Read Mitla Zapotec Juan 21 Bible Online

Juan 21 - Mitla Zapotec bible

Juan 21

¹Dxejcti baluiloj Jesús loj rexpejṉni ro' nisdoo ni laa Tiberias. Scree baluilojni lojreni.

²Nadxaag sa' rebejṉre: Simón Pedr, Tomás ni laaza Didimo, näjza Natanael, nani siääd Caná xten Galilee, rexi'n Zebedeo, näjza stio'p rexpejṉpacni.

³Dxejcti räjp Simón Pedr loj resa'ni: ―Chanazä bäjl. Räjpreni lojni: ―Näjza nuure chonnu. Dxejcti sääreni, huä'preni neṉ te barcw. Guideb guxhijṉga xhet bäjldi gunaazreni.

⁴Che acayanij loj guedxliuj, suga' Jesús ro' nisdooga, di rexpejṉni niembeeni.

⁵Ni'cni räjp Jesús lojreni: ―Rexi'nä, ¿la xhet bäjldi rajptu, ä? Räjpreni lojni: ―Xhet rajpdinu.

⁶Dxejcti räjpni lojreni: ―Coḻgusäḻ xquijxhtu ladbee xten barcwga, te ro'c siniaaztuni. Dxejcti bacuaareni guijxhga ladbee xten barcwga, dxejcti ameer diniajcdi nibääreni guijxhga ro'c sa'csi gudxadotzu'tzni bäjl.

⁷Dxejcti bejṉ nani sanälazduxh Jesús, räjp loj Pedr: ―Laa Dad Jesús. Che biejn diajg Simón Pedr laa Dad Jesús, gotgajcni xhablojiaani sa'csi ladxhagjiättis najcwni sa'csi canaazni bäjl, dxejcti gutiäjsni lo nisdoo.

⁸Sgaii rexpejṉpacni biädnäreni rebarcwga sa'csi ameer guidzujṉreni ro' nisdooga, si'cti tegayuu metrtis cayäädx. Siädnäzareni guijxh guidxa rebäjl.

⁹Che bidzujṉreni ro' nisdoo, bahuiireni re' guiboo, ro'c dzuub te bäjl näjza yätxtiil cague'.

¹⁰Dxejcti räjp Jesús lojreni: ―Coḻtanä gaii bäjl nani entis gunaaztu.

¹¹Dxejcti huij Simón Pedr, gulääni guijxhga, guidxani bälro. Guyu' si'cti te gayuu garol con choṉ bäjl neṉ guijxhga, niluxh dini niräsya' mase guyu' xhidalduxh bäjl neṉni.

¹²Dxejcti räjp Jesús lojreni: ―Coḻtaa te gauxharejntu. Nicla tej rexpejṉpacni dini niabdiidx lojni: “¿Chu luj?” sa'csi anajnreni laa Jesúsni.

¹³Dxejcti cua' Jesús yätxtiil, badeedni lojreni, sigajcza rebäjl.

¹⁴Dee najc ni riojṉ huält baluilojni loj rexpejṉpacni, che gubaṉsacni loj rebeṉgut. Jesús rninäj Simón Pedr

¹⁵Che gulujx gudajwreni, räjp Jesús loj Simón Pedr: ―Simón xi'n Jonás, ¿la sanälajzrulu narä loj chu stee, ä? Räjpni lojni: ―O'n, Dad, luj najnlu sanälazä luj. Räjp Jesús lojni: ―Gojp rexilä'ä.

¹⁶Räpsacni lojni ni rojp huält: ―Simón, xi'n Jonás, ¿la sanälajzlu narä, ä? Räjpni lojni: ―O'n, Dad. Luj najnlu sanälazä luj. Räjpni lojni: ―Gojp rexilä.

¹⁷Räpsacni lojni ni riojṉ huält: ―Simón xi'n Jonás, ¿la sanälajzlu narä? Guc-huin lastoo Simón Pedr sa'csi gunabdiidx Jesús lojni choṉ huält: “¿La sanälajzlu narä?” Dxejcti räjp Simón lojni: ―Dad, luj najnlu guira'ti. Luj najnlu sanälazä luj. Räjp Jesús lojni: ―Gojp rexilä.

¹⁸Rniliä́pac lojlu, che gujclu bi'nru, lagajc luj rajcwlu xhajblu, rijlu cadrotis rlajzlu. Che anajclu beṉgool, susgaatislu ṉaalu te gushuajcw ste'ca bejṉ xhajblu, te chanäreni luj cadro di rlajzlu.

¹⁹Luxh diidxga gunii Jesús te cagusule'ni xho gugu'treni Pedr te guiliä'pni xpala'n Dios. Che gulujx guniini si'c, räjpni loj Pedr: ―Gudanajl narä.

²⁰Che gubiré Pedr, bahuiini loj stee xpejṉni, nani sanälajzru Jesús, siädnajlni dejtzreni. Lagajc bejṉre ni gurej cuä' Jesús lo lult xchej, ni räjpza loj Jesús: “Dad, ¿chuni'c najc nani guto'lu?”

²¹Ni'cni, che bahuii Pedr lojni, räjpni loj Jesús: ―Dad, deea', ¿xhi gun dee?

²²Dxejcti räjp Jesús lojni: ―Palga rlazä jia'nni che guibisacäli loj guedxliujre, ¿xhixh najcni? Basaanni. Luj gudanajl narä.

²³Ni'cni bire'ch diidx lagajc loj resa'ni, di bejṉga guet. Di Jesús niäjb lojni dini guet, alga räjpni: “palga rlazä jia'nni loj guedxliujre che guibisacäli lo guedxliujre, ¿xhixh najcni?”

²⁴Luxh bejṉga najc narä, xpejṉ Jesús nani bahuiloj guiraa recosre, nani bacuaazareni. Anadonnu didxliipac najc recos nani rniini.

²⁵Yu'ru xhidalduxh dzuun ni bejn Jesús. Palga gucuaanu guiralii redzuun ni bejn Jesús, nicla lo guedxliujre di gaḻ chu reguijtz cadro xcajni.