Read Mitla Zapotec Juan 20 Bible Online

Juan 20 - Mitla Zapotec bible

Juan 20

¹Primer dxej xten xmaanga, cäjyru, gajd lo guedxliuj jianij che huij Marii Magdaleṉ lo baaga. Che bidzujṉni ro' baaga, bahuiini agubicaj guij ni suga' ro' baaga.

²Dxejcti ruxuṉni gubi'ni te huiye'tzni lo Simón Pedr näjza lo stee xpejṉpac Jesús ni sanälazduxhni, räjpni lojreni: ―Ahuilääreni Dad neṉ baa, luxh dinu guidon caro sanärenini.

³Dxejc biriguxuṉ Pedr näjza stee bejṉga, huijreni nez lo baa.

⁴Ruxuṉ guiro'preni. Niluxh stee bejṉga ruxuṉduxhruni loj Pedr. Laani ganid bidzujṉni lo baaga.

⁵Dxejcti guretäṉni te bahuiini neṉ ba-biliääga. Bahuiini te laad naga' relajdtis nani bidejb Jesús, luxh dini niu' neṉ baaga.

⁶Dxejc bidzuṉgajc Pedr, biugajcni neṉ baaga, bahuiini naga' relajdga te laad.

⁷Bahuiizani lajd ni guyu' yejcni, ni'c nie'tni saru, naga'ni te laad.

⁸Dxejcti biu' stee bejṉga nani bidzujṉ ganid. Che bahuiini neṉ baaga, huililajzni gubaṉsac Jesús.

⁹Sa'csi gajdreni gacbee ni caj lo reguijtz, cadro caj nanab guibaṉsacni loj rebeṉgut.

¹⁰Dxejc gubisac guiro'p rexpejṉpacni rolijzreni. Baluiloj Jesús loj Marii Magdaleṉ (Mr. 16:9‑11)

¹¹Laltis suga' Marii cuä' baaga, cayoonni. Ni'cni laḻ ni cayoonni, basajb lojni te bahuiini neṉ baaga.

¹²Dxejcti bahuiini lo tio'p xangl Dios, najcwreni ladnolbäj, sobga'reni, tejni nez cadro gojt yejc Jesús, steeni nez cadro gojt ni'ni.

¹³Dxejcti räjpreni lojni: ―Nane', ¿xhicuent roonlu? Räjpni lojreni: ―Sa'csi sanäreni Dad, luxh dina ganä caro huisa'nrenini.

¹⁴Che gulujx guniini si'c, gubiréni, dxejc bahuiini loj Jesús suga' ro'c, niluxh dini niembee Jesús.

¹⁵Dxejc räjp Jesús lojni: ―Nane', ¿xhicuent roonlu? ¿Chu rguiillu? Marii bejn xhigab laa dade' ni rcanäj huertga, ni'c räjpni lojni: ―Dad, palga luj sanäluni, gunii caro gudixhluni te guiliäsä́ni te chanää́ni.

¹⁶Dxejcti räjp Jesús lojni: ―¡Marii! Dxejc gubiré Marii, räjpni neṉ xtidx hebreo: ―¡Raboni! (Säloj diidxga “Mastr”.)

¹⁷Dxejcti räjp Jesús lojni: ―Na'c guiniaazlu narä sa'csi gadna cha'a lo Xtadä xhaguibaa. Huij loj rebetzä, huiye'tz lojreni, cha'a lo Xtadä, näjza Xtadtu, loj Xtiozä näjza Xtiooztu.

¹⁸Dxejcti huij Marii Magdaleṉ, bidzujṉni loj rexpejṉpacni badeedni didxcoob, räjpni: ―Abahuiä lo Dad Jesús. Räjpzani lojreni guiraa recos ni gunii Jesús lojni. Baluiloj Jesús loj rexpejṉpacni (Mt. 28:16‑20; Mr. 16:14‑18; Lc. 24:36‑49)

¹⁹Che gojl gudxej, najcni dumingw, primer dxej xten xmaan, abiäudzu'tz ro lä' ro' yu' cadro tre' rexpejṉpacni, sa'csi rdxejbreni rexpejṉ Israel. Chela bidzujṉ Jesús, guzujni nez galäiireni, räjpni lojreni: ―Suchu yäḻrbedxi lastootu.

²⁰Che guniini si'c, baluigajcni reṉaani lojreni näjza cuä' xcustiini. Ni'cni bibaduxhlajz rexpejṉpacni che bahuiireni lo Dad Jesús.

²¹Dxejc räjp Jesús lojreni stehuält: ―Suchu yäḻrbedxi lastootu. Si'c ni baxhaḻ Xtadä narä, si'cza ruxhaḻä la'tu.

²²Che gulujx guniini rediidxga, balejbni yejcreni, räjpni, lojreni: ―Suguibajṉ Sprit Dxan xten Dios neṉ lastootu.

²³Rextojḻ rebejṉ nani siäḻlajztu, sibicajreni. Rextojḻ rebejṉ nani ditu jiäḻlajz, siannäjreni redojḻga. Tomás bahuii lo Jesús ni gubaṉsac

²⁴Tomás, ni laaza Didimo, najcni te retzubitio'p xpejṉpac Jesús. Rutini che biääd Jesús loj rexpejṉpacni.

²⁵Dxejcti räjp rexpejṉpacni lojni: ―Abihuiinu loj Jesús, agubaṉsacni loj rebeṉgut. Dxejcti laani räjpni lojreni: ―Palga dina fiä loj reṉaani cadro caj seen xten reclaab, palga dina guqui'tzä bicueṉaä́ cadro guyu' claabga, guqui'tzäza ṉaa cadro bixal cuä'ni, di lazä chalii gubaṉsacni loj rebeṉgut.

²⁶Che gudejd xhujṉ dxej, tresac rexpejṉpacni neṉ yu', nadxaagza Tomás lojreni. Niäudzu'tz yu'ga, luxh chela gucbeereni abidzujṉ Jesús, guzujni galäiireni, räjpni lojreni: ―Suchu yäḻrbedxi lastootu.

²⁷Dxejcti räjpni loj Tomás: ―Baqui'tz bicueṉaalu ree loj patṉaä, basäḻza ṉaalu cuä'äre, na'c ractio'p lajzlu, huililajzpac gubaṉsacä loj rebeṉgut.

²⁸Dxejcti räjp Tomás lojni: ―¡Xtadä, Xtioozä!

²⁹Dxejcti räjp Jesús lojni: ―Sa'csi abahuiilu loä, Tomás, huililajzlu. Chicbaa renani mase direni fii, rililajzreni xtidxä. Xhicuent bacuaani reguijtzre

³⁰Xhidalroduxhru dzuun bejn Jesús nez loj rexpejṉpacni, nani di nicaj lo guijtz.

³¹Redzuunre nani bejn Jesús nani cuaj lo guijtzre cuajni te chalilajztu diidxre: Jesús najc Crist, nani cabäjz rebejṉ jiääd, Xi'n Dios. Luxh che chalilajz te bejṉ xtiidxni, sajpni yäḻnabajṉ par tejpas.