Read Mitla Zapotec Juan 7 Bible Online

Juan 7 - Mitla Zapotec bible

Juan 7

¹Che gujcti recosre, cansaj Jesús nez reyuj xten Galilee, di rlajzni jia'nni nez reguedx Judea sa'csi rlajz rebeṉ ro'c ju'tni.

²Luxh ameer gaḻ lanij xten cose'ch xten guidoguijd, te relanij xten rexpejṉ Israel.

³Ni'c räjp rebejtz Jesús lojni: ―Na'c jia'nlu ree. Huij Judea te näjza rexpejṉpaclu fii redzunro nani rujnlu.

⁴Sa'csi rut rujndi xtzuunni xhiga'tz palga rlajzni gacbee bejṉ xhi dzuun rujnni, te gumbee bejṉni. Palga rujnpaclu redzuunre, baluiini lo guiraa rebeṉ guedxliuj.

⁵Guniireni si'c lojni sa'csi nicla rebejtzni di chalilajz xtiidxni.

⁶Dxejcti räjp Jesús lojreni: ―Gajd xhoṟä guidzujṉ, niluxh par la'tu xhitis oṟ najc hueen.

⁷Di gacdi guidxe'ch rebeṉ guedxliuj lojtu, luxh rdxe'chreni loä sa'csi narä rniliä xcuentreni: dzunguijdx najc xtzuunreni.

⁸La'tu coḻchäj lanij; narä dina cha'a lanijga sa'csi gajd xhoṟä gaḻ.

⁹Che gulujx guniini si'c lojreni bia'ntini nez Galilee. Huij Jesús lanij xten retabernaculos

¹⁰Dxejcti che asää rebejtzni lanij, dxejc näjza laani sääni lanij, luxh dini nusäbdiidx, si'c xhiga'tz sääni.

¹¹Dxejcti caguiil rexpejṉ Israelni lo lanijga, räjpreni: ―¿Concha niguiiga?

¹²Lo rebejṉ xhidaalga yu' xhidajl bejṉ ni cagusiejyreni xcuentni. Yu'reni räjp: “Hueen najcni”, per sgaiireni räjp: “Dini gac hueen. Cagusgueeni rebeṉguejdx.”

¹³Nicla tejreni xhet casäbdiidxdireni xhini'c caniireni. Direni guinii dip sa'csi rdxejbreni rexpejṉ Israel nani rnibee.

¹⁴Agurojl lanij, che biu' Jesús neṉ guidoro. Dxejcti gusloj caguluiini.

¹⁵Dxejcti rdxeloj rexpejṉ Israel nani rnibee, räjpreni: ―¿Xho najn dee guiraloj, niluxh dini nisieed xleii toMoisés?

¹⁶Badzu' Jesús diidxre, räjpni: ―Yäḻruluii nani caluiyä et xtenädini, xten nani baxhaḻ naräni.

¹⁷Palga yu' chu rlajz gun nani rlajz Dios, sacbeeni la xten Dios najc reyäḻruluii xtenä, o la lagajcsi narä rbää́ diidx ni caguluiä.

¹⁸Nani rusule'ni diidx nani lagajc laani rbääni, ni'c rniini diidxga te guiliä'p rebejṉ xpala'nni, luxh nani rguiil chä'p xpala'n nani baxhaḻni, ni'c ni rnii didxlii, xheti yäḻrusguee neṉ lastooni.

¹⁹¿La di toMoises nuniidx leii lojtu, ä? Niluxh nicla tejtu di gusoob xtidx leiiga. ¿Xhicuent rlajztu ju'ttu narä, pes?

²⁰Badzu' rebeṉ xhidajlga diidxre, räjpreni: ―¡Xprit beṉdxab yu' lastoolu! ¿Chuni'c rlajz ju'tlu?

²¹Badzu' Jesús diidxre lojreni, räjpni: ―Tejtis dzuun benä con xcäḻrnibeä, dxejc guiraatu cadxelojtu sa'csi benäni dxej ni rusilajztu.

²²Ni'cni baniidx toMoisés lojtu yäḻru'tu bee, luxh etlaadini guläxtiejnini, agac guläxtiej retoxtadgoldootuni. La'tu rusäḻtu bee rebiuux mase najcni dxej nani rusilajztu.

²³Mbaj pes, palga rajc rusäḻtu bee bejṉ te dxej nani rusilajztu didi nit xleii Moisés, ¿xhicuent rdxe'chtu loä sa'csi basiacäpac te bejṉ te dxej nani rusilajztu, ä?

²⁴Na'c rujntu yäḻguxhtis si'ctis ni rlajztu. Coḻyejn yäḻguxhtis con yäḻguxhtis xten Dios. Rusule' Jesús casiäädni

²⁵Dxejcti gusloj gaii bejṉ Jerusalén cayujn yäḻgunabdiidx, räjpreni: ―¿La etlaadi dee ni caguiilreni te ju'trenini, ä?

²⁶Ani asuga', caniini nez loj guiraa rebeṉguejdx, niluxh rut rudxojndini. ¿Xhaa ahuililajz reguxhtis, regubier laani najcpacni Crist, ä?

²⁷Niluxh nuure nadoncheenu caro siääd niguiire, niluxh che jiääd Crist, rut gacbeedi caro siäädni.

²⁸Caguluii Jesús neṉ guidoo che biejn diajgni rediidxre, dxejc dipduxh guniini, räjpni: ―La'tu numbeetu narä, najntu caro siälä; luxh dina niälä lagajcsi narä; nani baxhaḻ narä guliipac nabajṉni, luxh la'tu ditu gumbeeni.

²⁹Luxh narä numbeäni, sa'csi lojni biriä, laani baxhaḻzani narä.

³⁰Dxejc rlajzreni niniaazrenini, niluxh rut gunaazdini, sa'csi gajd xhoṟni gaḻ.

³¹Xhidajl bejṉ lo rebeṉ xhidajlga huililajz xtiidxni, dxejcti räjpreni: ―Cheni jiääd Crist, ¿xhixh sujnruni milagwr loj nani rujn dee, ä? Ruxhaḻ refarisee guixhajg guiniaaz Jesús te jiäuni

³²Che biejn diajg refarisee xhi canii rebejṉ xcuent Jesús, laareni näjza rebixhojz nani rnibee lo rebixhojz baxhaḻreni guixhajg te guiniaazreni Jesús te jiäuuni.

³³Sas räjp Jesús lojreni: ―Bale'si dxej su'ä lojtu, dxejcti guibi'ä loj nani baxhaḻ narä.

³⁴Siguiiltu narä, niluxh ditu guidxäl narä, sa'csi cadro cha'ä digacdi jiäädtu.

³⁵Ni'c gunii rexpejṉ Israel lo sa'reni; räjpreni: ―¿Cacharo chääni ni'c di gacdi guidxälnuni? ¿Xhaa sijni loj rexpejṉ Israel nani nare'ch nez lajdx regriegos te guluiini regriegos?

³⁶¿Xhi säloj diidxre nani guniini loonu: “Siguiiltu narä, niluxh ditu guidxäl narä, sa'csi cadro cha'ä di gacdi jiäädtu”? Regueu nisnabajṉ

³⁷Lult dxe lanij, ni najc dxero, gusulii Jesús dipduxh guniini, räjpni: ―Palga yu' chu cayojḻ, sujiäädni loä te yäni.

³⁸Nani chalilajz xtidxä si'cni caj lo rexquijtz Dios neṉ lastoolini siliejn nisnabajṉ.

³⁹Rediidxre guniini xcuent Sprit Dxan nani churu jiädläjz neṉ lastoo reni rililajz xtiidxni, sa'csi gajd Sprit Dxan jiääd, sa'csi gajd Jesús guibaṉsac lo rebeṉgut. Gucgala' rebejṉ

⁴⁰Lo rebeṉ xhidajlga yu' reni biejn diajgreni rediidxga, dxejc räjpreni: ―Guliipacni, dade're najc laapac ni siääd, si'c ni rnii xtidx Dios.

⁴¹Yu'zareni räjp: ―Dade're najc Crist ni cabääznu. Yu'za sgaii ni räjp: ―Gurniälojtu jiääd Crist nez Galilee.

⁴²Ni loj rexquijtz Dios caj riäjḻpac gac Crist te rexagdoo toṟeii David, jiäädzani guedx Belén, lagajc guejdx cadro siääd toṟeii David.

⁴³Dxejcti gucgala' rebejṉ xcuent Jesús.

⁴⁴Yu'reni rlajz chääni pres luxh rut biajxdi gunaazni. Di reguxhtis chalilajz biääd Crist

⁴⁵Gubi' reguixhajg xten guidoo loj rebixhojzro näjza refarisee. Dxejcti gunabdiidxreni loj reguixhajg, räjpreni: ―¿Xhicuent ditu niädnäni?

⁴⁶Badzu' reguixhajg diidxre, räjpreni: ―¡Gajdpac te bejṉ guinii si'cni rnii bejṉga!

⁴⁷Dxejc räjp refarisee: ―¿La näj la'tu abasgueeni, ä?

⁴⁸¿Xhixh loj regubier o loj refarisee yu' chu tej ni ahuililajz xtiidxni, ä?

⁴⁹Rebeṉ xhidajlre ni di gan xleii toMoisés, reni'c agunijtpac.

⁵⁰Nicodem̲, nani huij lojni te guxhijṉ, najc te refarisee. Laani räjpni lojreni:

⁵¹―Lo xleiinu caj: digacdi guntu yäḻguxhtis te bejṉ palga gajdtu gucuadiagxgaa xtiidxni, te don xhi bejnni.

⁵²Badzu'reni diidxre räjpreni lojni: ―¿La näjza luj siäädlu Galilee, ä? Biḻsa'c xhi caj lo xquijtz Dios, suhuiilu nicla tej niguii nani rnii xtidx Dios di jiääd nez Galilee. Gunaa nani biga' carälguijxh con te niguii

⁵³Dxejc cade tejreni sii rolijzreni.