsacni lo rebeṉgut.

¹⁰Dxejcti rebixhojz ni rnibee bachaagzareni diidx te ju'tzareni Larz,

¹¹sa'csi xhidajl rexpejṉ Israel salilajzreni xtidx Jesús sa'csi bahuiireni gubaṉsac Larz. Biu' Jesús guedx Jerusalén (Mt. 21:1‑11; Mr. 11:1‑11; Lc. 19:28‑40)

¹²Che bara yääl, rebejṉ xhidajl ni bidzujṉ lanij biejn diajgreni asiäddzujṉ Jesús guedx Jerusalén,

¹³dxejcti batiu'reni ṉaa reyagzijn, biriireni neṉ guejdx, sachaglojrenini. Guredxa'reni, räjpreni lo Jesús: ―¡Coḻguiliä'p xpala'n Dios! ¡Chicbaa nani siääd xcuent Dad nani najc ṟeii lo rexpejṉ Israel!

¹⁴Bidxäl Jesús te burbäz, gubijbnini, si'cni caj lo reguijtz:

¹⁵Na'c guidxejbtu, bejṉ ni rbäjz neṉ guedx Sión.¡Coḻhuii! Reii xtentu asiääd, bijbni dejtz te burbäz.

¹⁶Di rexpejṉpacni niacbee recosga che gujcreni, niluxh che gubaṉsacni loj rebeṉgut, dxejc banaj lajzreni recos nani caj lo guijtz xcuentni, näjza guiraa recos ni bejn rebejṉ lo Jesús te guzojb rediidxga.

¹⁷Rebeṉ xhidajl ni suganäjni che gurejdxni Larz te biriini neṉ baa che baspaṉsacnini lo rebeṉgut, bijzareni diidx xcuent guiraa ni bahuiireni.

¹⁸Ni'cni biädchagloj rebeṉ xhidajlgani, sa'csi abiejn diajgreni laani bejnni milagwrre.

¹⁹Ni'cni räjp refarisee lo sa'reni: ―Aruhuiitu xhet sajcdi jieṉnu. ¡Coḻhuii! Empac sanajl guideb guedxliujni. Riädtiil regriegw Jesús

²⁰Yu' gaii beṉgriegw nadxaag lo rebejṉ ni biädted lanij guedx Jerusalén.

²¹Rebejṉre bidzujṉ loj Felipe nani siääd guedx Betsaida xten Galilee, gusloj gunabreni lojni, räjpreni: ―Dad, rlaaznu guihuiinu lo Jesús.

²²Biääd Felipe, räjpni loj Andrés, dxejcti guiro'preni huiye'tzreni lo Jesús.

²³Dxejcti räjp Jesús lojreni: ―Abidzujṉ oṟ ni chä'p xpala'n Xi'n Dios ni gujc Niguii.

²⁴Rniliä́pac lojtu, palga di te xob binij jiajb lo yuj, neṉ xhurc cadro cueni, te rianxtebni, guetni, dini guiliejn. Luxh palga guetni, siliejnni, rajcza te nisro lojni, rajc xhidajl xob binij.

²⁵Nani sanälajz xcäḻnabajṉni, sunijtnini, luxh nani rbälaz xcäḻnabajṉni lo guedxliujre, sica'ni yäḻnabajṉ par tejpas.

²⁶Palga yu' chu tej ni rlajz chu loä, sujiädnajlni xnezyuä, te cadro yu'ä, ro'cza cuääz ni ru' loä. Palga yu' chu gun xtzunä, siliä'pza Xtadä xpala'nni. Rnixgaa Jesús guetni

²⁷Räjpzani: ―N̲aj cayac-huin lastoä. ¿Xhichani'cza gäpä lo Xtadä? ¿La siniä: Dad, gucnäj narä te di tedä oṟ ni siääd? Ni te tedäpac oṟga biälä lo guedxliujre.

²⁸Xtadä, bejn si'cni riäjl gac te guiliä'p bejṉ xpala'nlu. Dxejcti xhaguibaali biejn te xse' te ni räjp: ―Agulä'pä xpala'nä, siliä'pä xpala'nä stehuält.

²⁹Ni'cni lo rebejṉ ni tre' ro'c, ni biejn diajgreni se'ga, yu' reni räjp: ―Lascanu gunii te guzii. Guyu'zareni räjp: ―Te xangl Dios ni gunii lojni.

³⁰Dxejc räjp Jesús lojreni: ―Et xcuentädi gunii xse' ni gunii, xcuenttis la'tu guniini.

³¹N̲aj abiääd xcäḻguxhtis Dios lo guedxliuj. N̲aj sibicaj xcäḻrnibee nani rnibee lo guedxliujre.

³²N̲aj, che guiliäsreni narä jiaa lo guedxliuj, te gaḻä ro'c, sutie'ä guiraa bejṉ loä.

³³Rediidxre gunii Jesús te canixgaani xho guetni.

³⁴Räjp rebejṉ lojni: ―Nuure biejn diajgnu biḻreni lo leii, Crist ni jiääd sibajṉ par tejpas. ¿Xho mood rniilu, nanab chäs Xi'n Dios ni gujc Niguii jiaa lo guedxliuj? ¿Chuxhni'c najc Xi'n Dios ni gujc Niguii ni ruzä'tlu?

³⁵Dxejcti räjp Jesús lojreni: ―Stera'tsi yu' bianij lojtu. Coḻsaj laḻ ni rajptu bianijga, te di guiniaaz yäḻxcäjy la'tu, sa'csi ni rsiaj loj nacäjy, dini gan caro chääni.

³⁶Laḻ ni rajptu bianij, coḻchalilajz bianijga te gactu rexi'n bianij. Gunii Jesús rediidxga lojreni, dxejcti biunejzni ro'c, bicuatzlojni. Xhicuent di rexpejṉ Israel nililajz xtidx Jesús

³⁷Xhidajl remilagwr bejn Jesús nez loj rexpejṉ Israel, niluxh direni nililajz xtiidxni, gulälazreni nani baxhaḻ Dios lojreni.

³⁸Ni'cni guzojb diidx nani gunii Isaías, ni gunii xtidx Dios galoro, räjpni:Dad, ¿chuni'c huililajz xtiidxlu?¿Chuloj baluiilu xcäḻrnibeduxhlu, ä?

³⁹Ni'cni di niajcdi nililajzreni, sa'csi guniiza Isaías, räjpni:

⁴⁰Abascäjyni lojreni,abennajdni lastooreni,te di rebalojreni fii,te di lastooreni gacbee,te di gusiejch lajzreni,te di gusiacäreni.

⁴¹Rediidxre gunii Isaías, sa'csi bahuiini xcäḻrdimbicha' Jesús xhaguibaa, dxejc guniini xcuentni.

⁴²Dxejcti gaii rebejṉ ni rnibee huililajz xtiidxni che räjpni abaxhaḻ Diosni, niluxh bidxejbreni rebeṉ farisee, ni'c direni nicäjp ahuililajzreni, te di gurilaagwreni laareni, gudxojnreni jiu'reni neṉ guidoo.

⁴³Sa'csi rdxaglajzrureni guiliä'p rebejṉ xpala'nreni luxh guxiiru rlajzreni guiliä'p Dios xpala'nreni. Xtidx Jesús sigubee rebejṉ

⁴⁴Dxejcti gudidxa' Jesús: ―Nani chalilajz xtidxä, et ganaxdi ni caniä rililajzni, näjza xtidx Xtadä nani baxhaḻ narä rililajzni.

⁴⁵Nani ruhuii loä, ruhuiizani loj ni baxhaḻ narä.

⁴⁶Narä biäḻä si'c bajl lo guedxliujre, te guiraa renani chalilajz xtidxä, dirureni chu lo yäḻcäjy.

⁴⁷Nani riendiajg xtidxä, luxh dini gusoob rediidxga, dina gunä yäḻguxhtis lojni, sa'csi dina niälä te gunä yäḻguxhtis rebeṉguedxliuj, biäḻä te gusḻaä́ rebeṉ guedxliuj lo dojḻ.

⁴⁸Nani rbälaz narä, ni di gusoob xtidxä, yu' chu gun yäḻguxhtis xtojḻni; lagajc rediidx nani guniä gun yäḻguxhtis xtojḻreni che gaḻ lult dxej.

⁴⁹Sa'csi narä dina niädniä lagajc xcuentä, lagajc Dad ni baxhaḻ narä, lagajc laani gunibeeni xhini'c guiniä, xhini'c guluiä.

⁵⁰Luxh nancheä gunibeeni chu yäḻnabajṉ par tejpas. Ni'cni rediidx nani rniä, rniäreni si'cpacni gunii Xtadäni loä.