Read Mitla Zapotec Juan 2 Bible Online

Juan 2 - Mitla Zapotec bible

Juan 2

¹Che gudejd choṉ dxej, guyu' te sa' guedx Caná xten Galilee. Ro'c guyu' xnan Jesús.

²Huijza Jesús näjza rexpejṉpacni, sa'csi bidoṉreni chääreni lo sa'ga.

³Gubijdz bin. Dxejc räjp xnan Jesús lojni: ―Dirureni ga'p bin.

⁴Dxejc badzu' Jesús diidxre räjpni: ―¿Xhicuent rniilu si'c loä, xnanä? Gajd xhoṟä guidzujṉ.

⁵Niluxh räjp xnanni loj remos ni tre' ro'c: ―Coḻyejn guira'ti si'ctis ni guiniini lojtu.

⁶Suga' xho'p guesguij nani rdxaj nis te rdiib ṉaa rexpejṉ Israel te racnayareni te si'c guisa' xleii toMoisés. Neṉ tejga guesguijga ru' si'cti te gayuu litr nis.

⁷Räjp Jesús loj remos: ―Coḻguchaj reguesguijre nis. Dxejcti bachadoo rebejṉgani.

⁸Dxejcti räjp Jesús lojreni: ―Coḻca' che'nni ṉaj te coḻchanäni lo nani cahuii cayajc sa're. Dxejc huinä remosga che'n bin lojni.

⁹Che gu' dade'ga che'n nis ni gubixhloj bin (luxh dini gan caro siäädni, remostis ni gulä'p nis, ni'ctis najn). Dxejcti gurejdx dade'ga bi'n.

¹⁰Dxejcti räjpni: ―Guiraa rebejṉ rudeedreni binsa'c räxgaa rebejṉ, dxejcti che agudxaj xque'reni, rudeedreni bin nani di xcuent, niluxh luj gulucheelu binsa'cre ṉajli.

¹¹Seenre najc ganiddoo ni gusloj bejn Jesús; bejnnini neṉ guedx Caná xten Galilee. Seenga bazäbdiidx yäḻrnibee xtenni luxh ni'cni huililajz rexpejṉpacni xtiidxni.

¹²Che gudejd sa'ga, huijni guedx Capernaum con xnanni, rebejtzni näjza rexpejṉpacni. Ro'c bia'nreni tio'p-choṉ dxej. Basia Jesucrist guidoro (Mt. 21:12‑13; Mr. 11:15‑18; Lc. 19:45‑46)

¹³Sa'csi abidzuṉgajxh lanij pascw xten rexpejṉ Israel cheni rnalajzreni guxhijṉ ni gudejd guixhajg xten yäḻgujt neṉ Egipto, ni'c sää Jesús guedx Jerusalén.

¹⁴Neṉ guidoro bidxälni xhidajl bejṉ nani ruto' gon, xiil, palom näjza reni sobga' caguchaa melzijt.

¹⁵Dxejc bejnni te chico't con gaii duu, gulääni regon con rexiil neṉ guidoo. Batie'chni xcoobr rebejṉ nani ruchaa melzijt, barexh-xhätni rexmexreni.

¹⁶Räjpzani loj reni caguto' repalom: ―Coḻcuää redee, na'c rujntu rolijz xtadä si'c te guii cadro rdo' guiraloj.

¹⁷Dxejcti banajlajz rexpejṉpacni xhi caj lo reguijtz ni bacuaa redade' ni gunii xtidx Dios: “Gucnaj lazä xcuent ni runnäjreni rolijzlu.”

¹⁸Dxejcti gunabdiidx reni najc xpejṉ Israel lojni, räjpreni: ―¿Xhi seen guluiilu loonu ṉaj te fiinu arajplu yäḻrnibee te abejnlu recosre?

¹⁹Badzu' Jesús diidxre räjpni: ―Coḻgutzujl guidoore, luxh narä neṉ choṉtis dxej sunchesacäni.

²⁰Räjp rexpejṉ Israel lojni: ―Tiubixho'p ijz guclaa ni guc-chee guidoore, ¿xhixh sajc gunchesacluni neṉ choṉtis dxej, ä?

²¹Niluxh laani caniini xcuent guidoo ni najc lagajc tiejxhni.

²²Ni'cni cheni gubaṉsacni loj rebeṉgut, banajlajz rexpejṉpacni rediidxre ni guniini, dxejc huililajzreni nani caj lo rexquijtz Dios näjza rediidx ni gunii Jesús. Numbee Jesús guiraa rebejṉ

²³Cheni guyu' Jesús guedx Jerusalén cadro cayajc lanij pascw, laḻ ni cayajc lanijga, xhidajl rebejṉ huililajz xtiidxni, bahuiizareni remilagwr ni bejnni.

²⁴Luxh di Jesús nililajz xtidx rebejṉga, sa'csi arumbeeni xho najc rebejṉ.

²⁵Niluxh dini niquiin chu gäb lojni xho najc bejṉ, sa'csi lagajc laani anancheeni xho najc lastoo tejga bejṉ.