Read Mitla Zapotec Juan 6 Bible Online

Juan 6 - Mitla Zapotec bible

Juan 6

¹Che gulujx gujc recosre, dxejc sää Jesús stelaad nezro' nisdoo xten Galilee, nani rniizareni nisdoo xten Tiberias.

²Sanajl xhidajl bejṉni sa'csi rhuiireni remilagwr ni rujnni lo rebeṉracxhuu.

³Dxejcti huä'p Jesús yejc te dajn, ro'c gurenäjni rexpejṉpacni.

⁴Niluxh ameer gac lanij pascw xten rexpejṉ Israel, cheni rudeedreni xquixhtios lo Dios xcuent dxej ni biriireni Egipto.

⁵Cheni guläs Jesús lojni, bahuiini siääd xhidalduxh bejṉ, siäädreni nez lojni, dxejcti räjpni loj Felipe: ―¿Caro guisiinu yätxtiil te gau rebejṉre?

⁶Dxejc räjpzani si'c te don xhi xhigab gun Felipe, luxh laani anajnni xho gunni.

⁷Räjp Felipe lojni: ―Di tio'p gayuu beex yätxtiil gaḻ te gaureni tlagaj.

⁸Tej rexpejṉpacni ni laa Andrés, bejtz Simón Pedr, räjp lojni:

⁹―Ree suga' te biuux ca' gaii yätxtiil con tio'p bäjl, ¿xhixh sajl ni'c gau rebeṉ xhidajlre?

¹⁰Dxejcti räjp Jesús: ―Coḻyejtz loj rebejṉre cuereni. Yuduxh guixa' ro'c. Dxejcti gurej reniguii. Si'cti gaii miḻ najc reniguii.

¹¹Dxejcti cua' Jesús yätxtiilga, badeedni xquixtios lo Dios, gudisni yätxtiilga lo rexpejṉpacni. Dxejcti rexpejṉpacni gudisrenini loj rebejṉ nani sobga'. Sigajcza gudisreni rebäjl si'ctisni rlajzreni gaureni.

¹²Che gulujx gudajwreni, gudxaj xque'reni, dxejcti räjp Jesús loj rexpejṉpacni: ―Coḻgutie' guiraa reyätxtilbiujy nani bia'n te xhet nitdi.

¹³Batie'tireni reyätxtilbiujy, guläsreni tzubitio'p dxijm̲ yätxtilbiujy nani bia'n lo gaii yätxtiilga nani gula' gudajwreni.

¹⁴Che bahuii rebejṉga reseen, remilagwr nani bejn Jesús, dxejc räjpreni: ―Guluiipacni, laa dee ni najc niguii ni rnii xtidx Dios nani cabääznu jiääd lo guedxliuj.

¹⁵Sas che gucbee Jesús cayujnreni xhigab jiädnaazrenini te niujnreni gacni ṟeii te guinibeeni lojreni, biriini ro'c, xtebni gubisacni neṉ dajn. Gusaj Jesús lo nisdoo (Mt. 14:22‑27; Mr. 6:45‑52)

¹⁶Che gojl guxhijṉ, bidzujṉ rexpejṉpacni lo nisdoo.

¹⁷Biu'reni neṉ te barcw te tedreni lo nisdoo nez guedx Capernaum. Abicäjy lo yuj niluxh gajd Jesús guibi' lojreni te chääni.

¹⁸Gusloj cayäjs nisdoo xcuent te beduxh nani cabi'.

¹⁹Ni'cni che gusajreni si'cti gaii o xho'p kilómetro, bahuiireni siäddzuṉgajxh Jesús lo barcw, lo nisdoo siädsajni. Bidxebduxhreni.

²⁰Luxh laani räjpni lojreni: ―Naräni. Na'c guidxejbtu.

²¹Dxejcru cuäjbreni biu'ni neṉ barcw. Dxejcti bidzuṉgajcreni stelaad lo yuj cadro sääreni. Caguiil rebejṉ Jesús

²²Che bara yääl, rebejṉ nani bia'n stelaad ro' nisdoo, bahuiireni asanä rexpejṉpacni barcwbäz nani suga' ro'c, niluxh di Jesús nij, xtebsireni sääreni.

²³Luxh bidzuṉgajc sgaii barcw nani birii guedx Tiberias, te lajt ni tre' gajxh cadro gudajwreni yätxtiil che gulujx badeed Jesús xquixtios lo Dad.

²⁴Che bahuii rebejṉ ruti Jesús ro'c, niclaza rexpejṉni, biu'reni neṉ rebarcw, sääreni guedx Capernaum satiilreni Jesús. Jesús najc yätxtiil xten yäḻnabajṉ

²⁵Che bidxälreni Jesús stelaad ro' nisdoo, räjpreni lojni: ―Mastr, ¿guc bidzujṉlu ree?

²⁶Badzu' Jesús diidxre, räjpni lojreni: ―Rniliä́, rniliä́pac lojtu, caguiiltu narä sa'csi gudajwtu, gudxaj xque'tu, et sa'csi bahuiiditu remilagwr nani benä.

²⁷Na'c guntu dzuun ganax par yäḻrajw nani rnitloj. Coḻyejn dzuun par yäḻrajw nani di nitloj, ni runiidx yäḻnabajṉ par tejpas. Yaḻrajwre suniidx Xi'n Niguii, sa'csi loj rebejṉ baluii Xtadni, Diospac, laani najc Xi'npacni.

²⁸Dxejcti räjpreni: ―¿Xhini'c jiennu te gac jienpacnu dzuun ni rlajz Dios?

²⁹Räjp Jesús lojreni: ―Dee najc ni rlajz Dios guntu: chalilajztu xtidx narä, nani baxhaḻni.

³⁰Räjpreni lojni: ―¿Xhi seen gunlu te guihuiinu xcäḻrnibeelu te cholilajznu xtiidxlu? ¿Xhi dzuun rujnlu?

³¹Retoxtadnu gudajwreni yätxtiil ni laa mana loj reyubijdz si'cni caj loj reguijtz: “Badeedni yätxtiil ni biajb xhaguibaa gudajwreni.”

³²Räjpza Jesús: ―Rniliä́, rniliä́pac lojtu, xhet toMoisésdi ni badeed yätxtiil ni biajb xhaguibaa. Xtadä ni suniidx yätxtiil nani siäädpac xhaguibaa.

³³Sa'csi yätxtiil xten Dios najc bejṉ ni siääd xhaguibaa, niluxh laani rudeedni yäḻnabajṉ par tejpas loj rebeṉ guedxliuj.

³⁴Räjpreni: ―Dad, baniidx yätxtiilga loonu.

³⁵Dxejcti räjp Jesús lojreni: ―Narä nacä yätxtiil xten yäḻnabajṉ nani riäjḻ jiääd; chutis ni jiääd loä diruni guiliaan, niluxh chutis ni rililajz xtidxä diruni jiojḻ par tejpas.

³⁶Aguniä lojtu, la'tu ditu chalilajz, luxh abahuiitu loä.

³⁷Guiraa renani abaniidx Xtadä loä, siäädni loä, niluxh chutis ni jiääd loä dina cuälazäni.

³⁸Sa'csi narä siälä xhaguibaali te gunä si'c ni rlajz Xtadä, xhet si'cdi ni rlazädi.

³⁹Dee najc ni rlajz Xtadä nani baxhaḻ narä: na'c nit nicla tej renani baniidxni loä, te guspaṉsacä guiragajcreni che gaḻ dxej lult ni riäjḻ jiääd.

⁴⁰Scree rlajz nani baxhaḻ narä: guiraa renani fii lo Xi'n Dios, näj chalilajzreni xtiidxni, xca'reni yäḻnabajṉ par tejpas niluxh narä suspaṉsacäreni che gaḻ dxej lult ni riäjḻ jiääd.

⁴¹Rediidxre bejn gusloj casiejy rexpejṉ Israel xcuent Jesús sa'csi räjpni: “Narä nacä yätxtiil ni biäjt xhaguibaa.”

⁴²Dxejcti räjpreni: ―¿La et Jesúsdi, xi'n José dee, ä? Nuure numbeenu xtadni, xnanni, ¿xhoxh rniini xhaguibaa biäjtni?

⁴³Dxejc räjp Jesús lojreni: ―Na'c rusieinäj sa'tu.

⁴⁴Rut rajcdi riääd loä palga di Xtadä ni baxhaḻ narä jiädnäni loä, te guspaṉsacäni che gaḻ dxej lult ni riäjḻ jiääd.

⁴⁵Loj reguijtz ni bacuaa redade' ni gunii xtidx Dios caj scree: “Suluii Dios guiraareni.” Ni'cni guiraa reni rucuadiajg xtidx Xtadä, reni rsieed lojni, reni'c ni jiääd loä.

⁴⁶’Dinä guiniä yu' chu abahuii lo Dios; tejtis ni abahuii lojni: nani baxhaḻ Dios, ni'ctis abahuii lojni.

⁴⁷Rniliä lojtu che rniä: nani chalilajz xtidxä, ni'c rajp yäḻnabajṉ par tejpas.

⁴⁸Narä nacä yätxtiil nani rudeed yäḻnabajṉ.

⁴⁹Retoxtadtu gudajw mana ni bastejb Dios lo reyubijdz, dxejcti gujtzareni.

⁵⁰Dee najc yätxtiil ni siääd xhaguibaa, te chutis ni gau yätxtiilga dini guet.

⁵¹Narä nacä yätxtilbajṉ ni siääd xhaguibaa. Palga yu' chu gau yätxtiilre, sibajṉni par tejpas. Yätxtiil nani runidxä narä te xca' rebeṉ guedxliuj yäḻnabajṉ najc lagajc bältiexhä.

⁵²Dxejcti gusloj casiejy rexpejṉ Israel räjpreni: ―¿Xho gac guniidx dee bältiejxhni guidauunu, ä?

⁵³Räjp Jesús: ―Rniliä́, rniliä́pac lojtu, palga ditu gau bältiejxh Xi'n Dios ni gujc Niguii, palga dizatu yä xtiejnni, digacdi ga'ptu yäḻnabajṉ.

⁵⁴Nani gau bältiexhä, nani yäza xtienä, ni'c rajp yäḻnabajṉ par tejpas, niluxh suspaṉsacäni che gaḻ redxej lult.

⁵⁵Sa'csi bältiexhä najc te yäḻrausa'cpac, xtienä najcza te yäḻräsa'cpac.

⁵⁶Nani gau bältiexhä, nani yäza xtienä, ni'c yu'pac con narä, luxh narä yu'äza con laani.

⁵⁷Xtadä ni baxhaḻ narä rajp yäḻnabajṉ par tejpas. Narä nabaṉä xcuent laani. Sigajcza nani rajw narä, sibajṉzani xcuent narä.

⁵⁸Dee najc yätxtiil nani biääd xhaguibaali; dini gac si'c mana ni gudajw xtadtu dxejc empac gujtreni, sa'csi nani gau yätxtiilre sibajṉni par tejpas.

⁵⁹Recosre baluii Jesús neṉ te guidobäz laḻ ni guyu'ni guedx Capernaum. Diidx xten yäḻnabajṉ par tejpas

⁶⁰Che biejn diajgreni si'c, xhidajl rexpejṉpacni räjp: ―Naganduxh najc rextiidxni. ¿Chu laa nani gac cuadiajgni?

⁶¹Dxejcti gucbee Jesús cagusiejyreni xcuent rediidxga, dxejc gunabdiidxni räjpni: ―¿La rusieed rediidxre la'tu, ä?

⁶²¿Xhicha guntu paru fiitu chä'p Xi'n Dios ni gujc Niguii cadro guyu'ni galoo?

⁶³Sprit xten Dios najc ni rudeed yäḻnabajṉ; bältiejxhni xhet rujndini gaan. Rediidx nani guniä lojtu najc didxlii xcuent recos xten Sprit, luxh rediidxga rudeed yäḻnabajṉ par tejpas.

⁶⁴Luxh laḻtis yu' lojtu reni di chalilajz. Sa'csi Jesús nancheeni galooli chu reni'c di chalilajz, anajnzani chuni'c guto'ni, guteedni laani ladzṉaa rebeṉ dojḻ.

⁶⁵Dxejcti räjpni: ―Ni'cni rniä lojtu, nicla tej rut sajcdi jiääd loä palga di Xtadä jiädnäni loä.

⁶⁶Lagajc dxejc gusloj cabicaj xhidajl rebejṉ ni agujc xchej gusanäj Jesús, dirureni nisianäj Jesús.

⁶⁷Dxejcti räjp Jesús loj guidzubitio'p rexpejṉpacni: ―¿La nägajcza la'tu rlajztu jiitu, ä?

⁶⁸Badzu' Simón Pedr diidxre, räjpni: ―Dad, ¿chuloj chonnu? Luj rajplu diidx ni rudeed yäḻnabajṉ par tejpas.

⁶⁹Nuure abiolilaaznu, anajnnu najclu Crist Xi'n Dios nani nabajṉ.

⁷⁰Badzu' Jesús diidxre, räjpni: ―¿La et lagajc narädi guleä guitzubitio'ptu? Luxh tejtu najc beṉdxab.

⁷¹Diidxga guniini xcuent Judas Iscariote, xi'n Simón, sa'csi Judas najc ni guto'ni mase nadxaagni lo guitzubitio'p rexpejṉpac Jesús.