Read Mitla Zapotec Juan 14 Bible Online

Juan 14 - Mitla Zapotec bible

Juan 14

¹Dxejcti räjp Jesucrist lojreni: ―Na'c chutu yärsia'. Rililajztu xtidx Dios, coḻchalilajzza xtidxä.

²Yu' xhidalduxh yu' cadro rbäjz Xtadä. Palga xhet si'cdi najcni, dizana niniä lojtu si'c. Sia'ä chasucheä reyu' par la'tu.

³Luxh palga chasucheä cadro cuääztu, che guluxäni, sibisacä, te chanää́tu ro'c, te cadro yu'ä, ro'cza chutu.

⁴La'tu anajntu caro cha'ä, anajnzatu nezyuj ni chäätu.

⁵Dxejcti räjp Tomás loj Jesús: ―Dad, dinu guidon caro chäälu, ¿xho guidonnu nezyujga, ä?

⁶Räjp Jesús lojni: ―Narä nacä nezyuj. Narä nacä didxliipac, nacäza yäḻnabajṉ. Por narätis sajc chää bejṉ cadro rbäjz Xtadä.

⁷Palga la'tu niembeetu chuni'c nacä, niembeezatu Xtadä. Luxh ṉajli abiembeepactuni sa'csi acahuiitu lojni.

⁸Räjp Felipe loj Jesús: ―Dad, basaan guihuiinu loj Xtadlu; ni'ctis rlaaznu.

⁹Dxejcti räjp Jesús lojni: ―Felipe, ¿la gajdlu gumbee narä, luxh lacti xchej yu'ä lojtu, ä? Nani ruhuii loä, abahuiini lo Xtadä. ¿Xhicuent rniablu fiilu lo Xtadä, ä?

¹⁰¿La dilu chalilajz najrä yunää́ Xtadä, luxh Xtadä yunäjzani narä, ä? Rediidx nani rniä dina guiniäni lagajc xcuentä, sa'csi Xtadä ni yunäj narä laani rujn lagajc rextzuunni.

¹¹Coḻchalilajz xtidxä, che rniä narä yunää́ Xtadä, luxh Xtadä yunäj narä. O palga ditu chalilajzni sa'csi najcni xtidxä, coḻchalilajzni sa'csi abahuiitu rextzuun ni runä.

¹²Rniliä́pac lojtu, nani chalilajz xtidxä, sajc gunni redzuun nani runä, luxh sujnni dzunroru sa'csi sia'a cadro yu' Xtadä.

¹³Luxh guiraa ni guiniablu lo Xtadä xcuentä, narä sunäni, te guluiloä xcäḻrnibee Xtadä.

¹⁴Narä sunä xhitis ni guiniabtu por laä. Ria'n diidx guxhaḻ Jesús Sprit Dxan

¹⁵Räjpzani: ―Palga sanälajztu narä, susoobtu xtidxä.

¹⁶Dxejc siniabä lo Xtadä, te guniidxni stee nani gacnäjtu te chunäjni la'tu par tejpas.

¹⁷Nalajznu, Xprit Dxan xten Dios, ni rnilii. Di gacdi xca' rebeṉ guedxliujni, sa'csi direni fii lojni, niclaza gumbeerenini. Niluxh la'tu numbeetuni sa'csi yunäjni la'tu, yu'ni neṉ lastootu.

¹⁸Dina gusanbisiäbä la'tu; sibisacä jiädhuiä la'tu.

¹⁹Diru gac xchej, dxejc diru rebeṉ guedxliuj fii loä, niluxh la'tu suhuiitu loä. Sa'csi nabaṉä, la'tu nabajṉzatu.

²⁰Neṉ redxejga, dxejc sacbeetu yunää́ Xtadä, la'tu yunäjtu narä, luxh narä yunää́za la'tu.

²¹Nani numbee Xtadä, nani rusoobza xtidxä, ni'c ruluiini sanälajzpacni narä. Luxh Xtadä sinälajzza nani sanälajz narä, näjza narä chanälazä bejṉga, luxh suluiloä lagajc narä lojreni.

²²Dxejcti räjp Judas (xhet Iscariótedi) lojni: ―Dad, ¿xhini'c gunlu te guluilojlu lojtisnu, xhet näjdi loj rebeṉ guedxluijdi, ä?

²³Dxejcti räjp Jesús lojni: ―Nani sanälajz narä, ni'c riu xtidxä. Ni'c chanälajz Xtadä, dxejc jiopläznää́nuni guiro'pnu Xtadä.

²⁴Nani di chanälajz narä, dini jiu xtidxä. Luxh rediidx nani biejn diajgtu, et xtidxädini; xtidx Xtadäni ni baxhaḻ narä.

²⁵’Caniä guiraa rediidxre lojtu laḻni yu'ä lojtu,

²⁶per Sprit Dxan xten Dios nani jiädyacnäjtu, nani guxhaḻ Xtadä xcuentä, laani suluiini lojtu guira'ti, näjza susnajni lajztu guiraa rediidx nani aguniä lojtu.

²⁷Yäḻrbecdxilajz rusa'nä lojtu, xcäḻrbecdxilazä runidxä lojtu, et si'cdini runiidx guedxliujdi najc nani runidxä lojtu. Na'c chutu yärsia', na'cza guidxejbtu.

²⁸Abiejn diajgtu ni guniä lojtu: Sia'ä luxh siälsacä lojtu. Paru ninälajzpactu narä, sibalajztu xcuentä che guniä sia'ä lo Xtadä, sa'csi Xtadä najc beṉroru loä.

²⁹Scree agunixgaäni lojtu, te che soobni, dxejcru chalilajztu xtidxä.

³⁰’Diruna guiniduxhä lojtu, sa'csi asiääd nani rnibee loj guedxliujre, luxh digacdi guinibeeni narä;

³¹riäjḻ gac recosre te gacbee rebeṉ guedxliuj sanälazä Xtadä, rusobäza xtidx Xtadä, runä nani gunibeeni. Coḻchastie, coḻcho' jiunejznu ree.